《小傳日記》噚晚花旗國（１６日）終於回復平靜，輕輕碌低２４點散場，無驚無險又一天。香江缸友嘛，今日就梗係全神貫徹注中證監喺三點半嘅記者會啦！　　今朝生發發（００３８８）ＣＥＯ李小加重申，「滬港通」預備工作已到位，曾刺激魚缸衝高，最多２４８點見２３１４８。點知之後又補多句「未有開通時間表」，空歡喜一場之下，缸友即刻鳴金收兵，魚缸升幅頓時大縮水。　　當記者會三點半開波後，魚缸簡直係「未宣布，先興奮」，收市前十分鐘成交仲明顯多左，全日約有７２６億銀。但等了又等，都仲係無消息。這邊廂四點鐘許Ｓｉｒ出場，遠方嘅記者會亦宣告結束，但「通車日期」仍然係無聲氣，缸友都大失所望…　　恆指最終只踢高１２２點以２３０２３完場，國貨佬就只升４８點收１０２３４。　　　　＊等呀等呀等等到天氣涼，滬港準備好奈何仍要等＊

　　當全城都等緊通車消息之際，濠賭股今次靠自己實力，成功突圍而出，嚟個「殘股大翻身」！話說金沙（０１９２８）下星期二（２１日）先正式喺香江派成績表，但媽咪喺海外已經率先放榜，仲披露埋金沙份成績表，結果無令缸友失望；第三季多賺逾４巴仙至６﹒４５億美金，不過股價就無咩反應，呆呆滯滯收場。所謂「希望在明天」，今日喺花旗、美銀美林兩大行力撐下，金沙就以約１４億銀大成交彈高４﹒６巴仙，收４４﹒５銀。勁！　　金沙成績省鏡，缸友梗係憧憬其他街坊都有唔錯表現啦，一於趁低入定貨等反彈。另一藍戰士銀娛（０００２７）同永利澳門（０１１２８）都好叻，齊齊踢高逾４巴仙添。

＊金沙成績靚街坊也搶鏡，雨過天漸青康師傅反彈＊

　　濠賭股黑仔咗咁耐，終於有出頭天，忠心粉絲當然安慰。另邊廂，被「黑心油」搞到頭痕嘅康師傅（００３２２），喺多番澄清下，噚日股價終於有番啲起色。今日再加埋瑞銀出報告，話其實連阿爺都幫手澄清話康師傅無涉及黑心油事件，叫缸友唔怕趁低入貨，仲繼續睇２６﹒１銀不變。結果，康師傅暫時雨過天青，收市又反彈番逾４巴仙收１９﹒５８銀，連升兩日兼向十天線（約１９﹒８４４銀）進發。　　反而，重磅藍戰士友邦（０１２９９），明明第三季新業務價值又創新高，增長２３巴仙至４﹒６８億美金，仲有大摩支持上望４９蚊。點知股價反高潮，差唔多由頭跌到落尾，埋單碌低近１巴仙收４１﹒１銀，認真奇怪。　　＊友邦成績靚來估反高漸，油價終反彈中海油起舞＊　　　原來不知不覺，隨著油價一路向下跌，中海油（００８８３）由９月初到噚日，股價已蒸發咗逾２２巴仙，傷勢都唔輕。好彩噚晚油價終於見反彈，中海油今朝一開賽就起勢追落，完場衝高近４巴仙收１２﹒４６銀，做咗第四名最威水藍戰士。　　至於等通車等到頸都長嘅生發發，喺臨完場前明顯有追捧，下半場開市無耐亦發力衝番上嚟，收報１７３﹒７銀升近１巴仙！不過喺收市前，阿爺都仲未有確實答案，而李小加又加多句話邊日通車都唔重要，叫缸友唔好過分解讀，搞到有Ｄ驚食「乍糊」嘅缸友，都選擇離場觀望，之前炒到癲嘅券商股都無咩人敢掃貨，第一上海（００２２７）都只升２巴仙，申銀（００２１８）就連１巴仙進帳都無。依家好消息落空，又要繼續等，上咗車嘅缸友都要坐穩啦…　＊券商輕踏前股仔鬧哄哄，港深聯狂飆微電力插水＊

　　細股世界就最天下太平，「你有你等，佢有佢炒」。睇番最大升幅榜表現，頭十名股份都炒高咗１２至近３７巴仙，當中有一半仲創埋逾５２周新高，熱鬧到不得了。居榜首嘅港深聯合（０８１８１）就宣布公司「揸Ｆｉｔ人」可能隨時易手，一復賽就就裂口爆升，收市飆３７巴仙報０﹒６７銀，強！　　不過，中國微電力（００１３９）就慘遭「洗倉」，下半場無啦啦暴瀉近４７巴仙收０﹒４７銀，成交仲急增至逾９３００萬銀，一支大陰燭瀉穿百天線（０﹒５１８銀），傷勢嚴重。假期愉快！請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式之　　　　　　　申述或訂立任何建議及推薦，讀者務請運用個人獨立思考能力自行作出投資決定　　　　　　　，如因相關建議招致損失，概與《經濟通》、編者及作者無涉。

etnet榮獲HKEX Awards 2023 「最佳表現證券數據供應商」大獎► 了解詳情