《小傳日記》上星期五花旗孖屐反彈，但係通脹憂慮升溫，十年債息維持響１﹒６厘水平，拖累香江魚缸高開低走。魚缸受惠石油佬高開２６４點，報２９３６２。但開心得一陣，呢排渣渣嘅科網佬就嚟料，魚缸掉頭向下，尾盤Ａ場又插多腳，納指期貨再潛低近２巴仙，魚缸一度大插６７６點，低見２８４２２，創２月１號以嚟新低，最終收報２８５４０，潛水５５７點或近２巴仙，失守兩萬九關同五十天線（２８９２４），主板成交按日增一成五至２７６７﹒８億銀。國指報１１０１４，走落２７７點或逾２巴仙。科指報８０８１，大跌５５２點或逾６巴仙，三個交易日累計唔見近１３００點，成年升幅冇哂。　　北水淨流出創２月２４號以嚟新高，錄１３１﹒８１億銀。　　Ａ場兩市都急回，上證綜指報３４２１，走低８０點或逾２巴仙，深證成指報１３８６３，潛水５４８點或近４巴仙。兩市全日成交９７９３億銀人仔，較上周五（５日）大增近一成二。　　大隻藍戰士方面，受惠美債息高企嘅大象（００００５）逆市踢高近４巴仙，報４７﹒７５銀；生發發（００３８８）話正在研究ＳＰＡＣ上市，仍要跣低逾５巴仙，報４５５﹒４銀；ＡＩＡ（０１２９９）腳軟近２巴仙，報９６﹒５５銀。　　最渣藍戰士係藥明（０２２６９），今日唔見近一成，報８０﹒８５銀，連跌３日，累計跌兩成一；吉利（００１７５）都冇咗逾９巴仙，報２２﹒０５銀，連跌３日，累計跌唔見近一成六。

＊魚缸殺估值科指佬失色，布油價抽高油佬行得好＊

　　花旗十年期債息再次逼近１﹒６厘，科技股繼續捱沽，估值愈高沽得愈狠，真係跌到懷疑人生。今日連估值已接近合理水平嘅ＱＱ（００７００）都失守５０天線（約６６７銀），唔見半成有多，報６４２﹒５銀；一向被視為高估值美團（０３６９０），潛水逾８巴仙，報３０８﹒８銀。今個星期派成績表嘅京東集團（０９６１８）即使分拆陸續有來，亦難逃被沽，仆低近６巴仙，報３３６﹒２銀。小米（０１８１０）被富時羅素踢出指數，插低近９巴仙，報２２﹒３５銀。阿里（０９９８８）滑倒近３巴仙，報２２０﹒６銀。至於快手（０１０２４）再穿底，撻低近７巴仙，報２６６銀。而表現最差科指成分股係微盟（０２０１３），唔見一成四，報１６﹒９４銀。　　外電報道話沙地阿拉伯個原油設施受到無人機襲擊，雖然無影響生產，但都刺激油價抽高，布蘭特油價更首次重返７０蚊美金水平，三桶油梗係開心啦。中海油（００８８３）跳高逾２巴仙，報９﹒５銀；中石油（００８５７）起哄逾４４巴仙，報３﹒０５銀，中石化（００３８６）彈起逾１巴仙，報４﹒４４銀。

＊銀行淨利增逆市向上伸，電訊佬轉燈中移動頭暈＊　　　　呢期金融板塊都逆市做強，中金分析話今年為上市銀行淨利潤增速，係過去５年最高一年，因為舊年基數低啊。而目前銀行股估值仍接近歷史較低水平，銀行佬有追捧，建行（００９３９）飛高１巴仙，報６﹒５６銀；工行（０１３９８）走上近２巴仙，報５﹒５６銀；農行（０１２８８）踢高逾４巴仙，報３﹒２銀。不過連跌３日嘅招行（０３９６８）仍然有沽壓，唔見逾４巴仙，報５８﹒７銀。　　電訊佬原本係朝早另一跑出板塊，好可惜魚缸愈跌愈勁，尾市都要齊齊轉燈。鐵塔（００７８８）舊年業績好過預期，先升後回，埋單打和報１﹒２３銀；中移動（００９４１）軟腳逾１巴仙，報５６﹒２５銀；中聯通（００７６２）走低近１巴仙，報５﹒０６銀；中電信（００７２８）滑倒逾１巴仙，報２﹒６５銀。請請！

　　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

全新節目《說說心理話》青少年不可以戀愛！？真實個案講述驚心動魄經歷► 即睇