《小傳日記》花旗國揸Ｆｉｔ人侵侵公布咗任內第一個全面預算計劃，基本上都符合預期，當地魚缸都平穩收升ＤＤ完場。香江呢邊就好狼狽，講緊嘅係今朝缸外傾盆大雨，有遮都等於無遮，黃紅黑暴雨警告出齊，不過魚缸就無受影響，繼續開市做生意。　　今朝（２４日）紅雨未開市前，評級機構穆迪出手，將祖國評級由Ａａ３下調至Ａ１評級，好彩對香江唔係有太大影響，恆指只係象徵式瞓低２０點，之後就喺２５４００水平窄幅上落，埋單悶升２５點報２５４２８，但都係全日最高位喇；部分內房佬雖然有鑊氣，不過國指喺中資金融佬回吐下，收市都要微跌４點收１０３９０。　　缸外滂沱大雨，缸友都無心機入市，全日成交少咗１７巴仙至７０１億銀。再數一數手指，５月份只係剩番四個交易日，暫時無特別大利淡消息之下，今個５月好大機會「不會窮」吧！　＊黑雨高高掛成交略嫌差，ＱＱ要唞唞劇飛誇啦啦＊　　　股王ＱＱ（００７００）今年真係行大運，由年初１８０銀左右，一路升到去最高２８０﹒６銀歷史新高，累積升幅竟然超過五成。ＱＱ已經係超級巨無霸，仲可以大踏步上升，真難以置信！升咗咁耐，開始有「空軍」攻擊，都正常不過。ＱＱ噚日沽空比率就升到去近１０個月高位，難怪今日都要行低ＤＤ巴仙收２７３﹒６銀。不過都仲力守十天線（約２６４﹒３３銀），強！　　劇飛（００２９３）派完第一輪「無情雞」之後，高盛出手升評級同目標價，雖然只係調高到去中性，同升至１０﹒９銀，仲低過現價；但係高佬係改口風，就等於打咗支強心針，劇飛當然乘勢高飛６巴仙收１２﹒１８銀喇。　＊缸邊吼落後聯通發力追，中移呆呆滯一號型英帥＊　　　魚缸仲未擺脫整固局面，繼續炒股唔炒市，中資電訊佬就趁機會追落後，當中聯通（００７６２）噚日已經喺瑞信祝福下跑咗出嚟，今日阿爺講多句，話混改順利實施，再承勢跳起逾４巴仙收１１﹒２２銀，短短兩日就已經衝高逾８巴仙喇。街坊就無咁叻，中電信（００７２８）只係行前１巴仙，中移動（００９４１）仲要企定定添。　　香江就有超人１號仔（００００１）做代表，喺悶市當中仍受粉絲歡迎，今日逆市跳起逾１巴仙收１０１﹒７銀，最高仲去到１０２銀創１８個月高位添！　　＊摩笛吹一吹恆大多人追，街坊有榮焉無貨我心碎＊　　　恆大（０３３３３）獲大摩唱好，首予「增持」評級，「他屐」１２銀，話如果第二輪策略投資達到３００億人仔目標的話，更有進一步上升空間。恆大應聲飆高逾１７巴仙，埋單１１﹒６６銀破頂。　　恆大升到咁勁，帶旺其他內房佬開Ｐａｒｔｙ，無懼有傳阿爺會將房地產信託業務納入今年檢查要點，若然繼續收緊房地產融資，神州磚頭佬或者會逼住減價加快銷售。碧桂園（０２００７）、中海外（００６８８）衝前逾３同１巴仙，報８﹒２５同２２﹒７５銀。融創中國（０１９１８）末期息２５﹒７分人仔今日除淨，結果亦彈高近７巴仙，報１２﹒０６銀。龍湖地產（００９６０）都唔執輸，飛起近９巴仙，收１４﹒８２銀，仲創過歷史新高１４﹒９２銀！　＊阿爺錫煤炭愈細粒愈肥？炒股唔炒市股仔禾雀飛＊　　　神州有風聲話，發改委諗緊再進一步將煤炭質量嘅檢測標準「升呢」，講到尾都係想限制煤炭進口。神華（０１０８８）雖然係神州煤炭一哥，而且仲要有野村第一次比佢買入評級，「他屐」２１﹒９４銀，但今日竟然唔夠Ｄ細價煤炭佬跑，全日都喺升咗１巴仙多Ｄ，報１９﹒３２銀。細細粒嘅恆鼎實業（０１３９３）就爆升咗近兩成。弘海高新（０００６５）繼上周五爆升８８巴仙後今日又嚟料，升咗超過一成半。　　魚缸大粒佬炒得差唔多，缸友將目標轉移到細價股，所以今日唔少細價股都炒到禾雀亂飛，升幅榜頭７位的股份１蚊都冇，德泰新能源（００５５９）搶先出閘，升超過三成；銳康藥業（０８０３７）升超過兩成半；新華通訊（００３０９）升超過２２巴仙。缸友買中晒呢三隻，真係同中三Ｔ一樣咁開心。請請！　　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

etnet榮獲HKEX Awards 2023 「最佳表現證券數據供應商」大獎► 了解詳情