《笑傲缸湖》馬斯克作為世界級ＫＯＬ，日日都有人睇實佢推特（Ｔｗｉｔｔｅｒ）帳戶。之前佢只係輕輕講咗一句「Ｕｓｅ　Ｓｉｇｎａｌ」，就搞到Ｗｈａｔｓａｐｐ用家大遷徙。想擁有呢份影響力都唔一定要做ＫＯＬ，盈盈比個簡單少少嘅方法大家，就係應徵做佢推特小編，幫佢手推文同埋回覆粉絲！　　唔講唔知，特斯拉雖然係舉世觸目嘅汽車製造商，但佢哋公關團隊比其他大型汽車製造商只係約廿分之一。特斯拉面對大量媒體報道，喺唔夠人手下仲要處理同糾正媒錯誤資訊，做公關壓力都唔小。加上馬斯克一早就話過不喜歡傳媒，所以特斯拉同傳媒關係一直麻麻地地，想知官方資訊既，去馬斯克推特就係最快最新！今次特斯拉請嘅推特小編，工作壓力應該都唔少。　　盈盈睇返馬斯克嘅推特，發現佢係２００９年６月註冊後，每日發發十幾條推特，非常活躍。馬斯克咩都會講，當中仲有唔少具爭議性言論，例如上年５月出推特話：「我認為特斯拉股價太高了」，結果當日特斯拉股價大挫逾１１％，市值蒸發１４０億美金。　　聽講馬斯克之前用推特幾乎只係回覆讚美特斯拉嘅粉絲，如果有專人跟進，唔知以後佢個推特會唔會有新景象呢？《任盈盈》

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

etnet榮獲HKEX Awards 2023 「最佳表現證券數據供應商」大獎► 了解詳情