《小傳日記》花旗國非製造業數據按月回升好過預期，「小非農」ＡＤＰ５月私人市場職位少咗２７６萬個，反映失業情況緩和緊，抵銷示威嘅負面影響，隔晚美股三大指數報喜。香江魚缸就高開３１８點，報２４６４３點，但已經係全日最高位。魚缸始終連升三日，今日明顯唔係幾夠力，傳沙特唔打算每日再額外自願減產１１８萬桶，油佬有回吐，本地磚頭佬都偏軟，表現比較好嘅有賭仔，話憧憬馬交放寬入境限制喎。魚缸最低跌１２１點見２４２０４點。全日走勢上下爭持，喺ＱＱ（００７００）同ＡＩＡ（０１２９９）嘅助力下，臨收市先抽番上少少，收報２４３６６點，跳高４０點或０﹒１７％，主板成交１２５４﹒１１億銀少一成。國指報９９６７點，微升０﹒４點。　　部份重磅藍戰士連跳幾日，係時候唞唞，生發發（００３８８）同建行（００９３９）軟兩格，報２９２銀同６﹒３４銀；中移動（００９４１）唔見近１巴仙，報５４﹒５銀。股王ＱＱ已經連彈第五日，今日踼高近１巴仙，報４３５銀；ＡＩＡ跳三格，報７１銀。　　Ａ場個別發展，上證綜指收報２９１９點，滑４點，深證成指報１１１３９點，跳３０點，總成交６５０６﹒７１億人仔少１６巴仙。

＊港銀齊表態大象有人買；憧憬關快開賭佬唔悲哀＊

　　之前全國政協副主席梁振英攻擊本地錢莊大象（００００５）無就港版國安法表態，尋日大象同渣打（０２８８８）就齊齊發聲撐立法有助維持香江長遠穩定，大象全日彈高近２巴仙，報３８﹒８５銀；渣打亦起哄逾４巴仙，報４１﹒５銀，睇嚟外資行以後面對政治議題，要再敏感啲先得啦。而有「聯滙之父」之稱嘅景順首席經濟師祈連活話，花旗國好難攻擊聯滙制度，小象（０００１１）表現曳啲，跌兩格，報１２４﹒３銀；東亞（０００２３）走高近１巴仙，報１７﹒４４銀；中銀香江（０２３８８）揚近１巴仙，報２３﹒７銀。　　憧憬馬交短期放寬入境限制，加上孖屐預期馬交上月博彩收入按年跌幅會收窄到六至七成，馬交佬今日表現雀躍。金沙（０１９２８）抽高近半成，報３２﹒３銀，仲係最佳表現藍戰士；永利（０１１２８）升近６巴仙，報１４﹒２銀；銀娛（０００２７）揚逾２巴仙，報５６銀；新濠國際（００２００）起哄近６巴仙，報１６﹒６８銀；澳博（００８８０）漲近３巴仙，報９﹒３１銀；美高梅（０２２８２）踢高近４巴仙，報９﹒８１銀。　＊地攤潮火熱啤酒佬熱烈，花旗國反制鐵鳥唔閉翳＊

　　神州國務院總理李克強撐完「地攤經濟」係神州生機之後，上海就發起首屆上海夜生活節贈慶，內需佬尤其係相關概念股都繼續情緒高漲。啤酒佬最鍾意夜生活，當然齊齊叫好，青島啤酒（００１６８）急漲逾３巴仙，報５７銀；潤啤（００２９１）飆近４巴仙，報４５﹒６５銀兼破頂；百威亞太（０１８７６）續升近３巴仙，報２５﹒５銀；五菱汽車（００３０５）推售「地攤神車」，銷售公司電話畀人ｃａｌｌ爆，踢高近六成四，報０﹒５銀，係全日最大升幅魚毛。　　花旗國宣布，由今個月１６號起禁止神州鐵鳥公司嘅航班飛往花旗國，作為報復神州唔比花旗國鐵鳥公司飛神州，但之後神州放軟姿態，下周一（８日）起放寬外國鐵鳥公司國際航班入境。鐵鳥齊齊有得飛，東航（００６７０）揚近２巴仙，報２﹒８６銀；南航（０１０５５）升近１巴仙，報３﹒４５銀；國航（００７５３）升近半巴仙，報４﹒９８銀；屐飛（００２９３）漲逾２巴仙，報８﹒４４銀。

＊手機出貨減中興跌得慘，生豬價格漲豬肉股價上＊

　　市場研究ＩＤＣ出報告話，受到新冠肺炎疫情拖累，今年全球智能手機出貨量會按年無咗近一成二，仲話相信出年首季之前都唔會回復增長。聽到銷售成績咁差，手機佬都無曬精神，瑞聲（０２０１８）跌低１巴仙，報４１﹒７５銀；中興（００７６３）插水逾２巴仙，報２１﹒５銀；高偉電子（０１４１５）瀉近３巴仙，報１﹒５６銀；比亞迪電子（００２８５）都軟半巴仙，報１５﹒７２銀。不過舜宇（０２３８２）彈起１巴仙，報１０９﹒９銀。　　神州統計局數據顯示，５月下旬生豬價格為每千克２９﹒４銀人仔，與５月中相比升近半成。部分豬肉佬即時彈起，中糧肉食（０１６１０）今日除息，重越牛熊線（２﹒３６銀）高見２﹒４５銀，收市都鏟高近一成二，報２﹒３８銀。花旗話，萬洲國際（００２８８）管理層預計第二季美國相對較高嘅豬肉價格，有利盈利增長，重申買入評級，萬洲收跳近３巴仙，報６﹒８銀。而雨潤食品（０１０６８）同惠生國際（０１３４０）就分別逆市插低１巴仙同近２巴仙，分別報０﹒４９５銀同０﹒０６１銀。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

etnet榮獲HKEX Awards 2023 「最佳表現證券數據供應商」大獎► 了解詳情