《古臣周記》有賴聯儲局主席鮑威爾「放鴿」，同中美關係明朗化，上星期魚缸走勢可以話非常凌厲，升足五日累漲千點收復埋百天，不過今個星期一（１４日）開市魚缸就開始回吐返部分升幅，缸友們可能會心郁郁諗緊入市好唔好，不如等古臣講兩句自己嘅睇法，大家交流一下。　＊前儲局主席耶倫：或已看見最後一次加息＊　　　　　講返貿易戰，上星期嘅中美會談雖然暫時未有具體措施出台，不過可以睇到中美關係可以緩和，加上侵侵仲搞緊美墨圍牆，現時政府停擺已經達紀錄２５日，上次２０１３年花旗國停擺嗰季ＧＤＰ已經無咗０﹒４巴仙，唔知今次又會無幾多呢？其次，花旗國今個星期業績期開鑼，花旗集團率先公布業績但就未符合孖屐預期，當地魚缸都係跌多過升，但就未影響到香江呢邊嘅走勢，但缸友們都唔好掉以輕心。　　加息方面，繼聯儲局主席鮑威爾「放鴿」，前聯儲局主席耶倫在出屆研討會時亦表示，花旗國可能已經經歷本次加息周期內最後一次加息，並預計低利率要維持一段長時間。而現任聯儲局副主席克拉里達亦暗示，今年加息次數或較者會比局方早期預期嘅兩次為少。睇返現時利率期貨市場數據顯示，「孖屐」普遍相信聯儲局今年唔會加息，到年底甚至有２８巴仙減息。

＊港股１０天線再破２０天線成黃金交叉＊　　　睇返公仔圖，恆指１０天線升破２０天線，睇個勢似乎想再升破埋５０天線，但ＲＳＩ１４同ＲＳＩ　５齊齊上到近６０嘅水平，睇返上年每次去到呢啲位就會有魚缸就會有回吐，缸友們或者可以趁回吐買入一啲貨。　　其實幾隻重磅股近排嘅走勢都幾唔錯，好似ＱＱ（００７００）上星期已經試過重上３３０銀，高過上個月高位３２８銀嘅位置，兼收復多條主要平均線，神州嗰邊開始放寬遊戲版號審批，雖然暫時ＱＱ仲未上榜不過相關審批以先後順序做審批，相信ＱＱ離拎到版號亦不遠矣！工信部之前已經講明要推５Ｇ，近排「孖屐」再炒相關概念股，令到中移動（００９４１）近日都重上８０銀關口，同樣收復晒多條主要平均線，叻！有傳聞話神州當局可能提早開展５Ｇ商用，缸友都要留意吓。　　缸友們可以睇位買入呢兩隻股份，今季似乎５Ｇ概念仍然會炒一段時間，建議等中移動股價回落到７８銀以下低吸，而ＱＱ就可以喺３２０銀嘅位置買貨，上望３４０銀左右。

＊沽領展及粵海投資，買新創建及潤電＊　　　　　講返阿臣個倉。　　阿臣沽出兩隻帳面有賺嘅魚毛，買入近排走勢唔錯嘅新創建（００６５９）同潤電（００８３６），前者業績靚仔，而後者就繼續受惠煤價喺低位嘅利好因素，兩隻魚毛息率都唔錯，希望嚟緊公布業績嘅時候有好成績，可以「財息兼收」啦。　　另外，阿臣沽出兩隻呢個月創出高位嘅股份，領展（００８２３）同粵海投資（００２７０）先行止賺，兩股扣手續費後共賺６９２５銀，古臣都覺得開心，現時仲有近９萬銀彈藥，遲吓可能買入幾隻重磅股睇吓有無得博反彈。　　　表列截至１月１６日（１１：００ａｍ止）投資組合表現：　　　股份　　　　　　股數　　　　平均買入價　　　　　現價　　　　　　　總值　　－－－－－－－－－－－－－－－－－－－－－－－－－－－－－－－－－－－－－－－－　　港股：　　寶勝　　　１００００股　　　　１﹒５６元　　　　１﹒４９元　　　１４９００元　　新創建　　　１０００股　　　１７﹒２４元　　　１７﹒２４元　　　１７２４０元　　華潤電力　　２０００股　　　１５﹒９０元　　　１５﹒９０元　　　３１８００元　　－－－－－－－－－－－－－－－－－－－－－－－－－－－－－－－－－－－－－－－－　　　　一周買入╱賣出股份　　－－－－－－－－－－－－－－－－－－－－－－－－－－－－－－－－－－－－－－－－　　股份　　　　　　　每股作價　　　　　數量　　　　計及手續費後金額　　　　盈╱虧　　　　　　　　　　　　　　　　　　　　　　　　　　　　　　　　　　　（不計手續費）　　－－－－－－－－－－－－－－－－－－－－－－－－－－－－－－－－－－－－－－－－　　賣出：　　粵海投資　　　　１５﹒３０元　　　２０００股　　套現３０５４９元　　＋４６００元　　領展　　　　　　８０﹒００元　　　　５００股　　套現３９９７９元　　＋２３２５元　　　　買入：　　新創建　　　　　１７﹒２４元　　　１０００股　　１７２７７元（連手續費）－－　　華潤電力　　　　１５﹒９０元　　　２０００股　　３１８５２元（連手續費）－－　　－－－－－－－－－－－－－－－－－－－－－－－－－－－－－－－－－－－－－－－－

　　股票市值　　　　　　：　６３９４０元　　剩餘現金　　　　　　：　８９３７０元　　組合淨值　　　　　　：１５３３１０元　　組合本月收益表現：　＋　０﹒２％（截至上月底止組合淨值：１５３００１元）　　組合累計收益表現：　＋４６﹒０％（本金１０５０００元計）（２０１６年８月開倉）　　　＊數據截至今日１１：００ａｍ

【母親節限時優惠】 送價值$288維柏健30天逆轉肌齡(膠原蛋白+生物素) ► 火速行動