《小傳日記》隔晚花旗魚缸又插水，幾隻科網巨企都有資金食糊流走，搞到納指表現最差。而中美關係都令「孖屐」好頭痕，皆因侵侵已經講到明，唔考慮同神州展開第二階段貿談，又話雖然曾經與習主席有非常好關係，但此情不再，已經好耐無打電話畀對方啦。再加上神州Ａ場今朝下挫，香江魚缸都反覆偏軟，低開２２點後雖然曾經轉升，不過大批沽盤隨即殺到，大市一度倒跌逾２００點，低見２４６８５點，跌穿２０天線（約２４８７１點）以及５０天線（約２４９０７點）匯聚。　　食完妟返嚟，舊經濟股繼續發力，磚頭佬同銀行佬都出力托市，單係隻大笨象（００００５）已托起個市過百點，加上收市後派成績表嘅ＱＱ（００７００）轉升，魚缸回勇重上二萬五關，埋單報２５２４４，仍然升３５３點或升逾１巴仙，主板成交１４４０﹒７５億銀。國企指數報１０２１５，上升６２點或上升近１巴仙。科技股受壓，恆生科技指數繼續跑輸大市，收報７０１０點，挫１１９點或跌近２巴仙。　　神州Ａ場反覆收跌，上證綜指報３３１９，下跌２１點或下跌０﹒６３％；深證成指報１３３０８，下跌１５７點或下跌１﹒１７％。兩市全日成交１０８３６億人仔，連續第１１日突破萬億銀。　　大隻藍戰士方面，ＱＱ今日先跌後回，飆逾１巴仙，報５２０﹒５銀；生發發（００３８８）跌逾１巴仙，報３６９﹒８銀；中移動（００９４１）走高唔夠半巴仙，報５６﹒９５；ＡＩＡ（０１２９９）彈高３巴仙，報７４﹒８５５銀；建行（００９３９）跳近１巴仙，報５﹒８５銀。

＊俄佬急報喜國泰飛得起，「大小象」威武銀行佬驕傲＊

　　俄仔話，佢哋嘅衛生部已經批准莫斯科一間研究所開發嘅新冠肺炎疫苗註冊，係全球第一個註冊疫苗嘅國家，加上花旗國同生物科技公司莫德納達成協議，訂一億劑研發緊嘅疫苗，侵侵話相信可以好快面世喎。憧憬當飯食，鐵鳥今日好Ｈｉｇｈ，東航（００６７０）抽高近３巴仙，報３﹒０４銀；國航（００７５３）同南航（０１０５５）跳高近４巴仙，報５﹒３銀同３﹒８８銀。國泰（００２９３）晏晝出中期績，盈轉虧蝕９８﹒６５億元，因為一早發咗盈警有晒心理準備，所以食住個勢鏟高１２巴仙，報５﹒８８銀。不過，主席預期客運業務喺頗長時間內唔會有顯著復甦，話依家面對緊嘅係航空業最大挑戰。　　疫苗報喜都利好銀行佬，之前大摩升大象英國股份評級嘅消息，加上今日虛擬銀行ｌｉｖｉｂａｎｋ正式開業，令銀行佬有炒作。大象（００００５）抽高近５巴仙，報３５﹒７５銀；小象（０００１１）跳高逾５巴仙，報１２６﹒２銀；東亞銀行（０００２３）起哄近３巴仙，報１７﹒８２銀；中銀（０２３８８）跳高近４巴仙，報２２﹒６銀；渣打（０２８８８）起哄逾５巴仙，報４３﹒７５銀。

＊科指股潛水華虹向下推，鴻騰盈利跌手機佬跟跣＊

　　有華爾街分析師話，花旗科技股已經吵到尾水，而納指有機會跌一成；魚缸呢邊科指股股一齊潛水，華虹半導體（０１３４７）瀉逾一成，報２９﹒６銀；閱文集團（００７７２）潛水逾９巴仙，報４５﹒８銀；心動公司（０２４００）跌逾６巴仙，報４０﹒６銀；比亞迪電子（００２８５）跪低近半成，報２９﹒３５銀。另外，連日急升嘅移卡（０９９２３）明顯有獲利盤，收跌近一成四，報４５﹒６５銀。　　手機佬呢期真係風雨搖曳中，先係中美摩擦搞到佢地成磨心，然後鴻騰（０６０８８）中期純利倒退八成，上個月神州手機市場總體出貨量按年又跌近三成半，其他手機佬都幾難捱。鴻騰跪低逾４巴仙，報３﹒５９銀；瑞聲科技（０２０１８）跌逾２巴仙，報５７﹒１銀；不過舜宇光學（０２３８２）跟市升近２巴仙，報１４３﹒２銀；高偉電子（０１４１５）跌逾１巴仙，報２﹒９８元；丘鈦科技（０１４７８）跌近１巴仙，報１０﹒１２銀。

＊侵侵嬲嬲豬出口唔怕輸，金失二千銀金佬好頭痕＊　　　侵侵話，神州喺疫情期間對花旗國嘅所作所為後，已經好耐無同習主席傾電話粥。加埋花旗國由下個月２５號起，唔準有ｍａｄｅ　ｉｎ　Ｈｏｎｇ　Ｋｏｎｇ，淨係得番ｍａｄｅ　ｉｎＣｈｉｎａ，出口佬本來上午仲跌緊，下晝跟個市倒升，德昌電機（００１７９）跳近２巴仙，報１４﹒６２銀；新秀麗（０１９１０）抽高逾５巴仙，報８﹒２６銀；申洲（０２３１３）起哄３格，報１０５﹒４銀；敏華（０１９９９）軟４格，報９﹒７９銀。　　金價周二急潛逾半成，創七年嚟最大單日跌幅。現貨金都失守２０００美銀跌痛。而花旗國黃金期貨都走低收跌４﹒６巴仙，報１９４６﹒３０美銀。今日金礦股齊齊無力跌落！紫金礦業（０２８９９）唔見逾６巴仙，報４﹒６銀；山東黃金（０１７８７）潛水近４巴仙，報２１﹒４５銀；招金礦業（０１８１８）唔見近５巴仙，報８﹒７銀；中國黃金（０２０９９）跌逾７巴仙，報７﹒４銀；恆興黃金（０２３０３）撻低近６巴仙，報３﹒５８銀；靈寶黃金（０３３３０）潛水逾３巴仙，報１﹒４１銀。請請！　　　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

全新節目《說說心理話》青少年不可以戀愛！？真實個案講述驚心動魄經歷► 即睇