《小傳日記》各地魚缸繼續風雨飄搖，美股三大指數全線收跌，其中花旗國嗰邊噚晚嘅科技佬因為陸續多間企業加入封殺華為，同傳會有更多神州科技公司率連其中而下跌。香江今日當然受拖累啦！就算財長努欽其後話習大大同侵侵可能喺六月底會面，同嚟緊一個月唔會上調關稅，中港兩地魚缸今日都係回天乏術啊！難怪嘅因為被「孖屐」遺忘咗一排嘅脫歐又有暗湧，米字國嗰邊傳緊首相梅姨（文翠珊）醞釀聽日會唔撈，而今朝東瀛國公布嘅製造業ＰＭＩ又跌穿５０盛衰分界線降至４９﹒６，種種利淡因素影響下，魚缸又點會升呢？　　魚缸一開市先低開２００點報２７５０５，其後仲愈跌愈勁，一眾科技股率先當災，其中ＱＱ（００７００）跌勢醜樣，噚日穿３４０蚊今日再穿３３０蚊關口，兩隻手機設備孖寶又唔爭氣，令到魚缸跌勢曾經擴大至５３６點，低見２７１６９點，創近四個月低。最終恆指收報２７２６７點跌４３８點，主板成交９８９﹒９４億，比上日增加近三成！　　國貨方面收報１０４０１，跌近２巴仙或跌２０３點。　　神州方面比人連橫出招，上證當然收跌，收報２８５２，唔見咗３９點或跌逾一巴仙。深成指收報８８０９，蒸發２３１點或近３巴仙，成交２７１７﹒４９億元人民幣，兩市成交４６４６﹒１８億人仔。　　大隻藍戰士方面全線走低，ＱＱ今日一支大陰燭埋單，仲要連跌六日兼創咗七個月最長跌浪，全日唔見４巴仙，報３２６銀，加埋唔見咗近一成三！；大象（００００５）跌５仙，報６５﹒２５銀；ＡＩＡ（０１２９９）跌近２巴仙，報７４﹒９銀；生發發（００３８８）噚日急彈之後，今日腳軟唔見近１巴仙，報２４６﹒４銀。

＊舜宇陷低谷瑞聲同告急，優通逆市彈缸友有錢賺＊　　　　封殺華為嘅效應不斷發酵，陸續有唔少晶片商同華為割席，今日「孖屐」就傳花旗國想泡菜國（南韓）都加入埋一份，雖然當地政府暫時未有回應，不過已經足夠令今日多隻手機設備佬同５Ｇ佬一遍紅海！　　兩隻手機設備孖寶包辦表現最差藍戰士，慘！其中瑞聲（０２０１８）插逾６巴仙，報４１﹒２５銀；舜宇（０２３８２）全日挫近８巴仙，報６７﹒９銀。其他魚毛方面，丘鈦（０１４７８）同富智康（０２０３８）亦齊齊急插８巴仙，分別報５﹒４銀同０﹒９２銀。華顯光電（００３３４）跌半成，報０﹒６３銀；比亞迪電子（００２８５）、通達（００６９８）各跌４巴仙，分別報１０﹒４２銀同０﹒６４銀。信利（００７３２）同鴻騰精密（０６０８８）就跌近５巴仙，分別收１﹒１５銀同３﹒１７銀。　　講埋手機佬。聯想（００９９２）下晝公布全年業績，一如所料轉盈賺５﹒８７億美金，不過魚缸市況差，獲利盤湧現之下，今日先升後急跌近３巴仙，報５﹒８８銀；小米（０１８１０）亦跌３巴仙，報９﹒８銀。　　５Ｇ佬中興（００７６３）連同華為畀花旗國議員話要立法移除相關嘅設備，又畀人攪！股價當然跌，全日唔見６巴仙，報１９﹒４２銀。鐵塔（００７８８）跌４巴仙，報１﹒７２銀。中通服（００５５２）急插近７巴仙，報５﹒４９銀；京信通信（０２３４２）蒸發半成，報１﹒４８銀。長飛光纖（０６８６９）跌近４巴仙報１６﹒３４銀。神州優通（０６１６８）就厲害囉！今日逆市急升逾一成，報０﹒７４銀，最多仲升過三成四見０﹒９銀！　　三大中資電訊商亦齊齊收跌，中聯通（００７６２）同中電信（００７２８）各跌２巴仙，分別報８﹒２７銀同３﹒８４銀；中移動（００９４１）軟１巴仙，報７２﹒１銀。

＊華為遭封殺晶片股下滑，美團今放榜股價向下闖＊

　　華為呢次真係四面楚歌囉！谷歌封殺完之後，高通、ＡＭＲ公司加入封殺行列，雖然之前話過神州晶片要自強不息，股價都炒起一輪，但大家都知到神州製造技術有咩能耐，大家理性過後股價都開始回落。ＡＳＭ太平洋（００５２２）跌近５巴仙，報７５﹒５銀。中芯（００９８１）跪低近３巴仙，報８﹒８銀。華虹（０１３４７）插近３巴仙，報１６蚊。上海復旦（０１３８５）跌唔夠半巴仙，報１０﹒８銀。　　美團（０３６９０）今日放榜，首季虧損收窄至１４﹒３億人仔，而放榜前缸友似乎就唔多睇好，所以今日股價急急回吐兼失守十天線，收挫近６巴仙，報５８﹒１５銀。其他新經濟佬都要插水，同程藝龍（００７８０）蒸發逾６巴仙，報１４﹒１４銀。美圖（０１３５７）跌近２巴仙，報２﹒５７銀。　　花旗最新一份報告就話，雖然仍然睇好軟件佬未來走勢，但就認為財政部出台嘅稅收優惠政策，對目前嘅軟件公司積極影響有限，今日一眾軟件佬嘅股價上都未見有支持，其中金蝶（００２６８）跌逾５巴仙，報８﹒３８銀。民航信息（００６９６）挫近２巴仙，報１７﹒０２銀。金軟（０３８８８）唔見近４巴仙，報１８﹒１銀。

＊孖屐雪如霜車股更加傷，貿易戰持續出口股價縮＊

　　今日大行花旗出份報告，話神州汽車銷情下滑尚未見底，認為目前估值依然過於樂觀，單憑呢句已經嚇到好多人出貨，加上魚缸市況轉差，架架砵砵車都開們車，其中藍戰士吉利（００１７５）就跌逾４巴仙，報１２﹒１８銀。比亞迪（０１２１１）蒸發逾３巴仙，報４４﹒８５銀。華晨（０１１１４）低收近４巴仙，報６﹒８７銀。北汽（０１９５８）回吐逾２巴仙，報４﹒４４銀。長汽（０２３３３）唔見咗超過３巴仙，報５﹒１８銀。　　貿易戰底下，出口企業情緒都唔太樂觀，市場憧憬侵侵同習大大下個月見面會有咩進展，但缸友有理無理都沽貨先講囉！德昌電機（００１７９）跌逾１巴仙，報１４﹒７４銀。電鑽佬創科（００６６９）噚日急升後，今日急挫近４巴仙，報４８﹒５５銀。申洲（０２３１３）潛逾１巴仙，報９５﹒５５銀。敏實（００４２５）跪低逾１巴仙，報２４﹒５銀。互太紡織（０１３８２）跌逾１巴仙，報６﹒７１銀。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

全新節目《說說心理話》青少年不可以戀愛！？真實個案講述驚心動魄經歷► 即睇