《楠楠自語》馬雲減持１０００萬股阿里巴巴ＡＤＳ，即８﹒７億美金，差唔多７０億港元，數目絕對唔少；加上之前軟銀透過期權合約減持阿里，可以減持第一次，就可能有第二次，如果繼續減持，肯定對於股價有負面影響。　　　派息肯定唔係好消息。如果一間公司有發展方向，可以自己投資新業務，點解要派息？證明阿里已經發展受限，變成另外一間中移動（００９４１），先需要增加派息吸引投資者。但問題係，阿里係科網企業，之前比幾十倍ＰＥ估值佢，如果變成公用股，就得１０倍。用呢個邏輯睇，依家絕對唔平，只能夠講係ｆａｉｒ　ｖａｌｕｅ。　　　之前話分拆，主要係國家終於整改完阿里金融同其他業務。大家以為整改完畢可以重新發展時，依家又話唔畀分拆。彈出彈入，投資者無所適從。　　　股價弱勢，公司又被監管綁手綁腳，業務又冇突破，點解要買呢？估值平唔係一個理由，都要睇資金偏好，市場畀低估值一定有原因。　　　森林好大，唔係只有一棵樹，不如睇少一隻，唔好嘥自己時間，等基本面好轉先慢慢重新留意。建議有貨而且虧損唔大嘅朋友，逐步換馬至其他股份；如果有陳年蟹貨，解套機會非常渺茫，自行處理啦。《南華證券高級分析師　莫灝楠》　＊《經濟通》所刊的署名及╱或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【6月限時優惠】 送價值$175維柏健明目藍莓精華36:1► 火速行動