《小傳日記》今日香江孖屐唔多理想！隔晚美股三大指數各有各行，納指破頂，道指就先揚後挫，魚缸噚日破三萬但企唔穩，今日直頭大幅回吐，低開１１８點之後就一路走低。不過都冇計嘅，先有ＭＳＣＩ將中海油（００８８３）踢出指數，搞到孖屐氣氛麻麻，早市尾盤更加傳出港府想將九龍部分疫情重災區封鎖，向居民實施「禁足令」；馬交又破咗舊年６月以嚟嘅零確診紀錄，神州北京同上海又有新增個案，大市自然借勢回吐調整，港股半日都唔見咗４４７點報２９４８０。　　午後魚缸繼續插水，由最渣藍戰士中海油帶住大市向下行，中海油全日唔見近６巴仙，報７﹒８銀，濠賭佬代表銀娛（０００２７）都插水逾４巴仙，報５９﹒０５銀。新、舊經濟佬都冇運行，恆指成分股有九成都係捱沽，恆指最低見過２９４１３，蒸發５１３點。最終魚缸收報報２９４４７，潛水４７９點或近２巴仙，主板成交２３５０﹒７９億銀按日少一成一，今日港股得９０幾億銀北水淨流入，比起噚日嘅１６２億銀大減四成。國指報１１６７７，走軟２１２點或近２巴仙。科指報９７６５，跣腳４４點或近半巴仙。　　大隻藍戰士方面，ＡＩＡ（０１２９９）唔見逾３巴仙，報１００﹒４銀；生發發（００３８８）跣腳近１巴仙，，報５１０﹒５銀；大象（００００５）腳軟近３巴仙，報４３﹒２銀；有傳ＱＱ（００７００）有意融資幾十億美金收購遊戲業務，全日走高逾１巴仙，報６９１銀；美團（０３６９０）被大摩升咗他屐四成去到４２０銀，全日踢高逾１巴仙，報３８０﹒２銀；阿里（０９９８８）旗下支付寶保險平台要按監管轉移去保險公司，股價撻低逾３巴仙，報２５０﹒６銀；小米（０１８１０）噚日俾北水掟貨３﹒４億銀，今日潛水近４巴仙，報２９﹒８銀。

＊華為被出局中興跌落谷，阜博微盟升兌吧未瞓醒＊

　　瑞典喺發展５Ｇ網絡建設唔預神州企業玩，唔比一班電信佬用華為同中興（００７６３）之類神州企業。神州知道就堅嬲，鬧瑞典違反世貿原則同國際通行規則。魚缸一眾５Ｇ佬心碎，紛紛插水。中興碌低近５巴仙，報２２﹒２銀，瑞聲（０２０１８）唔見近４巴仙，報４５﹒３５銀，丘鈦（０１４７８）插水逾２巴仙，報１７﹒２銀，小米下滑近４巴仙，報２９﹒８銀，富智康（０２０３８）蒸發逾２巴仙，報１７﹒２銀。不過比亞迪電子（００２８５）就好似置身事外咁，鏟起近３巴仙，報５６銀。　　今日魚缸氣氛麻麻，但唔少ＳａａＳ就好醒神咁破頂，阜博（０３７３８）、微盟（０２０１３）同移卡（０９９２３）就係代表啦。阜博今日飆到最高３３﹒８銀，全日飛起近１５巴仙，報３３銀，微盟就升到最高２７銀，成日漲近６巴仙，報２６銀，移卡鏟高逾１８巴仙，報６９銀。但兌吧（０１７５３）就好似未瞓醒咁，跌足２日，今日瞓低近１３巴仙，報２﹒４４銀。半新佬醫渡（０２１５８）都係弱啲，插左兩日後，再漏氣逾２巴仙，報６２銀。

＊陽光好耀眼福萊特悅顏，藥明康德喜四環喘晒氣＊

　　星期五嘅陽光特別燦爛，帶挈光伏佬一齊向陽！陽光能源（００７５７）今日企穩十大升幅第一名，因為佢嚟緊會發新股，引入好有經驗嘅施丹紅做戰略股東，佢老公董清世係丹斯里拿督，有超過三十年製玻璃業務嘅經驗。一眾缸友都好受落，陽光能源飆到八年高位０﹒６銀，全日就彈起逾６３巴仙，報０﹒５８銀。另外，福萊特玻璃（０６８６５）訂咗８９億銀人仔銷售合約，今日升近２巴仙，報３３﹒６銀。卡姆丹克（００７１２）連升２日，今日都衝上雲霄，又飛高近３３巴仙，報０﹒４８５銀。順風清能（０１１６５）都幾叻仔，創月高，起哄逾１８巴仙，報０﹒２５５銀。至於保利協鑫（０３８００）就創２０１５年６月以嚟嘅新高２﹒２２銀，但尾水轉跌低走逾１巴仙，報２銀。　　藥明康德（０２３５９）上年純利多咗五成至六成，有好成績，自然漲起逾１２巴仙，報２０４銀。至於四環醫藥（００４６０）就慘啦，打算用１３５０萬人幣買附屬醫療美容公司，噚日開始裂口升，今早都升到新高２﹒３２銀，不過之後就嘔返逾２２巴仙，報１﹒６８銀。至於近排花旗唱好嘅藥明（０２２６９）同埋康龍化成（０３７５９）今日繼續靚仔，一齊起哄；藥明炒高逾６巴仙，報１２１﹒３銀，康龍化成彈起近８巴仙，報１７０銀。　＊港府擬封城地產佬詐型，禁足令來襲港視向上夾＊　　　油尖旺疫情遲遲未受控，今日又有２９宗確診同油尖旺有關，消息話政府有意落柯打喺今個禮拜之內，響九龍部分地區實行「封區」，要區內所有人做完檢測先解封，除咗關事嘅居民頭痕之外，地產佬都嚇到腳軟。恆隆（００１０１）插水逾３巴仙，報２０﹒８銀；九置（０１９９７）唔見逾２巴仙，報４１﹒９５銀；恆地（０００１２）走落逾１巴仙，報３２﹒３銀；新世界（０００１７）跣腳逾１巴仙，報３７﹒１銀；港鐵（０００６６）走軟逾２巴仙，報４３﹒６銀；長實（０１１１３）走低逾２巴仙，報４０﹒７５銀。　　「禁足令」殺到埋身，如果落實嘅話，油尖旺地區居民都要乖乖留喺屋企，等到有陰性檢測結果先可以行出封鎖區域，消息搞到班抗疫股齊齊起哄，宅經濟概念又落鑊！港視（０１１３７）踢高近４巴仙，報１６﹒１銀；７５９阿信屋ＣＥＣ（００７５９）彈逾一成，報０﹒７６銀；唯獨是國際家居（０１３７３）走軟近１巴仙，報２﹒５２銀，請請！

　　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

全新節目《說說心理話》青少年不可以戀愛！？真實個案講述驚心動魄經歷► 即睇