《小傳日記》花旗國聯儲局主席耶倫上周五（２６日）喺Ｊａｃｋｓｏｎ　Ｈｏｌｅ會上開金口，講明近月加息理據增強咗，但亦強調會循序漸進。孖屐視耶倫呢番講話屬「鷹」派，增加咗對下月加息嘅憂慮，亦令到嚟緊星期五（２日）公布嘅非農就業數據更受矚目。　　　除咗加息憧憬升溫之外，聽日（３０日）就係期指結算。今日魚缸變化唔大，除咗早段輕微行高過ＤＤ外，大部分時間都係玩浮潛，恆指完賽嘔咗８８點，收報２２８２１點；國貨佬亦碌低５２點，收報９４９７銀。期指結算前，觀望氣氛較濃，睇嚟缸友都怕企錯邊，主板成交５４１億銀，同上周五差唔多。好友呢排已經撐住魚缸一段時間，開始露出無力感；估計撐埋期指結算日會開始休息，回調整固似乎已不遠矣！

＊周五美非農大家要昅實，成交靜蠅蠅好友有所失＊

　　瑞聲科技（０２０１８）上周五中午派成績表，摩通、德銀、大和等一眾大行都要畀個大拇指，調升目標價，再加上即將晉身藍戰士，今日興奮落場，全日揚起超過半成，報８６﹒４銀，創埋新高。街坊舜宇光學（０２３８２）同樣好激動，一度爬升超過３巴仙破頂，可惜後勁不繼，升幅縮回至唔夠１巴仙，報４０﹒４銀。至於科網大佬ＱＱ（００７００）陪行前唔夠１巴仙，埋單報２０１﹒４銀。　　花旗國儲局主席耶倫公開放「鷹，香江一眾磚頭個心都要離一離！恆地（０００１２）軟咗近１巴仙，長實（０１１１３）跣」低逾１巴仙，而表現最差係信置（０００８３）趴低近３巴仙，報１３﹒０４銀。

＊瑞聲未放榜粉絲已興奮，加息似升溫地主震一震＊

　　電動砵砵車比亞迪（０１２１１）半年賺近２３億人仔急增近４倍，仲發埋盈喜料首三季最少多賺近８３巴仙。成績省鏡，大行亦出嚟祝賀，其中瑞信就升「他屐」至８３銀，維持「優於大市」。比亞迪績後充滿電力，跑前逾２巴仙，收報５２﹒２５銀。可惜囝囝比亞迪電子（００２８５）中期雖然多賺３２巴仙至６億人仔，但瑞信就話得差過預期，搞到比亞迪電子碌低近６巴仙，收報６﹒１１銀，認真陰功！　　永利（０１１２８）旗下新賭場得１５０張新批賭枱，大和認為遠遜預期，呼籲股東拉隊離場。永利全日趴低咗近４巴仙，收報１１﹒０８銀。除咗永利外，金沙（０１９２８）亦遭大和唱淡叫走人，全日蒸發逾２巴仙，收報２９﹒９５銀。銀娛（０００２７）更失落近４巴仙，收報２５﹒４５銀，係最差藍戰士。噢！　　＊比亞迪超靚囝囝唔多靚，大和來唱淡濠賭齊被掟＊

　　中石化（００３８６）中期賺少咗２２巴仙至１９９億人仔。瑞信認為好過預期，仲升「他屐」至５﹒９銀，評級就「中性」。可惜中石化未能借機炒上，輕微走低０﹒２巴仙，收報５﹒６１銀。　　國銀租賃（０１６０６）半年多賺９巴仙至１１億銀，今朝更錄得逾５億銀市前交易。開賽後，國銀租賃試過衝高近１３巴仙至２﹒１９銀，收市埋單漲約３巴仙，收報２銀。　　Ｐｒａｄａ（０１９１３）半年少賺近２５巴仙至１﹒４億歐元，但已好過孖屐預期嘅１﹒３億歐元。Ｐｒａｄａ輕微低開後，起勢咁追，最尾有近１２巴仙進，收報２４﹒３５銀，後勁相當凌厲！　　華鼎（０３３９８）半年多賺９倍至５６２４萬銀，連埋特息合共派１﹒８８仙。華鼎打破過去兩年無派息悶局，全日飆高逾４４巴仙，收報０﹒５２銀，係最叻仔魚仔。　

＊普拉達抽上２９８亦漲，華鼎派得爽缸邊兜番轉＊

　　莊士中國（００２９８）向碧桂園（０２００７）出售東莞商住物業發展項目，預計可以大賺１２﹒４億銀。要知道莊士中國上年都只不過賺咗８５０１萬銀，今次出售完成，足足係舊年純利嘅１４倍！缸友齊齊拍拍手，莊士中國飆高近１７巴仙至０﹒４８５銀；阿媽莊士國際（００３６７）一樣跳高近７巴仙至１﹒６２銀。至於碧桂園就踏前近半成，報３﹒８５銀。　　翠華（０１３１４）啟動股權爭奪戰，事關創辦人之間對賣盤意見不一，結果分歧愈演愈烈。喺股東會投票嗰陣，其中兩名創辦人被踢出董事局，仲有可能鬧上法庭，好似成套電視劇咁！缸友見勢色唔對，擔心翠華賣盤夢碎，快快散貨走人，翠華全日倒退逾６巴仙，報１﹒５９銀。　　恆和（００５１３）之前傳向中資出售旗下中環商廈，代價達１０億銀，令公司身價暴漲。公司澄清的確傾緊出售中環商廈，但潛在買家就唔係中資！缸友趁消息套現離場，恆和復賽跣低近９巴仙，收市報０﹒１５３銀。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

全新節目《說說心理話》青少年不可以戀愛！？真實個案講述驚心動魄經歷► 即睇