《小傳日記》真係「一波未平，一波又起」，恐襲都仲未搞掂，點知土耳其噚晚竟然擊落俄羅斯戰機；土耳其話俄戰機進入土國領空，多次警告無效，決定發炮擊落。噚晚（２４日）外圍市曾經震一震，但之後又好似乜嘢事都冇發生過，花旗國魚缸微微收升報１７８１２，今日（２５日）Ａ場尾市仲反擊抽高近１巴仙收３６４７點，兩地缸友果然見慣大場面。　　反而香江就有大件事發生！李超人旗下電能（００００６）同長建（０１０３８）世紀重組方案觸礁，唔多唔少都影響缸內氣氛；加上一班中資股都無厘生氣，恆指埋單碌低８９點收２２４９８，國指唔見２８點收１０１２７。成交繼續靜繩繩，只得６４８億銀左右。

＊電能與長建合併遭否決，復牌微微軟大行畀足面＊

　　世事無絕對，之前打算合併嘅電能同長建今日復賽，但就為缸友帶來一個失望嘅消息，就係合併方案遭到否決。贊成合併嘅得五成票數，唔夠七成五，加上反對票數又多過一成，所以合併方案最後「肥佬」，公司亦都唔會派發特別息。　　不過見慣風浪嘅超人今朝離開大宅時仲係笑笑口，賓架們亦都無乘機踩幾腳，反而都出來畀好評為缸友打強心針！大和雖然削電能目標價到７０﹒５銀，但仍然覺得電能可能會派大量股息。至於瑞信同德銀都睇好公司，認為合併失敗影響溫和咁話。結果電能同長建兩者一開波雖然被質落嚟，但係最後跌幅都愈收愈窄，前者最終跣低３巴仙，報７０﹒５５銀，而長建就無咗唔夠１巴仙，報６８﹒８銀。同系嘅長和（００００１）同長實（０１１１３）就分別跌唔夠１巴仙同逾１巴仙。

＊地緣忽緊張油價急急漲，油股與金股拍住齊齊上＊

　　「火雞國」土耳其突然擊落俄羅斯戰機，令全球震驚，中東有事油價就彈，中海油（００８８３）反應最大，跳上３巴仙，報８﹒８１銀，其他藍戰士望塵莫及；中石油（００８５７）就微微漲１巴仙，報５﹒７３銀，中石化（００３８６）獨自惆悵，走低不足１巴仙，報４﹒９４銀。　　缸友好擔憂中東繼續擦槍走火，又要避險儲黃金，招金（０１８１８）跑前３巴仙，報４﹒３３銀，中國黃金（０２０９９）同中國白銀（００８１５）就分別走上４巴仙同２巴仙。　　軟件街坊今日心情靚，金軟（３８８８）走上超過２巴仙，收報２１﹒２銀，佢由上周二（１７日）放榜之後就好開心，到依家為止累計升幅已經到１８巴仙！金蝶（００２６８）表現最好，跑前４巴仙，報４﹒０１銀。之不過，創新支付（０８０８３）前日（２３日）升得太勁，上日吐完６巴仙，今日再嘔多３巴仙，升幅已經全銷，走勢還原基本步，報０﹒４６５銀。

＊信証急澄清果然夠精靈，電池叉足電有貨確係醒＊

　　中信証券（０６０３０）高管被調查風波，亦都係「一波未平，一波又起」。探子回報，今年４月到９月，公司計虛增互換業務規模達到１萬億人仔。公司就解畫話只係「報訊錯誤」，結果股價由跌變升，瑞信仲叫人增持添；股價最終就有近１巴仙升幅埋單，收報１９﹒０４銀。街坊中州證券（０１３７５）就有逾６巴仙進賬，收報４﹒７９銀。　　特斯拉中國區公司宣布，特斯拉喺亞太地區嘅超級充電站已經突破咗１００座，公共充電網絡喺神州布點上已經實現南北貫通。同時神州方面多個部門已經研究制定機器人產品同關鍵零部件認證制度，消息一出令到電池股充晒電，升幅嘭嘭聲！理士國際（００８４２）同早前想分拆子公司上市嘅天能動力（００８１９）爆起兩成同逾３巴仙，泰坦能源（０２１８８）都有５巴仙進帳，報２﹒０９銀。

＊股仔大上落升跌輕瞬間，中奧新登場潛水唔多盞＊

　　細股走勢一向都好似坐過山車，今日Ｆｏｃｕｓ　Ｍｅｄｉａ（０８１１２）就鬼死咁刺激，皆因大股東話唔想再玩，打算散貨沽走大半數股權，開市就抽高一成三，但下午突然見到兩手超大額成交，合共１﹒４６億股，同大股東打算出售嘅股數相符，莫非真係轉咗手？消息一出又即刻衝上２３巴仙；不過劇情仲未完噃，Ｆｏｃｕｓ登頂後即刻碌落山，最後倒跌４巴仙，報０﹒７５銀，呢啲仲唔係叫「割禾青」？！　　至卓國際（０２３２３）主席亦宣布要賣盤，一復牌就急急向下瀉，最低試過唔見超過三成，最終跌咗２９巴仙，報０﹒８２銀；中生製藥（０１１７７）早前派成績表，表現唔錯，績後第三日依然有運行，再爬上４巴仙，報７﹒４８銀，是日曾經上過７﹒５７銀，創埋上市新高。　　新丁中奧到家（０１５３８）首日出征，開市就報２﹒０８銀，只係比招股價１﹒８８銀高出一成，收市就得番１﹒８７銀，低過招股價，睇嚟缸友對呢位新丁暫時興趣麻麻。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

etnet榮獲HKEX Awards 2023 「最佳表現證券數據供應商」大獎► 了解詳情