《笑傲缸湖》雖然疫情大大話話都搞足年幾，但係「宅經濟」同埋「科技抗疫」成為產業主流，唔少投資銀行都係呢個股市升浪入面賺到盤滿缽滿，有人計過，投行高盛員工係呢去年幫公司創造人均營收按年升１５巴仙，但係每個員工支出只係增加２巴仙咁大把。　　其實華爾街大細超就好常見，甚至已經成為銀行界「新常態」，因為呢類行業都經常呈現「肥上瘦下」嘅型態，加上銀行業成日都講咩經濟轉差、已經撥備幾百億壞帳預備等等嘅原因，營造一種業內十分糟糕嘅情況；事實上，從第四季投行業績中，睇得出大家係呢次疫情下都無咩點賺少咗，有啲更賺多有突添！　　其實根據業內人士指出，呢一行從來都係多勞多得，如果幫公司搵得多錢，自然獎金都會比較多，所以先出現獎金分配不平均情況；但去年疫情襲擊，「多勞多得」呢個情況可能暫時消失，甚至年終獎金都會有調整，大家都要留返個錢。　　另外一點就係，依家花旗國政府已經換屆，民主黨一路都對金融薪酬問題有不少疑慮，甚至拜登本人都十分關注收入唔平均問題，所以預計拜登上台後會對金融業審查及監管進行收緊；加上如果而家呢個時候，金融業仍對旗下員工提高薪金及派發大額獎金，會有「朱門酒肉臭」嘅感覺，所以大家都要收斂一下。　　其實人工多啲邊個唔想，大家都供車供樓生活艱難，不過公司都應該體諒下員工，如果派獎金會招人嫉妒的話，都可以派下禮品、現金券都可以㗎！純粹激勵下士氣咁解，獎勵嘅物品又點會只有錢咁膚淺呢？《任盈盈》

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

全新節目《說說心理話》講述被情緒困擾真實個案，情緒病最終如何走出低谷？► 即睇