《小傳日記》有時有Ｄ嘢，真係唔到你唔信。踏入傳統「五窮月」只係兩日，香江魚缸就跌足兩日。連串利淡消息一次過湧晒出嚟：花旗魚缸噚晚（３日）又跌１４０點、油價又連碌兩日，祖國同歐洲經濟數據都唔掂，仲有避險嘅日圓又嘭嘭「升」，都大挫香江好友士氣。　　結果，今朝（４日）恆指低開１２０點後，最多唔見２６５點至２０４１１，好彩下半場Ａ場好友奮力向上，掂過一下三千大關，雖然收報２９９１點，但恆指都叨光收復部分失地，埋單只係碌低１５１點收２０５２５，國指就唔見５１點收８６９７。全日成交６１４億左右。　　睇番恆指公仔圖，今日一度穿過５０天線（２０４３９），之後啱啱掂一掂１００天線（２０４１１）就有番Ｄ力，唔排除短線有技術反彈。但係如果再無好消息沖一沖喜，恐怕二萬心理關口都唔係咁穩陣，好友要做足防禦措施喇！

＊失意英Ｏ２一號逆市升，麥記潑冷水大象唔多醒＊

　　超人一號（００００１）旗下收購米字國Ｏ２單刁有傳歐盟將會喺今日宣布否決，但早前超人一號已連跌７日累挫超過半成，今日終於企穩，有近１巴仙升幅，報９３銀。　　大笨象（００００５）獲巴克萊話份成績表好過預期，有抗跌能力，維持中性評級同埋目標價５６﹒４銀，但麥格理就話大笨象前景仲有好多挑戰，今日股價繼續向下，唔見近３巴仙，收報５０﹒１５銀；街坊渣打（０２８８８）就跪低逾１巴仙，收報５９﹒８銀。反而東亞（０００２３）就有買盤支持，逆市踢高近３巴仙收２８﹒４５銀，係今日最叻藍戰士。　　有避難作用嘅公用股今日繼續見支持，電能（００００６）同長建（０１０３８）分別升近２巴仙同逾１巴仙，各報７６銀同７３﹒４５銀。

＊券商有苗頭深港快開通？市況唔多妥公用更輕鬆＊

　　Ａ場午後曾經上番三千關，但見阻力，財險（０２３２８）噚日受累ＡＩＧ減持消息急插後今回穩，升近半個巴仙，埋單１３﹒４２銀；平保（０２３１８）就升近１巴仙，收報３６蚊。　　另外，有券商出報告話「深港通」準備期有望較「滬港通」時嘅６個月大幅縮短，又預期好快會正式啟動。生發發（００３８８）午後努力收復失地，全日啱啱好打平手，報１８７﹒５銀；券商股亦都跌幅收窄，海通國際（００６６５）同國泰君安國際（０１７８８）更升１巴仙同３巴仙，各報４﹒３７銀同２﹒６３銀。

＊油價兩連跌油股頭耷耷，鐵鳥起飛了無貨眼濕濕＊

　　油價兩連跌，花旗國期油更挫２﹒５巴仙，皆因原油產量不斷上升，孖屐又再次擔心供應過剩。中海油（００８８３）碌低逾３巴仙，報９﹒１２銀，差盡藍戰士。中石化（００３８６）、中石油（００８５７）都齊齊跣低近３同１巴仙，報５﹒２５及５﹒５７元。　　不過，有人歡喜有人愁，一班鐵鳥成本降低自然好興奮，加上券商話上海迪迪尼開幕吸引遊客會有利，東航（００６７０）、南航（０１０５５）應聲飛起近７同６巴仙，報４﹒４９同５﹒０８銀。　　砵砵車華晨（０１１１４）獲摩通唱好升評級目標，又據報新一代華晨寶馬Ｘ１將於２０日上市，駛前５巴仙，埋單７﹒７７銀。街坊卻兩邊走，北汽（０１９５８）腳軟近５巴仙，長汽（０２３３３）就企高逾１巴仙。

＊摩通畀個讚華晨缸邊飆，永暉好鑊氣華夏仍腳軟＊

　　永暉（０１７３３）之前打算「２０合１」、「１供３」同埋重組債項，終於獲債權人支持通過計劃，前景再現光明，大受刺激飆前逾４５巴仙，報０﹒１４４銀，仲成為今日最佳魚仔。　　御泰中彩（００５５５）同樣傳嚟好消息，估計６個星期內會拎到批准重組股權，之後就可以快手賣出彩票系統業務，結果踢起３３巴仙，報０﹒１７３銀。　　保發（０３３２６）畀證監點名批評股權高度集中，話廿個股東持有９７﹒８４巴仙股本；佢即刻反駁，確認公眾持股唔少於兩成半，符合上市規定，亦衝前近１５巴仙，報５﹒５銀。　　半新丁ＨＹＰＥＢＥＡＳＴ（０８３５９）都好叻，彈高逾８巴仙，報０﹒２３銀。盈健醫療（０１４１９）一度破頂見３﹒５１銀，可惜之後企唔穩，軟近１巴仙，收３﹒１９銀。　　講開醫療，噚日急挫嘅華夏醫療（０８１４３），雖然否認與「魏則西事件」有關，但今日仍跌半成，請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

全新節目《說說心理話》青少年不可以戀愛！？真實個案講述驚心動魄經歷► 即睇