《笑傲缸湖》香港人去日本玩，其中一項熱門活動就係去１００円店掃貨，就算呢啲店舖而家喺香港開到成行成市，佢哋喺日本嘅人氣都似乎無乜點受到影響。不過而家乜都貴，早幾日日本官方就公布東京核心ＣＰＩ喺４月按年升１﹒９％，創咗７年幾以嚟最大升幅喇。咁標榜賣平嘢嘅１００円店又點生存呢？原來辦法就係賣貴過１００円嘅平價版高檔貨品，利用吓各位慳家「慶幸執到高檔平貨」嘅心理自救囉。　　據日本民間信用調查公司帝國徵信嘅數據顯示，喺日大型１００円店Ｃａｎ　Ｄｏ，約有一成商品都係賣貴過１００円嘅，最貴嘅貨品賣５００円，今後仲會加價加到１５００円。喺１００円店Ｗａｔｔｓ經營嘅約２﹒３萬種商品當中，中高價位商品都增加到大約一成。　　《日本經濟新聞》就報道，而家東京有１００円店有吊床同埋手提燈一類戶外商品賣，價錢劃一５５０円；另外又賣５５０円嘅電子手寫版，而呢種貨品如果喺其他類型舖頭賣會比較貴，而家１００円店有售，聽講就係為咗要吸納想「試用一吓」嘅新客。　　其實日本１００円店嘅大部分商品都係喺中國、東南亞等海外地區生產，所以咪可以一直ｋｅｅｐ住賣１００円咁抵囉。但由於海外人工費同原油價格上升，日圓貶值，物流混亂，１００円店想賺錢都愈嚟愈難喇。　　盈盈近年就發現，其實而家就算喺香港，啲１２蚊店無論係咪嚟自日本都會賣好多名牌嘢，不過都係平價版。呢種情況喺食物同埋個人護理用品方面尤其明顯，例如某啲歐美名牌洗頭水又或者日本牌子零食係賣東南亞生產版本，但價錢可能比起歐美或日本生產版本平一截，對想要優質貨品嘅消費者嚟講，淨係買咗但未開嚟用都已經好似賺咗咁，起碼心理上覺得「執到平嘢」，而且呢啲貨品翻貨快兼且成日轉款，又多數開喺商場度，等啲客可以ｋｅｅｐ住不時嚟尋寶，好有滿足感，呢啲做生意方式真係唔到你唔服㗎！《任盈盈》

《編者按》本欄搜羅即市傳聞，惟消息未經證實，《經濟通》亦不保證內容之準確性。

全新節目《說說心理話》講述被情緒困擾真實個案，情緒病最終如何走出低谷？► 即睇