《小傳日記》全球魚缸話題當然離不開「貿易戰」，噚日傳出侵侵（特朗普）尋求對祖國進口商品徵稅之後，孖屐愈來愈擔心，如果真係爆發貿易戰，可能會推高埋花旗國公司成本，損害埋海外銷售，搞到道指噚晚（１４日）碌低２４８點報２４７５８，慘。　　香江魚缸今朝（１５日）都難免受到拖累，低開２５３點報３１１８１，好彩缸友好醒目，決定避開同貿易戰有關嘅魚毛，轉投番大隻藍戰士懷抱，憧憬成績有驚喜仲好過！股王ＱＱ（００７００）下星期三（２１日）放榜，今日衝前１巴仙收４６８﹒６銀；平保（０２３１８）仲威今日跳起逾３巴仙收８８﹒９５銀，下星期二（２０日）成績表揭盅前，缸友梗係入定貨望「紅底」喇！　　結果恆指成功反擊升１０６點報３１５４１，又守番住條５０天線（約３１３４６），勁！國指方面，雖然祖國錢莊未唞完，但都象徵式有３５點落袋，收市報１２７１９。全日魚缸成交都有１１０７億銀。

＊屐飛好風騷創逾兩年高，長和明放榜超人精神爽＊

　　屐飛（００２９３）噚日中午放榜有驚喜，今日狀態依然大勇，仲先後畀多家大行唱好添，其中高盛仲畀「最牛價」１７﹒１銀，「他屐」繼續畀「掃貨」。富瑞仲話，屐飛嘅業績表現已經見底，去年虧損擴大至近１３億銀，已經較預期２５億銀低，所以富瑞亦繼續送祝福，最終屐飛全日開心飛高近５巴仙，報１４﹒４２銀，日內仲喺高位１４﹒８２銀插旗，創約兩年半新高添，勁！　　屐飛阿媽太古Ａ（０００１９）今日中午放榜，舊年多賺１﹒７倍至約２６１億銀，勁！仲派息１﹒１銀添，埋單彈高逾１巴仙，報８０﹒８５銀。囝囝太古地產（０１９７２）舊年多賺約１﹒３倍至近３４０億銀，收市時都升咗逾１巴仙，埋單２７﹒９銀。　　另一邊廂，長和系各家公司聽日（１６日）破天荒一齊派成績表，缸友都等緊長和系主席李超人會唔會交待退休傳聞，記住密切留意喇！今日超人一號（００００１）就輕輕跳高近１巴仙，報９８﹒６銀；長實集團（０１１１３）亦圍埋一齊開Ｐａｒｔｙ，收市時升咗逾１巴仙，報６９﹒９銀。

＊賓仕飲完奶快高又長大，維達一殼淚股東勁骨水＊

　　天仁奶茶好好飲勁多粉絲捧場，品牌效應延續到今日！賓仕（０１７０５）好似飲咗勁多奶咁，今日真係快高長大，一朝早飛起最多９８巴仙，高見７﹒９銀，比招親價１銀高出近７倍，缸友如果最高價沽出，真係一手賺超過兩萬七千蚊，飲返千幾杯天仁奶茶都得呀！不過高潮好快就完結咗，股價一掂７﹒９銀後就迅速回落，不過收市都有逾４３巴仙進帳，報５﹒７１銀，畀招親價都仲高近５倍，羨慕死唔少無貨缸友呀！　　除咗日常生活會飲吓奶茶，平時用嚟抹嘴嘅Ｔｅｍｐｏ紙巾，佢公司維達（０３３３１）今日傳出股東配股套現逾５億銀嘅消息，開市前就已經有一手５億銀大手上咗板。搞到維達腳軟近６巴仙，報１４﹒５８銀。

＊高盛睇得起萬洲真歡喜，大和撐創科尾市跌少咗＊

　　高盛出手將蒙牛（０２３１９）他屐下調至２７﹒５５銀，結果令蒙牛腳軟近４巴仙，報２５銀，係最差藍戰士。不過，高盛同時吹捧萬洲（００２８８），話業績預料有驚喜，列為首選，股價踢起近３巴仙，報９﹒５７銀。　　另一邊廂，貿易戰陰霾之下，耐世特（０１３１６）繼續無運行，被缸友質低５巴仙，報１３﹒１銀。大和就繼續睇好創科（００６６９）前景，認為電動工具業務未有重大不利因素，股價埋單由４４﹒８銀升返少少，收４５﹒７銀，唔見近４巴仙。

＊內房好得戚旭輝多招積，碧桂再Ｂｉｇ貴融創冇閉翳＊

　　內房佬表現相當省鏡，旭輝（００８８４）好威水，仲畀多家大行唱好，其中以中金「他屐」最牛價８﹒８５銀，叻！同時，野村就表示，佢舊年業績表現強勁，好過孖屐預期，仲話今年會增加買地機會添。消息利好股價，旭輝最後開心跳高近６巴仙，報７﹒２銀。　　樂視網（深：３００１０４）收到融創（０１９１８）主席孫宏斌辭職報告，話因為工作安排調整原因，辭去樂視網董事長職務。幸而融創仍保持升勢，收市時升咗逾５巴仙，報３１﹒８銀。　　街坊新城發展（０１０３０）舊年多賺約１﹒７倍至近３８億人幣，叻！績佳刺激股價向上，收市時踢高近４巴仙，埋單７﹒１７銀。碧桂園（０２００７）午後氣勢如虹，跑出成為全日最勁藍戰士，收市時開心躍起近４巴仙，埋單１５﹒８２銀，唔通預早慶祝下星期二份成績表靚靚？請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

全新節目《說說心理話》青少年不可以戀愛！？真實個案講述驚心動魄經歷► 即睇