《小傳日記》侵侵（特朗普）隔晚接受傳媒訪問時話，如果有助中美貿易協議，會介入華為孟晚舟案，加上中美重新開始貿易協商，為兩國元首下個工作時間表交換意見，令市場憧憬中美關係會有好轉，不過隨後佢就話，民主黨如果喺邊境修牆法案上唔合作，就威脅會暫停聯邦政府運作，令花旗國魚缸由升到跌，道指由升３６８點，最終收跌５３點，報２４３７０點；標指數下跌不足一點，報２６３６點；納指漲１１點報７０３１點。　　利淡消息影響花旗國，但唔見影響香江，相反隔晚有傳楓葉國（加拿大）法院，批准華為大小姐保釋，消息令到一眾缸友心都定啲，齊齊買貨，魚缸今日高開２８２點報２６０５４點，收復５０天線（約２５９５３點）同２６０００關口，其後受惠多隻藍戰士企穩，內需股同內房股再起，魚缸最多升４５３點見２６２２４點，但之後無力再上，最終全日走高４１５點或近２巴仙，報２６１８６點，主板總成交近６９４﹒９７億銀升近７巴仙。國貨收報１０４１７，走高１７２點升近２巴仙。　　Ａ場方面，上證全日微漲８點，報２６０２點，成交８８９億人仔。　＊財務涉造假恆安被打靶，加息或延遲地產股奔馳＊　　　香江重磅藍戰士今日向左走向右走，ＱＱ（００７００）走高２巴仙，報３１６﹒８銀。生發發（００３８８）同大象（００００５）升１巴仙，分別報６４銀同２３０銀，ＡＩＡ（０１２９９）升３巴仙，報６３﹒９５銀。　　繼瑞聲（０２０１８）同舜宇（０２３８２）呢兩隻藍戰手機設備孖寶被沽空機構狙擊後，神州衛生用品一哥恆安（０１０４４）噚晚亦中招，被沽空機構「ＢＯＮＩＴＡＳ」話佢造假數，有大嗱嗱１１０億人仔嘅淨收入係捏造出嚟，更加自２００５年起記錄「假現金（ｆａｋｅ　ｃａｓｈ）」，仲話孭起唔少債務嘅恆安其實係一蚊都唔值。缸友知道恆安畀人狙擊後仲唔拿拿臨散水咩，朝早最多插咗近９巴仙，低見５５﹒１５銀，創近一年半新低，之後跌幅收窄至近６巴仙後即刻潛水停牌，停牌前報５７﹒０５銀。　　花旗國上個禮拜公布嘅非農數據走咗樣，之後就有聯儲局官員出嚟「放鴿」，話可能會推遲至出年先加息，侵侵噚日仲出嚟「發噏瘋」，話下個禮拜如果聯儲局加息嘅話係一件好蠢嘅事。加上魚缸今日反彈，本地磚頭佬全線造好，信置（０００８３）彈起超過３巴仙，報１３﹒８２銀。長實（０１１１３）亦都升近３巴仙，報５６﹒９５銀。恆地（０００１２）同新世界（０００１７）都跳高超過２巴仙，報３９﹒６５銀同１０﹒６６銀。　＊青啤急飆升買咗笑盈盈，基建股炒上中鐵建上揚＊　　　魚缸回升不過缸友買貨仍然以防守股為主，其中內需股同基建股表現標青，今日內需股入邊以青啤（００１６８）表現最突出，噚日大摩就話青啤營運平穩，但估值合理，所以首予佢「同孖屐同步」評級，「他屐」睇３５元，最終全日踢高逾５巴仙，以近全日高位３２﹒２銀收市，收復十天（約３１﹒４６５銀）同廿天線（約３１﹒３２８銀），街坊潤啤（００２９１）噚日升２巴仙之後，今日再升近２巴仙，報２８﹒３銀。另外，豬肉佬萬洲（００２８８）今日一支陽燭炒上，收復所有平均線，漲近６巴仙，報６﹒１３銀，叻！旺旺（００１５１）四連跌後，反彈５巴仙，報５﹒５９銀；統一（００２２０）升逾２巴仙，報６﹒７５銀；蒙牛（０２３１９）跌唔足半巴仙，報２３﹒９５銀。　　基建股炒起，中鐵建（０１１８６）中標採剝工程涉逾３０億人仔，今日彈起逾５巴仙，報１０﹒５４銀。中車（０１７６６）出售兩個附業畀阿媽中車集團，收返７億人仔，今日踢高近３巴仙，報７﹒６３銀，中鐵（００３９０）升５巴化，報７﹒２９銀；中交建（０１８００）跟升逾３巴，報７﹒５１銀。　　＊人民幣爬高內房好襟撈，德銀唔睇好賭股逆市倒＊　　　中美貿戰降溫，人仔今日再度收復６﹒９關，離岸人仔（ＣＮＨ）今日仲高見６﹒８７８３，對於孭住唔少人仔債務嘅內房佬嚟講，人仔升值緊係有著數啦，佢地今日都齊齊彈高，潤地（０１１０９）獲瑞信維持「跑贏孖屐」評級，「他屐」３７﹒１銀，全日抽升近７巴仙，報３０蚊，係表現最佳藍戰士！世房（００８１３）揚４巴仙，報１９﹒９４銀。中海外（００６８８）升半成，報２７﹒１銀。融創（０１９１８）走高超過３巴仙，報２６﹒３５銀。碧桂園（０２００７）跟升近３巴仙，報９﹒４５銀。雅居樂（０３３８３）升近２巴仙，報９﹒８８銀。　　野村發表報告表示，１２月首九日澳門每日博彩收入平均有８﹒７８億馬交幣，較１１月平均的８﹒３３億馬交幣升半成，符合佢地嘅預期。該行又預料當地１２月博彩收入將會增長一成至一成半，但德銀睇衰賭佬，搞到佢地今日普遍都要仆低。永利馬交（０１１２８）被德銀降「他屐」由２２蚊降至１８﹒４銀，評級就由「買貨」降至「ｈｏｌｄ貨」，全日跌近２巴仙，報１８蚊。　　金沙（０１９２８）亦遭德銀將「他屐」由３９蚊降至３０蚊，評級由「ｈｏｌｄ貨」下調至「賣貨」，全日走低超過２巴仙，報３４﹒５０銀。美高梅（０２２８２）跌近２巴仙，報１３﹒５４銀。新濠（００２００）就好ｃｏｏｌ，自己走高近２巴仙，報１５﹒１銀。　＊阿媽明入缸藥明唔心慌，中移好風騷鐵塔創新高＊　　　藥佬今日個別發展，ｍｏｍｍｙ藥明康德（０２３５９）聽日掛牌，每股大約以招股價中間價６８蚊定價，藥明生物（０２２６９）今日食住個勢上，全日走高逾４巴仙，報５４﹒６銀。百濟神州（０６１６０）跟升２巴仙，報８１﹒８銀。恆大健康（００７０８）微升唔夠半巴仙，報１０﹒４６銀。石藥（０１０９３）就好ｄｏｗｎ，全日自己走低近２巴仙，報１２﹒７８銀；中生製藥（０１１７７）跌半巴仙，報５﹒３９銀。　　中資電訊佬今日好ｍａｎ，神州電信（００７２８）升１巴仙，報３﹒９８銀。聯通（００７６２）走高超過１巴仙，報８﹒８１銀。鐵塔（００７８８）全日抽升７巴仙，報１﹒３７銀，最高見１﹒３６銀，創埋上市新高，兼全日最勁國貨佬。祖國移動（００９４１）升超過２巴仙，報７７﹒２銀。請請！　　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

etnet榮獲HKEX Awards 2023 「最佳表現證券數據供應商」大獎► 了解詳情