《笑傲缸湖》大家都知道疫情搞到全球經濟都好衰弱，有好多人都失業。面對咁嘅經濟環境，盈盈相信全球有唔少人都要慳啲使啦！不過都總會有一班人嘅資產不斷增值，盈盈就睇到不經不覺間富豪榜嘅排名又有變動啦，講緊嘅就係Ｔｅｓｌａ　ＣＥＯ「鋼鐵人」馬斯克！　　睇返彭博富豪排行榜，原來馬斯克身家係一日之間已經超過咗微軟創辦人標叔叔（Ｂｉｌｌ　Ｇａｔｅｓ）嘅身家１２７７億美元，成為全球第二大富豪啦！至於佢點解身家大增？就係因為佢大量持股嘅Ｔｅｓｌａ美股喺星期一大漲成６﹒５巴仙咁多！直接令到佢身家暴增７２億美元去到１２７９億美元呀！都真係幾誇張下架！　　不過老實講，馬斯克要坐穩富豪第二位可能要再努力多少少！事關佢只係微微領先標叔叔兩億咁大把，一個唔該Ｔｅｓｌａ股價回落返嘅話，佢第二位嘅寶座就保唔住啦！同時佢如果想挑戰做首富，都應該要再再再努力多少少！因為亞馬遜行政總裁、姐係世界首富貝佐斯嘅身家有成１８１９億美元，馬克斯要爬佢頭都有啲難度！　　之不過盈盈睇住Ｔｅｓｌａ越升越有，而馬克斯都非常睇好公司發展，或者Ｔｅｓｌａ之後都可以Ｋｅｅｐ到個勢繼續飛升！如果Ｔｅｓｌａ一路都生生性性升上，相信馬斯克做首富都係指日可待！《任盈盈》

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

全新節目《說說心理話》青少年不可以戀愛！？真實個案講述驚心動魄經歷► 即睇