《笑傲缸湖》最近美國科技股跌到嘭嘭聲，但係受到人口老化同埋疫情期間大肆擴充影響，美國唔少科技開始吃不消，炒咗好多人，又或者縮減招聘規模，不過另一邊廂，有啲科企又開始搶人，搞到其中一個老大哥微軟加人工留人，仲加股票報酬，真係好亂呀！　　股市上星期五（１３日）回穩之後，好多科企都要開始面對殘忍嘅現實：利率同物價同時上升，經濟可能嚴重放緩。有啲科企開始炒人應對，例如數碼業權保險公司Ｄｏｍａ裁員１５％；名人向ｆａｎｓ出售個人化影片平台Ｃａｍｅｏ裁員８７人。而股票交易平台Ｒｏｂｉｎｈｏｏｄ上月尾裁減３４０個職位，串流平台Ｎｅｔｆｌｉｘ亦削減２５個職位喇。　　科技業裁員潮殺到係有多好原因嘅，例如過去２０年同埋近兩年疫情期間大規模擴張嘅時勢完結，而且投資者似乎開始重整策略－－由高增長股份轉投低增長股份嘅懷抱，再加上人口老化導致勞動力市場吃緊令科企縮減招聘規模，同埋疫情下嘅網購熱潮退卻都算係。　　但微軟就有特別嘅抗逆技巧。佢禮拜一（１６日）就宣布將員工加薪預算「增加近一倍」，股票報酬範圍上調至少２５％，希望能夠留住員工同幫大家應付通脹咁話，而受惠嘅主要係「入職初期至中期嘅員工」添。聽《彭博》講，其實微軟正喺度同亞馬遜、谷歌同Ｆａｃｅｂｏｏｋ爭奪人才，喺網絡安全、ＡＩ、元宇宙同埋雲端計算呢啲領域爭得比較緊要，而且近年嘅疫情都令到唔少員工萌生去意，資方當然要諗計應對。　　照咁睇嚟，美國嘅科技業好似出現咗平行時空，究竟係被老細放棄定留住，似乎不由自主。不過正所謂「留得青山在，哪怕無柴燒？」，近年美國好多打工仔女都被疫情驅使到反思人生，結果爆出「大辭職潮」，仲蔓延到其他地方，所以無論係順其自然定自主規劃都未必係壞事，最緊要係自己諗清楚條路點行，就唔使畀時勢束縛喇。《任盈盈》

《編者按》本欄搜羅即市傳聞，惟消息未經證實，《經濟通》亦不保證內容之準確性。

etnet榮獲HKEX Awards 2023 「最佳表現證券數據供應商」大獎► 了解詳情