《古臣周記》唔少上一代港男都信奉「四仔主義」，認為要齊晒「屋仔」、「車仔」、「老婆仔」、「ＢＢ仔」先叫做成功。以批判角度看，當然可以話「四仔主義」實情只係物質主義掛帥，缺乏心靈追求，但又問心，呢４大目標有邊個唔想全部達成？香港樓價升也升不停，年青人上車遙不可及，但日日ＯＴ辛苦掙錢，咪又係為咗有朝一日可以有自己嘅一個家。又即使香港交通四通八達，但阿臣亦總會幻想他朝可以買返架車喺公路上風馳電掣。

＊香江開倒車，Ｔｅｓｌａ四月冇人買＊

　　阿臣一直有留意開Ｔｅｓｌａ，早日首架平民版電動車Ｍｏｄｅｌ　３出廠，望住佢走在時代尖端嘅設計，又盛傳會加裝可以將資訊顯示喺擋風玻璃嘅新科技，真係心郁郁。可惜稅前售價依然要３﹒５萬美元（約２７﹒３萬港元），阿臣都仲要加把勁儲錢。　　有報道話，自從波叔當上財爺大削電動車稅務寬減之後，一部Ｔｅｓｌａ　Ｍｏｄｅｌ　Ｓ售價就由５９萬大增到稅後上百萬，搞到４月已經冇港人幫襯Ｔｅｓｌａ，５月最多亦只能夠賣出５部。相對於法國計劃２０４０年前全面取締汽油柴油車，吉利控股旗下瑞典車廠Ｖｏｌｖｏ亦決定轉型，兩年後只出產純電動同混能車，港府卻大開倒車，對環保同創新嘅支持可見一斑。

＊電動車世界潮流浩浩蕩蕩，順之者昌＊

　　無論如何，電動車將係大勢所趨，雖然愈嚟愈多傳統車行加入競爭，但Ｔｅｓｌａ大力投資電池技術研發，主力改善電動車軟肋電池成本、續航力等問題，相信佢依然有一定嘅優勢。阿臣早輪提過有興趣試玩美股，Ｔｅｓｌａ跑車買唔起，惟有做個小股東支持吓啦。　　Ｔｅｓｌａ由高位３８０美金跌到近期３１０美金左右，古臣睇好佢有力再創高峰，於是都喺３１６美金時入市買咗兩股（當時美電造７﹒８１２９），手續費１３﹒８美金，總成本用咗古臣６４５﹒８美金，即大約５０４５﹒６港紙。所謂「唔好將所有蛋放晒同一個籃入面」，上回古臣原打算１７蚊樓下買神華（０１０８８），可惜掛盤未成交，今次就分散風險去花旗國孖屐投資啦！　　　　表列截至７月１２日止投資組合表現：　　

　　股份　　　　　股數　　　　　　　買入價　　　　　　現價　　　　　　　總值　　－－－－－－－－－－－－－－－－－－－－－－－－－－－－－－－－－－－－－－－－　　港股：　　長和　　　　５００股　　　　　９９﹒６元　　　　９９﹒３元　　　４９６５０元　

　　美股：　　Ｔｅｓｌａ　　　２股　　　　　３１６美元　３２７﹒２２美元　　６５４﹒４４美元　　　　　　　　　　　　　　　　　　　　　　　　　　　　　　　　＃（約５１１２港元）　　－－－－－－－－－－－－－－－－－－－－－－－－－－－－－－－－－－－－－－－－　　＃以美電７﹒８１１２計算

　　股票市值　：５４７６２元　　剩餘現金　：２１９３４元　　組合淨值　：７６６９６元

　　組合本月收益表現：＋　０﹒９％（截至上月底止組合淨值：７５９８０元）　　組合累計收益表現：＋１８﹒０％（本金６５０００元）（２０１６年８月開倉）

　　＊數據截至今日１１：３０ａｍ

etnet榮獲HKEX Awards 2023 「最佳表現證券數據供應商」大獎► 了解詳情