《小傳日記》捱過「五窮六絕」之後，缸友當然寄望「七翻身」喇；可惜事與願違，變成「七葬身」。今個月第一個禮拜就已經跟住Ａ股插落去，一度連二萬三都穿埋，突如其來嘅「股災」，嚇到缸友腳都軟埋。好彩經過阿爺「暴力」救市，香江魚缸先有機會療傷，不過牛熊線大關始終被攻陷咗，呢幾日個市都呆呆滯滯，成交淡靜。總結７月份，恆指唔見１６１３點，無咗６個巴仙。　　今日（３１日）香江魚缸又係有頭威無尾陣，衝高百幾點左右，又被Ａ股拖累縮番晒落去。點知收市前一兩分鐘，部分藍戰士突然反擊，長和（００００１）、ＱＱ（００７００）同中移動（００９４１）都抽高１至２巴仙，有助魚缸攞番１３８點落袋，收２４６３６。中資股弱勢，國指最終都收復唔晒失地，都要輕輕碌低５點收１１１３１。　　全日魚缸都拍烏蠅，只得７７７億銀左右。悶！睇嚟放完假返來，踏入８月業績期先會有清晰Ｄ嘅方向。

＊哀哉７月份唔見千六點，金沙果翻身街坊也好掂＊

　　馬交賭收可能喺聽日至５號期間揭盅，前日（２９日）嗰邊崔特首話，７月份博彩收益應該跌到１８０億澳門紙左右，上年７月賭收２８４億左右，即係都仲係跌３７巴仙左右，仲係未有起色，但賭仔今日率先反彈，似乎預示否極泰來。銀娛（０００２７）彈高６巴仙，做咗最叻藍戰士，收市報３５﹒７銀，一口氣升破多條平均線，但已經升到下降軌頂部，要衝破埋呢關，就真係要靠數據啦。鄰居金沙（０１９２８）緊隨其後，亦踢高逾４巴仙，收３４﹒３銀。話時話，金沙係７月最靚藍戰士，彈起３１％。　　長和系今日表現唔錯，長和（００００１）噚日傳會同Ｖｉｍｐｅｌ　Ｃｏｍ合併意大利電訊業務，到時會變咗最大間電訊公司，將會有三千萬個用戶，結果今日埋單前突然衝高逾２巴仙，報１１５﹒１銀，旗下電能實業（００００６）更加由頭升到落尾，以逾３巴仙，做咗第三叻藍戰士。

＊９６６盈喜股份卻不起，大象企定定聯想無遐想＊

　　中國太平（００９６６）發盈喜，預計截至今年６月底止中期純利增長會超過１﹒８倍，舊年同期盈利都只係１９億銀。公司話純利增長原因，係因為集團保險業務繼續保持健康增長，以及集團權益類投資嘅實現收益錄得非常大幅增長所致，但係股價今日踢唔起，仲要逆市跌逾３巴仙收場，報２３﹒１５銀。　　大笨象（００００５）有關回歸嘅傳聞多多，有分析話公司回歸可能性低，而公司就改咗喺下星期一（３日）中午就放榜，到時話唔定有消息。股價今日就企定定，收６９﹒７銀。　　聯想（００９９２）表現真係麻麻，趴低近３巴仙，報８﹒４１銀，早前仲被里昂削目標價，股價今日最低８﹒３８銀，創逾一年新低，係最差表現藍戰士。

＊天然氣降價朋儕卻鼓掌，先達有異樣瀚洋亦向上＊

　　噚日據報阿爺會降天然氣價格，但天然氣股今日表現繼續神勇，華潤燃氣（０１１９３）急升９巴仙，報２３﹒６５銀，一口氣升破所有日均線。街坊新奧能源（０２６８８）亦踢高４巴仙，報５１﹒５銀，升破百天線。　　物流股今日都好威，先達國際物流（０６１２３）急升逾１８巴仙收報１﹒３６銀，低位大陽燭升破十天及廿天線。小傳查吓咩事，發現中央結算系統亦有異動，見到噚日渣打銀行（香港）有限公司突然多咗４６﹒２９巴仙持股，咁啱就係主席持股量，睇嚟有Ｄ景轟喎，唔簡單！街坊瀚洋物流（０１８０３）亦都跟升逾１５巴仙，報０﹒９８銀，升破２５０天線。

＊協同忽炒上停牌伸伸手，玫瑰金魅力瑞聲跳隻舞＊

　　協同通信（０１６１３）今日突然快速起機，成交急升至近２億銀，創三個月以嚟最大單日成交，股價今日抽高咗逾２３巴仙，報０﹒２３４銀，之後仲停埋賽添！噢，原來公司準備做伸手牌，難怪升得咁急啦！　　江山控股（００２９５）今日錄得多手共３﹒３億股非自動盤大手交易，股價都踢起５巴仙，報１﹒０５銀。　　缸友等到頸都長埋嘅唉瘋６ｓ（ｉｐｈｏｎｅ　６ｓ）有照片流出，據聞有玫瑰金色，缸友期待嗎？不過個別蘋果概念股就有跑出嘅意味，瑞聲（０２０１８）就踢起逾４巴仙報４４銀。不過，舜宇光學（０２３８２）就碌低逾４巴仙，報１４﹒９６銀。假期愉快，請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式之　　　　　　　申述或訂立任何建議及推薦，讀者務請運用個人獨立思考能力自行作出投資決定　　　　　　　，如因相關建議招致損失，概與《經濟通》、編者及作者無涉。

etnet榮獲HKEX Awards 2023 「最佳表現證券數據供應商」大獎► 了解詳情