《小傳日記》雖然花旗魚缸近排好旺，道指收高１７０００關，標普仲寫下歷史性一頁，第一次企喺２０００點大關之上，點知都唔可以幫香江沖喜。今朝（２７日）大隻佬指數踢一踢高之後，食完午飯返來就完全無晒力，眨下眼最多唔見１９１點，好友氛勢受挫，喺聽日（２８日）期指結算日前，要同二萬五關兼十天線（約２５０２６點）ｓａｙ　ｇｏｏｄｂｙｅ。恆指收市跌１５５點，報２４９１８。　　Ａ仔場雖然力守二千二重要關口，收報２２０９點，但形勢都有啲危，而國貨佬指數亦碌低５０點，收報１１０７４。全日成交就多番ＤＤ，約有６７６億銀左右。

＊中電信叻叻粉絲來錫錫，中移動仲叻撐市得呢隻＊

　　業績期仲有兩日，繼聯通（００７６２）、祖國移動（００９４１）分別喺８月第１個、第２個星期四放榜後，祖國電信（００７２８）終趕得切坐尾班車，喺８月最後一個星期，不過唔係星期四，而係星期三，即係今日派成績表。　　正所謂好戲在後頭，估唔到祖國電信咁叻，喺今年上半場賺１１４億人仔，按年升１２巴仙。雖然佢照樣唔派息，但好過孖屐估計嘅１１２億人仔少少，總算剝晒班吹水佬棚牙。唔止咁噃，除咗數據服務收入、ＡＲＰＵ都齊齊上升之外，就連手機補貼都補少咗１８巴仙，喺多重好消息刺激下，祖國電信午後曾抽升逾４巴仙，高見４﹒５２銀，創近兩年高位。雖然埋單時升勢稍稍回順，但都收報４﹒４１銀漲１﹒６巴仙；而聯通則輕輕踢高０﹒２巴仙，收１３﹒１４銀。受惠行家報喜，兼且要肩負撐住指數嘅重任，祖國移動亦升逾１巴仙，收９４﹒８５銀

＊油服靚到暈勿忘公仔圖，世房大踏前富力卻倒行＊

　　呢幾日石油石化股輪住升，三大巨頭都有唔錯表現。中石油（００８５７）今日放榜前都仲企得穩，收１１﹒２８銀；中海油（００８８３）就開始有啲疲態，回番近２巴仙收１５﹒１６銀，但係同門師弟中海油服（０２８８３）派完中期業績，多賺３９巴仙至４４億人仔之後。花旗即出報告唱好，大讚業務增長好勁，份業績夠晒省鏡，上望目標２４﹒３銀。缸友即刻唔理三七廿一，衝入去買貨，推高中海油服去到２１﹒８銀漲逾８巴仙，係最威水國貨佬，成交仲急增至近１１億銀添。不過缸友都唔好太過興奮，皆因睇公仔圖已經出現咗「射擊之星」，有見頂回調嘅危機呀！　　另一邊廂，世房（００８１３）同富力（２７７７）就上演「天與地」。世房份成績表夠晒勁畀大行唱好，一度急升近６巴仙，雖然完場縮咗少少至約４巴仙，但都夠晒交差；富力者份業績就真係無眼睇，里昂仲踩多一腳叫缸友死心沽貨，股價想唔跌都難，收市就碌低近４巴仙。

＊四叔好成績炒高來慶祝，信置快放榜表現有點俗＊

　　香江地主今日都要跟住個市跌，當中信置（０００８３）收市後放榜，完場要倒跌近１巴仙收１３﹒８４銀，睇嚟粉絲們都無咩信心。不過，恆地（０００１２）就跑贏晒其他街坊，仲做埋最威水藍戰士。全靠中期核心盈利增加４６巴仙嘅佳績，股價成功衝高４巴仙收５３﹒５銀，仲一度創埋逾６年半高位，向住上市新高６０﹒４７銀邁進！　　除此之外，今日一班電力股都叉夠電，大唐發電（００９９１）今日公布成績前就逆市升逾３巴仙收４﹒２４銀，仲帶挈埋華能國際（００９０２）追落後，抽高近５巴仙收９﹒０１銀，華電國際（０１０７１）都升逾２巴仙，完全無受祖國下調上網煤電價格嘅影響。就連潤電（００８３６）總裁王玉軍被立案調查，都可以倒升番１巴仙，勁！

＊阿爺夠關顧比亞迪踩油，巴克萊發功廣汽似漏氣＊

　　幾時都話有阿爺照住，股價都會硬淨啲！睇吓比亞迪（０１２１１），前日公布業績，唔單止成績唔對辦，仲發埋盈警，但係股價跌咗都唔夠一日就已經升番上嚟。今日西安出台新能源車推廣政策，加埋又傳出阿爺會再拎千億銀設立基金，用嚟起電動車充電站，比亞迪當堂中咗頭獎咁，飛升近６巴仙收５３﹒９銀。　　睇見比亞迪咁得寵，傳統砵砵車之一嘅廣汽（０２２３８）就梗係酸溜溜啦。明明中期都多賺４２巴仙，比舊年同期倒退１８巴仙好得多，點知畀巴克萊話按季表現唔掂，維持番「與大市同步」評級，搞到股價急插近６巴仙收８﹒１６銀，最差表現國貨佬是也。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式之　　　　　　　申述或訂立任何建議及推薦，讀者務請運用個人獨立思考能力自行作出投資決定　　　　　　　，如因相關建議招致損失，概與《經濟通》、編者及作者無涉。

全新節目《說說心理話》青少年不可以戀愛！？真實個案講述驚心動魄經歷► 即睇