《小傳日記》祖國經濟唔掂，對環球股市已經係一個打擊，點知噚晚花旗國製造業增長亦都慢咗，係超過兩年最低增幅；雙重打擊下，道指插水蒸發４６９點收１６０５８，萬六關已經危危乎。　　阿爺推出重磅措施救經濟，又有超過５０間券商可能再「泵水」１５００億人仔畀證金公司投資，但係Ａ場早段都曾經碌低近５巴仙低見３０１９。好彩，一班祖國錢莊反擊護盤，Ａ場埋單先企番穩收３１６０點，總算平穩渡過，開開心心睇閱兵。　　不過香江呢邊唔多掂，今朝試過被淡友攻擊，曾經瞓低超過４００點至２０７７１，係２０１３年７月以來新低；到中午前後內險突然發力，帶動最高倒升過百點，可惜個市又係一彈就散，恆指收市跌２５０點收２０９３４，國指就碌低１５２點收９３０１。　　反反覆覆又一日，成交９６１億左右。

＊明天大閱兵國家隊護盤，內銀Ａ仔靚Ｈ股卻閉翳＊

　　雖然Ａ仔嘅錢莊發力，但香江呢邊嘅內險同祖國錢莊卻兩邊走。Ａ場中午時倒升嗰陣，國壽（０２６２８）一度升近半成，但其後升幅收窄，得唔夠１巴仙進帳，收報２５﹒７５銀。另一藍戰士平保（０２３１８）間平安錢莊獲准非公開發行最多２億股優先股，集資最多２百億人仔，今日跣低唔夠１巴仙，報３６﹒８５銀。　　聽日閱兵大日子，今日乍見國家隊積極護盤，建行（００９３９）（滬：６０１９３９）嘅Ａ仔漲咗半成，Ｈ股就腳軟近２巴仙，報５﹒２６銀；工行（０１３９８）（滬：６０１３９８）Ａ仔更加漲停，但Ｈ股就唔見１巴仙，更加試過低見４﹒４銀創一年低位。細細間嘅盛京錢莊（０２０６６）今日表現神勇，逆市勁升９巴仙，收報９﹒９銀！

＊壽仔曾力撐奈何失後勁，ＱＱ一號仔逆市果然醒＊

　　Ａ場表現飄忽，又升又跌，最尾都係跌市完場。Ａ股ＥＴＦ表現一樣咁難捉摸，安碩Ａ５０（０２８２３）就最為硬淨，全日企穩升逾１巴仙，報９﹒７９銀。南方Ａ５０（０２８２２）就弱少少，要碌低唔夠巴仙，報１１﹒６銀。華夏滬深三百（０３１８８）同樣跌低近１巴仙，報３８﹒４銀。　　大隻佬ＱＱ（００７００）據報孖住中信國安組建互聯網壽險公司，仲諗好埋名叫「和泰人壽」，收市成功今日企穩，報１２７﹒４銀。長和（００００１）都成為追捧對象，逆市升逾１巴仙報１０２﹒６銀，係第二威水藍戰士。　　除咗ＱＱ外，中海外（００６８８）同樣喺逆境下走上近１巴仙，報２２﹒３銀。但同行華潤置地（０１１０９）同恆大（０３３３３）就表現麻麻，跟大市齊齊碌低唔夠１巴仙及近３巴仙。

＊大和來唱好鐵路齊鼓掌，中車不入股７３６再瀉＊

　　雖然鐵路總公司上半年淨蝕８８億人仔，但大和睇好鐵路基建業下半年表現會更好。中鐵（００３９０）同中鐵建（０１１８６）齊齊逆市踢高約３巴仙，報６﹒８３銀及９﹒９８銀。中交建（０１８００）唔跟大隊，碌低唔夠１巴仙，報８﹒７２銀。　　本來有機會同鐵路股拉上關係嘅中國置業投資（００７３６），停賽前瀉咗逾八成，原來賣殼畀中車（０１７６６）「撻Ｑ」，今日復賽再瀉逾２８巴仙，報０﹒１７４銀，真係無眼睇囉。中車就輕微走低約１巴仙。　　淡友再度出動重挫油價，國航（００７５３）從中受惠，逆風飛高逾３巴仙，報５﹒３銀。東航（００６７０）同南航（０１０５５）都踢高約１巴仙。

＊油價掉頭插鐵鳥即高飛，大象穿六十賭仔繼續頹＊

　　噚日馬交出咗賭收成績後，瑞銀出報告話數字略好過預期，中場收入可能會有輕微增長，而大摩就話賭仔估值合理，中場收入穩定，但可能會跌。結果銀娛（０００２７）今日好慘，唔見４巴仙，收報２２﹒９５銀，低見２２蚊創近三年低位，連挫第３日，係今日表現第三差藍戰士。金沙（０１９２８）亦唔見３巴仙，收報２５﹒４銀，亦曾低見２５﹒１銀創近三年低位。　　其實除咗銀娛外，仲有幾位藍戰士創５２周低。傳出炒人嘅大笨象（００００５）穿六十蚊，低見５９﹒３銀創３年低，收市都踢低近２巴仙報５９﹒４銀；新地（０００１６）見過９３﹒６５銀超過一年低位，但低位見支持，收升唔夠半個巴仙，報９５﹒１銀；聯想（００９９２）亦低見６﹒０２銀創兩年低，繼續碌低近３巴仙。假期愉快，請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

etnet榮獲HKEX Awards 2023 「最佳表現證券數據供應商」大獎► 了解詳情