《小傳日記》花旗國魚缸氣勢如虹，有指話花旗國同神州兩大國會約埋飲啖茶食個包，大家坐低傾傾咁話，所以全球魚缸開始回暖。另外，「唉瘋」終於推出，大家都預備不停Ｆ５上網買機，蘋果股價再推上逾２個巴仙，加上英特爾同３Ｍ都升逾１巴仙，帶領道指升１４７點，升幅超過半個巴仙，報２６１４５點。納指都飛返８０００點關口，升５９點或近１巴仙，報８０１３點。標指彈１５點或逾半個巴仙，收２９０４點。　　香江魚缸一聽到話有好消息，噚日已經借勢彈６百幾點，哇！正所謂人旺無幾可，幾大都冧多鋪莊！之前殺到去２６２００嘅牛仔，風勢一轉，好友就梗係調轉頭向上殺熊啦！今日高開逾２００點之後，最高彈上２７３４０點，幫２７３００點嘅重倉熊仔放血！最終魚缸收報２７２８６點，升２７１點或逾１巴仙，全日主板成交８６８億銀跌１８巴仙。　　國貨全日走高７２點或逾半個巴仙，收１０５７５點。神州滬市都微跌近５點報２６８１點。　　一班藍戰士全部都「打雞血」咁精神一振！濠江佬銀娛（０００２７）彈近４巴仙，報４９﹒８５銀；金沙（０１９２８）就飛起逾４巴仙，報３５﹒２銀。其他大隻藍戰士都唔曳，ＱＱ（００７００）漲２巴仙，報３３０銀；ＡＩＡ（０１２９９）漲逾１巴仙，報６４﹒８銀；大象（００００５）都微升半個巴仙，報６７﹒９銀；中移動（００９４１）漲１巴仙，報７６﹒９銀。

＊蔚來汽車勁香缸車佬醒，電動車勢威電池股唔曳＊

　　呢排車佬終於發力，事緣一間叫「蔚來汽車」去到花旗國上市，點知爆上九成，帶領今日神州同香缸車佬一齊起飛，大行花旗都出份報告講兩句，話睇好神州電動車行業，認為佢嘅複合增長率高達４５巴仙！所以缸友對比亞迪（０１２１１）「心心眼」咁，今日都飛起逾８巴仙，報４９﹒１銀。吉利（００１７５）今日都彈近２巴仙，報１５﹒３銀。華晨（０１１１４）升近５巴仙，報１１﹒７２銀。廣汽（０２２３８）飛起近８巴仙，報７﹒８銀。另外，恆大健康（００７０８）早排都入股ＦＦ１９，有內地街坊見到ＦＦ１９原型車已經係恆大中心門口，所以都刺激股份升近６巴仙，報１０﹒６８銀。　　講得電動車，又點唔可以提下電池股，一提電池股就要講下洛陽鉬業（０３９９３）啦！話曬都係內地鈷業大亨，電動車飛起都要留意下佢，所以今日都彈起近４巴仙，報３﹒０４銀。電池股方面，天能動力（００８１９）彈逾７巴仙，報６﹒９２銀；超威動力（００９５１）漲逾４巴仙，報３﹒１８銀；五龍電動車（００７２９）就持平報９﹒４仙。

＊「唉瘋」要過萬瑞聲見反彈，新地有成績長實續反擊＊

　　唔少缸友望穿秋水都終於等到蘋果新「唉瘋」出場，雖然蘋果終於睇得開，為香江同神州嘅新機加入雙卡雙待功能，但最貴嘅「唉瘋」承惠超過一皮嘢，功能又唔算得上相當特別，大和出最新報告話三款新「唉瘋」定價太高，仲話咁樣會搞到瑞聲（０２０１８）冇運行。不過，近幾日魚缸氣氛有好轉跡象，頹咗一排嘅手機設備佬開始有返啲炒作，瑞聲今日仲急彈近６巴仙，報８２﹒４銀，兼係全日最勁藍戰士。　　舜宇（０２３８２）都炒高超過３巴仙，報９６蚊。主要為「唉瘋」供應前置鏡頭嘅高偉電子（０１４１５）就跣低近２巴仙，報１﹒１８銀。專幫神州手機佬代工手機外殼嘅比亞迪電子（００２８５）就最巴閉，全日坐火箭急升超過８巴仙，報９﹒７７銀。　　雖然聯儲局即將喺月尾議息，加息機率有成九成七，但息率一向唔算低嘅香江磚頭好彩跟住個市搭順風車，新地（０００１６）噚日魚缸收工後先放榜，截至６月底止年度多賺兩成，全年派息亦豪爽增加超過１３巴仙，績後仲獲匯證、高佬同麥格理升「他屐」，有大行唱好缸友梗係唔執輸衝入市掃貨，新地全日彈超過２巴仙，報１１７﹒２銀。恆地（０００１２）同新世界（０００１７）都升咗約２巴仙，報４０﹒５銀同１０﹒１６銀。長實（０１１１３）因為近日誠哥買貨而搶晒風頭，今日繼續彈高３巴仙，報５９﹒４５銀。

＊公用股回吐中電高位倒，魚缸略為好教育股升高＊　　　　大市近日氣氛略為好轉，部分公用股都要嘔返早前嘅升幅，其中中電（００００２）宣布出售喺印度嘅中電印度４０巴仙股權，作價２８﹒９億銀，導致今日破頂９７銀之後，就開始倒跌，收市報９５﹒２銀，走低近２巴仙，係表現第二差藍戰士。另一個近期股價都比較硬淨嘅領展（００８２３）都要蒸發近半個巴仙，收報７６﹒９銀。年年十送一嘅煤氣（００００３）今日亦失威，走低一格報１５﹒９銀；港燈（０２６３８）牛皮，報７﹒８８銀；長江基建（０１０３８）就最叻仔，收復６０銀關口之後，今日再升逾２巴仙，報６２﹒７銀；電能（００００６）升逾１巴仙，報５６﹒８銀；港鐵（０００６６）都有半個巴仙進帳，報４１﹒７銀。　　幾隻老師股今日隨魚缸反彈，楓葉教育（０１３１７）升近５巴仙，報３﹒６７銀；中教控股（００８３９）同新高教（０２００１）都升７巴仙，分別報９﹒４８銀同報４﹒９１銀；睿見教育（０６０６８）報４﹒１１銀，上升逾４巴仙；宇華教育（０６１６９）報３﹒５８銀，升逾５巴仙；半新股皇岦（０８１０５）就失威，大跌逾１４巴仙，報０﹒３銀。

＊油價大跌幅油佬只有哭，人仔今回軟鐵鳥升勢完＊　　　　　油價創個半月以嚟最大單日跌幅，一班油佬當然都唔好受，「三桶油」就有兩桶下跌，中海油（００８８３）報１４﹒６２銀跌１亳子，係表現第三差藍戰士；中石化（００３８６）報７﹒５４元，跌近２巴仙，係表現最差藍戰士；中石油（００８５７）最叻仔，報５﹒９７銀，漲半巴仙。其他相關股方面，中海油田（０２８８３）報７﹒８５銀跌近１巴仙，昆侖能源（００１３５）報８﹒８３銀升逾１巴仙，光匯石油（００９３３）牛皮報１﹒５銀。　　人仔回軟，一向食正人仔升值概念嘅神州鐵鳥當然墜機，東航（００６７０）低走近半個巴仙報４﹒６９銀；國航（００７５３）無升跌報６﹒８２銀；南航（０１０５５）就軟逾半個巴仙，埋單４﹒７６銀。　　貿易戰現曙光，一班航運佬愈升愈有，太平洋航運（０２３４３）連漲兩日，噚日收復１０天線，今日再復２０天線，收報１﹒８６銀，揚５巴仙；東方海外（００３１６）報５１銀，走高１巴仙；中航運（００３６８）報１﹒８３銀，升逾２巴仙；中外運（００５９８）報３銀，升近２巴仙；勝獅貨櫃（００７１６）報１﹒０８銀，升近２巴仙。　　大家缸內缸外都要做好防風措施，周末愉快！請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

全新節目《說說心理話》青少年不可以戀愛！？真實個案講述驚心動魄經歷► 即睇