《小傳日記》Ａ場噚日（２２日）放完悠長新年假復市，追落後紅盤高收，但都幫唔到香江魚缸噚日收低嘅命運。好彩，道指噚晚受惠加息憂慮紓緩，收市跳高１６４點收報２４９６２點，帶動香江魚缸今朝（２３日）都反彈３２３點高開報３１２８９，而祖國內銀佬終於有番Ｄ力氣，當中民行（０１９８８）衝高近４巴仙收８﹒６銀，勇奪最佳國指佬，招行（０３９６８）就有逾３巴仙進帳收３４﹒７５銀；祖國磚頭佬都發威，齊齊撐住大市，結果恆指收漲３０１點報３１２６７，國指就有２０６點升幅落袋，收報１２７３５。　　不過，要留意一點，呢排魚缸走勢都未係好穩，表面睇落升得起，都其實成交唔算配合，今日都只得１０３３億銀左右，好友都唔好掉以輕心，小心淡友趁機突襲呀！　＊ＱＱ續闖關大行畀個讚，玖紙將放榜升得十分爽＊　　　股王ＱＱ（００７００）噚日好淡爭持得相當激烈，全日北水買賣成交額高見約２２億銀，但淡友就贏個馬鼻，全日其實錄得淨沽出共１８２４萬。好彩，ＱＱ今日有麥格理送祝福，維持「跑贏大市」評級，消息刺激股價造好，全日仲開心跳高約２巴仙，報４５３﹒４銀。不過要留意，其實麥格理繼續睇４５０銀目標，低過ＱＱ現價架。　　東亞（０００２３）噚日放榜，全年多賺１﹒５倍，純利達９３億銀，好過孖屐預期，不過受大市限制升唔起！今日佢就隨市彈高，雖然大細摩同樣叫「拋貨」，但無阻佢跟市行前，收市都跳高約２巴仙，報３４﹒３５銀，真係恭喜晒！　　玖紙（０２６８９）下個禮拜一（２６日）放榜，而佢之前曾發盈喜，受惠佢產品售價增加，同埋利潤率都唔錯，因此預料半年純利較同期增長最少九成！缸友偷步入市，埋單時炒高約７巴仙，報１２﹒６８銀，唔知後市挑唔挑戰到月內高位１３﹒３４蚊呢？　＊修例招新丁生發發炒起，鈷概念未停新鑫也跟升＊　　　生發發（００３８８）收市後公布「新興及創新產業公司上市制度」諮詢文件，建議喺主板規則增加三個章節，分別落實生物科技、同股不同權，同埋新設便利第二上市渠道嘅建議，諮詢期雖然只得１個月，缸友都好應該踴躍畀意見。若落實新規制度，即係會有更多新丁掛牌，憧憬生發發生意愈做愈大，早前摩通就已經升他屐至３００銀，今日股價再飆前２巴仙，報２８５﹒８銀，唔知狗年生發發運數係咪真係咁強勁呢？　　全因為孖屐傳出，蘋果想直接向礦企購買電池材料鈷，消息持續發酵，唔少鈷概念股都先後炒起上嚟，新疆新鑫礦業（０３８３３）乘勢落鑊，飛上１９巴仙，報１﹒３４銀。噚日（２２日）炒起過嘅洛鉬（０３９９３），今日一度彈起逾３巴仙，最終亦有１巴仙落袋，報６﹒４２銀。金川國際（０２３６２）乘機衝前逾１巴仙，報１﹒７１銀。　＊安邦遭接管吳總被起訴，萬科照樣升街坊亦得勝＊　　　安邦保險集團原董事長、總經理吳小暉，涉嫌經濟犯罪，所以就被提起公訴，安邦仲畀中保監接管添。雖然係咁，好彩香江相關魚毛無受大影響，算係不幸中嘅大幸囉！其中，萬科（０２２０２）埋單時仍剷高約２巴仙，報３６﹒６銀。同時，佢仲畀野村升佢「他屐」添，由３２﹒５元至４４﹒７元，評級就畀「掃貨」。　　其他內房佬今日都好靚仔，碧桂園（０２００７）全日升約６巴仙，報１５﹒０４銀，仲係全日表現最好嘅藍戰士，勁！華潤置地（０１１０９）都升逾２巴仙，報２９﹒８５銀，盤中一度高見３０﹒２銀。　　另一邊廂，靜咗好耐嘅雄安區概念股落鑊，刺激一眾水泥佬走勢添，大阿哥海螺（００９１４）埋單時開心跳高約３巴仙，報４２﹒５銀；街坊中建材（０３３２３）亦跟升約５巴仙，埋單７﹒９６銀；金隅（０２００９）亦圍埋一齊開Ｐａｒｔｙ，收市時開心彈高約６巴仙，埋單３﹒９５銀，勁！　＊原生態報捷蒙牛反倒跌，熱炒半新丁ＤＣＢ攞Ａ＊　　　「手機設備孖寶」舜宇光學（０２３８２）同瑞聲科技（０２０１８），今日分別逆市跌２巴仙及１巴仙，分別收１２６銀及１５３﹒５銀，成為全日表現最差勁第一及第三位嘅藍戰士。　　　　蒙牛（０２３１９）就成為今日第２差藍戰士，倒跌唔見近２巴仙，報２６﹒０５銀。至於街坊消費股旺旺（００１５１）、康師傅（００３２２）表現就平淡Ｄ，靠穩報６﹒６８銀同１５﹒８６銀。原生態（０１４３１）搶晒焦點，飛起２０巴仙，報０﹒３９５銀！　　近日缸友似乎熱衷將錢放喺半新丁身上。彌明生活百貨（０８４７３）今日再飆逾一成，收報０﹒６８銀，比招親價０﹒２７銀高出１﹒５倍，彌明姐真係犀利呀！至於早前招親嘅歐化（０１７１１）亦都飛起近１８巴仙，報０﹒９９銀。　　不過，講到今日最勁嘅魚毛，ＤＣＢ（０８０４０）就搶晒風頭，一度彈起近八成，高見１﹒４６銀插旗，埋單亦有５７巴仙落袋，報１﹒２９銀，係第一大升攞Ａ嘅魚仔，神！　　周末愉快，請請！　　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

etnet榮獲HKEX Awards 2023 「最佳表現證券數據供應商」大獎► 了解詳情