《古臣周記》面對花旗國喺貿易上連番打壓，神州都積極尋求盟友聯手抗衡，上星期開放外資投資限制拉攏德國，之後仲喺北京舉行第２０次中國歐盟領導人會晤，會後發表聯合聲明，強調中歐將加強全球層面夥伴關係，提高貿易投資自由化及便利化，抵制保護主義與單邊主義。環球經濟唔會靜止不動，因此投資者亦要適應轉變，以探索股市將會如何發展。

＊內地經濟增長放緩，貿易戰影響漸浮現＊

　　全球經濟增長因為貿易戰而大受影響，早前神州公布第二季經濟增長放緩，第二季國內生產總值（ＧＤＰ）按年增長６﹒７巴仙，係自２０１６年第三季以來，增速最慢嘅一季，符合大家嘅預期。今年上半年，神州國內生產總值４１﹒９萬億元人仔，按年增長６﹒８巴仙。數據顯示內地經濟轉弱，此外，內地地產對舊經濟支撐力度正在轉弱，而支撐來自於新產業、新產品、新消費等新經濟部門，所以中國仲係處於結構轉型當中，而數據暫時未反映晒貿易戰對中國經濟增長全部嘅影響，所以未來中國經濟增長亦難以說得上可以加快。　　分產業統計，第一產業增加值２﹒２１萬億人仔，按年增長３﹒２巴仙；第二產業增加值１６﹒９３萬億人仔，增長６﹒１巴仙；第三產業增加值２２﹒７６萬億人仔，增長７﹒６巴仙。亦即係話，神州經濟結構繼續由第三產業，即非製造業推進，未來選股，呢點有參考價值。

＊粵投本周高見１４銀，吼實碧桂園服務＊

　　上星期提及嘅粵海投資（００２７０），由於股價上星期都無跌到落１２﹒５蚊，所以最後交易成交唔到。今星期粵投一度飛起高見１４銀，現階段就惟有將買入價上調至１３銀，睇下成唔成交到。　　ＱＱ（００７００）被中金降目標價到５０２銀，股價近來不停受壓，今年低位３７３﹒４銀亦似危危乎。為咗減低騰訊下跌對倉位造成嘅影響，阿臣決定加多隻近期資金樂於追逐嘅物管股碧桂園服務（０６０９８），該股最近突破１２蚊水平開始升勢，阿臣初步嘗試以１２﹒５銀買入２０００股，希望為組合帶來一點正回報。

　　表列截至７月１８日（１１：１５ａｍ止）投資組合表現：

　　股份　　　　　　股數　　　　　平均買入價　　　　　現價　　　　　　　總值　　－－－－－－－－－－－－－－－－－－－－－－－－－－－－－－－－－－－－－－－－　　港股：　　騰訊　　　　　１００股　　３６２﹒００元　　　３７９﹒２０元　　　３７９２０元　　寶勝　　　１００００股　　　　１﹒５６元　　　　　１﹒６１元　　　１６１００元　　－－－－－－－－－－－－－－－－－－－－－－－－－－－－－－－－－－－－－－－－　　　　股票市值　　　　　　：　　５４０２０元　　剩餘現金　　　　　　：　１０３６５７元　　組合淨值　　　　　　：　１５７６７７元

　　組合本月收益表現：　－　　０﹒２％（截至上月底止組合淨值：１５８０３７元）　　組合累計收益表現：　＋　５０﹒２％（本金１０５０００元計）（２０１６年８月開倉）

　　＊數據截至今日１１：１５ａｍ

etnet榮獲HKEX Awards 2023 「最佳表現證券數據供應商」大獎► 了解詳情