《小傳日記》噚晚（１６日）花旗魚缸升高１７５點，今朝香江魚缸隨即高開１０３點，但上午未食飯比較腳軟，曾經試過輕微倒跌。中午全國人大委員長張德江抵港，午後恆指有Ｄ起色，重上兩萬關口，最高見２０１４５，唔通又炒「深港通」嘅消息？恆指全日彈高２３４點或１﹒２巴仙，收報２０１１８點，咁啱掂住條十天線收市。　　Ａ仔埸跌７點報２８４３點，國貨佬行前１１３點或１﹒４巴仙，報８４２５點。今日主板成交約５９４億銀，比噚日多半成。

＊油價高高收花旗市豐收，恆指漲二百淡友掉頭走＊

　　油價衝到半年高位，連唱淡石油嘅高恅都開始改口，石油佬今日開晒香檳。昆能（００１３５）彈上接近４巴仙報６﹒１５銀，中海油（００８８３）緊接其後，跑前超過３巴仙報９﹒２３銀，至於中石油（００８５７）同中石化（００３８６）都升咗超過２巴仙。　　油股街坊都有新搞作，南海石油（０００７６）同馬達加斯加公司合作，可以用友情價買入石墨礦石，航空同煉鋼鐵會用到石墨，缸友拍爛手掌，南海石油彈高逾２５巴仙，收報０﹒１２４銀。至於安東油服（０３３３７）喺伊拉克嘅油田服務獲得深圳上市公司惠博普科技（深：００２５５４）買入四成股權，全日大步跨前超過９巴仙，報０﹒７２銀。

＊生發發券商齊齊跳隻舞，再炒深港通缸邊來尋寶＊

　　委員長訪港，缸友都好希望從佢口中聽到「深港通」呢三個字！生發發（００３８８）好興奮，前移近２巴仙，報１８２﹒９銀。券商佬同樣亦唔執輸，銀證（０６８８１）跑前逾３巴仙，報６﹒５銀，海通證券（０６８３７）、廣發証券（０１７７６）同中信証券（０６０３０）都爬上１至２巴仙。　　中州證券（０１３７５）因為盈利大跌，畀匯證削完評級削目標，獨自垂淚，全日插近半成，報３﹒２４銀。國聯證券（０１４５６）打算Ａ場ＩＰＯ，升唔夠１巴仙，報４﹒０８銀。

＊港銀忽炒上寶哥哥最靚，ＱＱ明放榜今天繼續正＊

　　大隻佬ＱＱ（００７００）聽日派成績，獲多間大行唱好，收入有機會按年飛躍！ＱＱ今日再行前近２巴仙，報１６２﹒９銀。　　另一大隻佬長和（００００１）派１﹒８５銀股息同埋長實（０１１１３）股息１﹒０５銀，都係聽日除淨，分別升近１巴仙同超過１巴仙，報９１﹒９５銀同４６﹒３５銀。　　港銀尾市突然見買盤追入，最巴閉係東亞（０００２３），急彈近５巴仙，收報２８﹒４銀，做咗今日最叻藍戰士；大笨象（００００５）都唔執輸，跑前近３巴仙，埋單４９﹒２銀；渣打（０２８８８）、中銀（０２３８８）同恆生（０００１１）都有約２％升幅。

＊國航數據佳飛高來慶祝，壽仔與平仔一點也不木＊

　　雖然油價向上，但鐵鳥都普遍有得向上飛，國航（００７５３）４月乘客人數去到８０３萬人次，按年多近９巴仙，國航飛高２巴仙，埋單５﹒７４銀；南航（０１０５５）亦都衝高２巴仙，報４﹒９３銀。國泰（００２９３）４月載客微跌０﹒１巴仙至２３１萬人次，結果股價偏軟唔夠半個巴仙，報１２﹒２２銀。　　國壽（０２６２８）頭４月原保險保費收入２２３６億人仔，年增２９巴仙，支持股價踢高２巴仙，報１６﹒８銀。平保（０２３１８）獲瑞信唱好，亦有１巴仙升幅，報３４蚊。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

全新節目《說說心理話》青少年不可以戀愛！？真實個案講述驚心動魄經歷► 即睇