《笑傲缸湖》比特幣嘅出現原本就係想擺脫政府管理，減少央行對貨幣嘅操控，但目前仍然處於商品交易階段，未能直接用作日常支付，不過，原來係美洲小國嘅漁村，已經開始應用比特幣作日常支付，邊個國家咁架勢堂？　　講緊嘅係中美洲國家薩爾瓦多嘅其中一個小漁村！呢個地方名為「埃爾松特」，由於薩爾瓦多喺今年６月初已經將比特幣定為法定貨幣，所以全球人類都定焦係呢個小漁村，如果佢成功就代表比特幣可以應用於日常啦！　　作為全球第一個將比特幣列為法定貨幣嘅國家，梗係要整返個配套方便大家交易啦！當地比特幣交易ＡＰＰ名為「Ｂｉｔｃｏｉｎ　Ｂｅａｃｈ」，其實就同我地日常用嘅「轉數快」咁方便，市民可以揀用呢個ＡＰＰ或者現金進行支付，目前呢個地方有５００個人用比特幣嚟購買日常雜貨或者交水電費。　　由於呢個國家有７０％人口都無銀行帳戶，所以比特幣係呢個國家發揮好大作用，該國總統認為比特幣可以幫到一啲開唔到銀行戶口嘅人，又或者可以吸引外國投資；不過商家佬就比較高風險啦，早一期比特幣升到６萬美金，又跌到落３萬頭，有雜貨舖因為比特幣爆升而換個新雪櫃，但而家身家又大縮水。　　至於遊客到呢個小漁村又點算好呢？唔使擔心，當地提供找換機，只要你入美金落去，再開通埋個ＡＰＰ，就可以直接兌換，不過兌換就會收返３蚊美金手續費，如果有興趣想體驗下比特幣交易樂趣就記住留意啦！《任盈盈》

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

【6月限時優惠】 送價值$175維柏健明目藍莓精華36:1► 火速行動