《小傳日記》噚晚（２４號）花旗國魚缸因為啲魚毛業績表現向好，道指拗腰升逾百點。另一方面花旗國高層官員話好快就會再去神州，再進行面對面談判喎，雖然好似未有確實日期，但「孖屐」都已經收貨，香江魚缸今日（２５日）高開高走，開市起哄１１１點，報２８５７８，即時上返３十天線（約２８５２５點）同廿天線（約２８５２９點），之後喺騰訊（００７００）撐實之下仲不斷鏟高，一度高見２８７６４，踢高２９８點，破百天線（約２８６３４點），不過之後魚缸就開始無咁醒神，升幅不斷縮水，最終魚缸以全日較低位埋單，只踢高５７點，報２８５２４點，成交回升返近１７巴仙到６８７﹒５７億銀！　　Ａ場方面，上證指報２９２３點，升２３點或近１巴仙。深成指報９２６６點，升９０點或近１巴仙，兩市成交４００３億銀人仔。　　大隻藍戰士方面，約翰遜接任首相，米字國硬脫歐機會大增，但大象（００００５）都只係輕微仆低一格，報６４﹒７銀。生發發（００３８８）跣低６毫子，報２６６﹒８銀。騰訊喺知識產權法院勝訴，唔畀山小視頻、西瓜視頻、今日頭條以直播方式傳播旗下遊戲，加上將會引入任天堂最新遊戲平台Ｎｉｎｔｅｎｄｏ　Ｓｗｉｔｃｈ到神州，今日鏟高近２巴仙，報３６５﹒６銀。神州移動（００９４１）軟近１巴仙，報６８﹒６５銀。ＡＩＡ（０１２９９）都無咗近半巴仙，報８６﹒８銀。　　潤地（０１１０９）反彈鏟高近４巴仙，報３５﹒１５銀，係全日表現最好藍籌。中建材（０３３２３）畀野村睇好，認為表現或者會更強勁，不過最終剎車逾１巴仙，報７﹒０３銀，係全日表現最差國貨佬。　＊中興頭淡湯股價向上闖，換機周期近手機佬興奮＊　　　話說近期個個都爭出新機，先個輪華為話月尾推出新機規格，中興（００７６３）話唔執輸，要早你幾日出！缸友們見佢地爭崩頭咁款，所以係股價都落力咁炒，中興今日飛起逾２巴仙，報２３﹒５銀。另外小米（０１８１０）近日曾經失守過九蚊位，但呢兩日升返上去，全日收報漲進半巴仙，報９﹒１銀。聯想（００９９２）未有太大動靜，今日都係微跌半巴仙，報６﹒４銀。　　但手機佬見零售商個個爭出新機，表現比佢地更興奮，事關咁係代表出貨量可以提升啊嘛！舜宇（０２３８２）飆升逾３巴仙，報９３﹒４銀，叻！另一孖寶瑞聲（０２０１８）就弱弱地，先升後回挫半巴仙，報４４﹒４５銀。丘仔（０１４７８）有理無理升咗先講，今日都踢高近２巴仙，報７﹒９３銀。做電池嘅比亞迪電子（００２８５），見近期換機之餘，原材料價格都好似下跌，所以有追捧抽高近３巴仙，報１１﹒４６銀。代工商富智康（０２０３８）都跟氣氛抽升逾２巴仙，報０﹒８６銀。　＊砵砵車受捧東風缸友寵，中美有偈傾出口佬踢升＊　　　砵砵車今日跟住個市圍威喂，圈內人人都唔執輸，個個有收獲。東風（００４８９）就獲細摩增持，埋單踢高４巴仙，報７﹒２８銀，喺表現最好嘅國貨佬。廣汽（０２２３８）跳高３巴仙，報８﹒３５銀。吉利（００１７５）彈起３巴仙，報１２﹒４８銀。華晨（０１１１４）飛起２巴仙，報９﹒１３銀。北京汽車（０１９５８）再漲３巴仙，報５﹒３６銀。　　有坊間消息話，下星期神州同花旗國又再面對面傾貿易問題，有得再傾即係仲有機會傾掂數，出口佬本來朝早全部熱烈地唱和，就快埋單嗰時缸友縮沙，賺到錢就閃，令出口佬埋單表現各自走。創科（００６６９）跳高近３巴仙，報６１﹒２銀。耐世特（０１３１６）彈起３巴仙，報８﹒７銀。偉易達（００３０３）腳軟一格報６９﹒７５銀。敏實（００４２５）飛起３巴仙，報２４﹒４銀。申洲（０２３１３）衝高回吐近１巴仙，報１１１﹒９銀。　＊藥佬個別走中生要吐嘔，大行都話正安踏最省鏡＊　　　醫藥佬今日走兩極，普遍表現都麻麻。東陽光藥（０１５５８）雖然發盈喜，預期中期純利會按年多最少６０巴仙，但埋單都照仆低近８巴仙，報３９﹒９銀。康哲藥業（００８６７）彈唔夠半巴仙，報７﹒６３銀。石藥（０１０９３）微跳近１巴仙，報１３﹒３４銀。國藥（０１０９９）彈起１亳子，報３０銀。中生製藥（０１１７７）趴低逾１巴仙，報９﹒２５銀，係全日表現最差嘅藍戰士。　　體育用品佬都一樣各有各走，安踏（０２０２０）畀大和升「他屐」同評級，瑞信、高盛同摩通都一樣升佢「他屐」，於是安踏得到缸友支持，埋單飛起３巴仙，報６０﹒４５銀，曾見６０﹒５銀上市新高。不過，智美體育（０１６６１）仲叻，全日鏟高近２７巴仙，報０﹒３３銀。特步（０１３６８）跳高逾５巴仙，報５﹒５９銀。「體操王子」李寧（０２３３１）踢高２巴仙，報２０﹒１銀。３６１度（０１３６１）仆低逾１巴仙，報１﹒４２銀。請請！　　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

全新節目《說說心理話》青少年不可以戀愛！？真實個案講述驚心動魄經歷► 即睇