8月真係難挨，神州官媒狂出同監管相關嘅消息，見證著科技股狂插同反彈，仲要估花旗國聯儲局幾時收水同加息，要同自己講番句辛苦晒呀！港股呢兩日相當反覆，不過都有得升，今日仲成功衝破一直壓著恒指二十天線，係好事嘅，幫9月開番個好頭。 

 

　　但當然呢件事係配合番神州官媒少咗吹風話要嚴懲、打擊啲乜社會亂象，最新搞緊嘅係娛樂圈、追星之類嘅話題，對魚缸影響唔大。同時恒指現水平又真係平嘅，納入咗唔少科技股之下，市盈率得10.11倍，係6年以嚟最低，市帳率1.01倍同樣屬歷史低位，吸引番資金流入並唔出奇。

 

　　聯儲局今個月23號公布議息結果，好彩主席鮑爺一早講明今年可能會開始縮減買債規模，但縮減買債後唔代表會即刻加息，即係話水會繼續放，只係放少咗，而且未有收水時間表，相信今個月嘅議息聲明未必有驚喜，不過就要留意幾時開始縮減買債規模同埋孖屐到底price-in咗幾多。

 

（資料圖片） 

 

舜宇料依然有運行

 

　　9月第一個交易日，市場氣氛好番些少，仲比到驚喜大家，因為今日竟然見科技股幾強勢，真係相當難得！反而新能源股好似電力股、光伏股、新能源車股等開始見調整，近期最熱炒嘅氫能概念東岳(00189)借勢折讓配股集資，係咪會成為短期資金轉向嘅轉捩點？係咪代表新能源股短期出現見頂訊號？資金會否短期沽新能源股買？呢樣大家就拭目以待啦！不過點都好，新能源股普遍累計唔少升幅，阿臣當然唔會喺呢個位叫大家買住。反而想同大家傾下其他股份，望下有咩搵錢機！

 

　　工業製造股其實阿臣好鍾意，一直為長線投資之選。有傳新iPhone會喺今個月14號(星期二)發布、17號預購、24號首批發貨同正式開售，之前都有唔少傳言，例如會支援低軌道衛星通訊，畀人喺4G或5G訊號覆蓋唔到嘅地區維持通訊；後鏡頭感光元件變大等。要炒iPhone消息依家都差唔多水尾，阿臣會揀身兼蘋果供應鏈概念同車載鏡頭製造商舜宇光學(02382)，雖然舜宇喺蘋果供應鏈嘅佔比未必好高，但喺上半年集團車載鏡頭出貨量按年大增約82巴仙，電動車消費係神州實現碳中和嘅途徑之一，未來增長潛力可期，屬進可攻退可守類型。

 

 恒指於9月首個交易日再升149點, 延續8月期結後升勢。（經濟通HV2系統截圖）

 

 快手沽空漸減可博彈

　

　　首先，第一個板塊為科技股。其實估值以騰訊(00700)、阿里巴巴(09988)為首而言，當然非常便宜，兩者嘅預測市盈率均較過去數年嘅中位數為低，如果呢段時間買，大家唔理會中間波動，再擺幾年，相信點都有錢落袋。不過科技股選擇眾多，大家又可以點選擇？

 

　　騰訊阿臣就視為最穩陣選擇。第一，估值相當便宜，預測市盈率約24倍，近4年中位數則為28.3倍。第二，公司護城河紮實。公司雖然主營以遊戲為主，但佢喺雲業務、智能業務、金融科技等業務依然屬於神州第一人，甚至可以話係阿爺必須繼續靠佢嘅技術，發展新科技嘅科技巨人，重要性不言而喻。走勢方面，近期強勢番些少，股價於420銀至450銀都見到有資金撈下底。大家可以待調整至呢個位置買作長線投資，目標600銀，收穿410銀走佬！

 

　　美團(03690)則為波動性較大嘅選擇，不過阿臣相信未來幾年公司會係最有增長前景及故事性嘅大型科技股，因為社區團購目前為兵家必爭之地。美團嘅基因有用戶大數據及一流嘅運輸團隊，阿臣相信公司會係呢長戰爭嘅勝利者之一。走勢方面，股價突破240銀?短期阻力位，走勢亦係ATM中走勢最佳，可以呢個位置約240至250銀買入博突破短期頂部，目標價為280銀至300銀，不過收穿190銀就走佬！

 

　　快手(01024)則為最進取嘅選擇。基本面就無謂多講，由高位跌八成，現價就較招股價跌幾成，當氣氛轉好緊，其實買來博彈，博淡友平倉都抵！以公仔圖望，股價可以話近期首次見到一底高於一底，博彈嘅話80銀下買入，目標價望115銀招股價先，收穿70銀走佬！

 

藥明生物為醫療首選撈底股

 

　　醫療股已經有大幅度調整，到現階段，阿臣覺得都可以撈下貨！第一隻為藥明生物(02269)，公司增長勢態持續，生科公司亦離唔開公司嘅代工生產業務，加上以目前嘅產能擴張速度，公司未來數年有機會取代同行三星生物成為全球第一市佔龍頭，所以呢個位置買只係有買貴無買錯！大家可以於110至120銀水平買入，目標價148銀，但收穿100銀走佬！

 

　　第二隻為四環醫藥(00460)。首先公司中期增長非常耀眼，按年多賺3倍，但目前預測PE得22倍鬆啲；加上公司產業鏈非常豐富，好有想像空間，擁有醫美、仿製藥、創新藥、原料藥與CDMO及工業大麻等五大研產銷平台，目前醫美為其業務核心，而神州醫美尚處於起步階段，前景絕對值得憧憬！阿臣覺得可以喺2.2銀水平買入，目標價2.8銀，但收穿2銀要走佬！

 

　　最後，有些少跌到殘嘅半新股有些少異動，例如奈雪的茶(02150)、藍月亮(06993)，大家都可以多加留意，如果有買入機會阿臣會再同大家更新！最後一隻騰盛博藥(02137)為新冠肺炎概念股同鍾南山概念股。佢CCASS相當靚仔，市場參與者亦減少中，加上股價即使係大跌市後仍處於高位，反映可能有有心人想繼續炒上。大家可以?37銀買入，目標價50銀，但跌穿31銀要走佬！

 

　　經過阿臣觀察，短期投資方向可能有變，之後個倉都會大執，大家敬請留意！