《古臣周記》長和（００００１）上星期放榜，中期多賺７％至１５９﹒２億，差過市場預期，即使有多間大行唱好，上周五（４日）股價都跌過最多近半成，之後幾日能夠企穩喺１０５銀水平徘徊。不過，阿臣依然堅持放長線釣大魚，睇好長和下半年業績繼續改善之餘，亦有信心「牛市」尚未告終，長和呢啲落後大藍籌仲有力再追。而且阿臣總覺得李超人遲早會出手「抬」股，好似長實（０１１１３）今年上半年已經動用近７０億銀回購股份，長建（０１０３８）就將每手拆細為５００股、降低入場門檻吸引散戶，為咗更反映股份價值，長和再推回購或者李超人學前年咁增持，亦未必出奇。

＊長和回購超人增持唔出奇＊

　　上星期四（３日）另一引人注目嘅，係「金融沙皇」任志剛出山寫文，抨擊政府過去１０年嘅「守財奴」政策。身屬「梁粉」嘅財爺波叔還擊呢位「行會同事」話文章冇新觀點不特止，仲竟然走去維護唔同陣營嘅前任財政司司長「薯片叔叔」，真係一地花生殼。不過，阿臣關注嘅並唔係政府有意大灑金錢，亦唔係波叔會唔會被架空，而係《基本法》已經變到可以任「釋」唔嬲。　　為咗一地兩檢，《基本法》第２０條「香港特別行政區可享有…中央人民政府授予的其他權力」變咗「唔要權力」；為開水喉，第１０７條「財政預算以量入為出為原則，力求收支平衡，避免赤字」由任志剛解讀成「『力求』不排除力有不逮，『避免』不代表不能發生」。廿年之間，《基本法》一字沒變，但內在意思早已經面目全非，難怪阿爺成日要求港人正確認識《基本法》，認識佢哋任意演繹嘅《基本法》也！　　記得任志剛多個月前講過「社會主義市場經濟比資本主義優勝」，看來《基本法》第５條：香港「保持原有的資本主義制度和生活方式，五十年不變」都有著落了，「不變」不代表「不能進步」嘛！

　　表列截至８月９日止投資組合表現：

　　股份　　　　　股數　　　　　買入價　　　　　　現價　　　　　　　總值　　－－－－－－－－－－－－－－－－－－－－－－－－－－－－－－－－－－－－－－－－　　港股：　　長和　　　　５００股　　　９９﹒６元　　１０５﹒００元　　　　５２５００元　

　　美股：　　Ｔｅｓｌａ　　　２股　　　３１６美元　　３６５﹒２２美元　　７３０﹒４４美元　　　　　　　　　　　　　　　　　　　　　　　　　　　　　　　＃（約５７１７港元）　　－－－－－－－－－－－－－－－－－－－－－－－－－－－－－－－－－－－－－－－－　　＃以美電７﹒８２６４計算

　　股票市值　：５８２１７元　　剩餘現金　：２１９３４元　　組合淨值　：８０１５１元

　　組合本月收益表現：＋　２﹒２％（截至上月底止組合淨值：７８４３６元）　　組合累計收益表現：＋２３﹒３％（本金６５０００元）（２０１６年８月開倉）

　　＊數據截至今日１１：４０ａｍ

etnet榮獲HKEX Awards 2023 「最佳表現證券數據供應商」大獎► 了解詳情