《小傳日記》當花旗魚缸噚晚（２３日）收跌８點報１７４９２，Ａ場又呆呆滯滯，微微碌低２１點之際，已可以想像到，今日香江魚缸可以有幾「熱鬧」呢！噚日已經只得約４３８億銀創咗今年新低，今日繼續悶市一場，離場觀戰，成交想唔低都難，全日加埋都係４４７億銀左右。　　睇番香江表現，今朝係咁易高開１８點報１９８２８，之後上下波幅都只得１１５點。悶足大半日，收市前１５分鐘，股王ＱＱ（００７００）同建行（００９３９）兩大重磅股頂住，成功幫恆指倒升２１點進帳收１９８３０，總算收復番失地，國指就軟１點收８３０６。　　個市陰乾陰乾，唔知係等緊花旗６月議息，定係等運到！望住近在咫尺嘅十天線（約１９８７１），好友們要加多把勁呀！

＊個市陰陰乾缸友真不爽，建主題公園濠賭向上闖＊

　　賓架匯證話賭場唔畀電話投注對賭仔影響已經弱咗，繼續睇好銀娛（０００２７）同美高梅（０２２８２），兩者踢起５巴仙同逾２巴仙，悶市之中變火箭，勁！銀娛早前話打算發展高科技樂園，正正符合馬交政府嘅發展策略。有消息話馬交想發展主題公園製造多啲非博彩收入，其實４月馬交入境旅客數目按年減少咗３巴仙，希望政府呢招真係有效啦！不過唔理成效點樣，賭仔街坊都好雀躍，金沙（０１９２８）、永利澳門（０１１２８）都有分別逾２巴仙同近４巴仙落袋。　　油價連跌４日，中石化（００３８６）同中石油（００８５７），分別跣低唔夠１巴仙同逾１巴仙，報５﹒０７銀同５﹒１３銀。賓架高盛就調高咗布蘭特期油均價預測，但都救唔到街坊中海油（００８８３），細摩將佢目標價降到９﹒５銀，今日股價唔見逾２巴仙，報８﹒８６銀。

＊超人亮亮相長和立即漲，油價連日跌海油最愁傷＊

　　誠哥之前因為腸胃炎，股東大會同神州高官歡迎晚宴都要缺席，噚日李嘉誠基金會官方微博ｐｏｓｔ咗一張誠哥開會嘅相，一眾關心超人身體嘅小股民都鬆一口氣，長和（００００１）就升近１巴仙慶祝下，報８８﹒７５銀，長實（０１１１３）噚日回購公司股份，踏前逾２巴仙贈慶，報４６﹒３銀；至於電能（００００６）同長建（０１０３８）就微微潛低。　　藍戰士聯想（００９９２）星期四（２６日）公布業績，大行評價有好有壞，瑞銀話中性，法巴話減持，瑞信就力撐話優於大市，總之股價仍然未有起色，收報４﹒８６銀，盤中見４﹒７５銀，再創近四年新低，慘慘！　　康師傅（００３２２）畀瑞信話估值仲係高，結果錄得五連跌，仲做埋表現最差藍戰士，倒退咗逾３巴仙，報７﹒６４銀。

＊師傅五連跌跌到心鬱結，中移搞固網也來齊齊跌＊

　　中移動（００９４１）進軍固網電話孖屐後，有分析擔心會令相關孖屐同業競爭更為激烈。中移動就被質低近１巴仙，收報８４﹒１銀。至於獲大行星展唯高達唱好叫「掃貨」嘅中電信（００７２８）亦都無咗逾２巴仙，收報３﹒６１銀。聯通（００７６２）同樣走唔甩，跣低近３巴仙，收報８﹒２１銀。　　海通證券（０６８３７）傳計劃籌組中美首隻文化產業基金，總規模料２００億人仔。受累Ａ場午後跌幅擴大咗，海通午後亦跌多咗，最尾唔見近１巴仙，收報１１﹒８銀。同行國泰君安（０１７８８）更蒸發逾５巴仙，收報２﹒２８銀。中信証券（０６０３０）同ＨＴＳＣ（０６８８６）就分別質低約１巴仙至近２巴仙。

＊霸王急反彈壹傳媒下挫，合一伸手牌粉絲沽之哉＊

　　立基（０８３６９）今日錄得共逾７２００萬銀大手，有機會係控股股東減持２４巴仙權益嘅交易。雖然控股股東減持，立基開市都試過升一倍，但臨尾只得２巴仙進帳，收報０﹒２５５銀。　　霸王（０１３３８）打官司，坊間有估計話用咗三至四千萬，減去由壹仔負責嘅八成訴訟費，都可能要成８００萬，再扣埋獲賠償３００萬，即係官司贏咗但都照蝕錢，認真陰功！好在股東呵返，股價踢高近１８巴仙，收報０﹒４６５銀。至於輸咗官司嘅壹傳媒（００２８２），則碌低逾４巴仙。　　合一（００９１３）大玩財技，五合一後一供二，淨籌約２﹒８億銀。股東似乎唔想供，急急離場累股價質低逾１６巴仙，收報０﹒０５２銀。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

全新節目《說說心理話》青少年不可以戀愛！？真實個案講述驚心動魄經歷► 即睇