《小傳日記》有消息傳中美就嚟傾好首階段貿易協議，而花旗國亦應承延遲加徵神州商品關稅，噚日（１２日）花旗魚缸收到料，三大指數即刻生猛跳起兼破哂頂；加上米字國大選，首相約翰遜幾乎大獲全勝，即意味米字國將踏上脫歐之路，唔再唔拖唔水。有咁好多消息齊齊出，帶挈香江魚缸都一齊向上衝，今朝（１３日）裂口高開５００點報２７４９４跨過二萬七關。　　好事陸續有嚟，人仔再次升破７算創月內新高，造好濠賭佬、內銀內險佬同歐洲相關佬，佢哋全日帶頭領漲魚缸。下晝仲愈升愈有，最終恆指以全日高位收報２７６８７點，大漲６９３點，升２巴仙半有多，收復「牛熊線」（２７４６５點），連升三日累漲１２５１點，升幅近４巴仙。主板成交１１７１億銀增近三成。國企指數報１０８３８點，升２２３點或逾２巴仙。今日似乎係淡友嘅「黑色星期五」。　　內地Ａ場表現相當精彩，上證綜合指數報２９６７點，升５１點，升幅近２巴仙。深證成分指數報１０００４點，升１６８點，升幅亦有近２巴仙。兩市合共成交５６５６億銀人仔。　　大隻藍戰士今日發力，德勤預計明年香江新股「孖屐」有力爭取三甲位置，生發發（００３８８）跳起逾２巴仙，報２５５﹒４銀。ＱＱ（００７００）踢高逾３巴仙，報３６１銀。神州移動（００９４１）跳高逾２巴仙，報６１﹒６銀。友邦（０１２９９）起飛近４巴仙，報８２﹒６５銀，勁！　　另外，石藥（０１０９３）軟腳不足半巴仙，報１７﹒７４銀，係表現最差嘅藍戰士，慘！

＊阿爺送大禮濠賭升凌厲，人仔破７算內銀點會輸＊

　　有消息指神州主席習大大（習近平）下星期將會去馬交宣布一系列新政策，包括整個以人仔計價嘅證券交易所，同加快建設人仔結算中心等等。加上人仔強勢回歸，濠賭佬幾乎成為今日嘅大贏家！銀娛（０００２７）勁升近７巴仙報５７﹒９５銀，金沙（０１９２８）踼高逾５巴仙報３９﹒６５銀，包辦表現最好嘅藍戰士冠亞軍！永利馬交（０１１２８）彈高近６巴仙，報１８﹒２６銀。新濠（００２００）跳彈近５巴仙，報２０﹒３銀。美高梅（０２２８２）飛起近８巴仙，報１３銀。　　Ａ場一樣走勢強，加上人仔再度破七，帶動神州銀行佬齊齊坐火箭。招行（０３９６８）起飛逾４巴仙，報３９﹒３５銀。建行（００９３９）同農行（０１２８８）跳起近２巴仙，前者報６﹒５１銀，後者報３﹒２９銀。工行（０１３９８）彈起逾２巴仙，報５﹒８銀。中行（０３９８８）跳高近２巴仙，報３﹒２６銀。

＊保守黨獲勝歐洲股要升，孖屐表現佳銀行上梯階＊

　　米字旗國大選終於落幕，保守黨贏得過半數議席，相信脫歐已成定局啦，刺激英鎊彈超過２巴仙仲創舊年６月以來高位，一眾同當地有生意同當地有資產嘅股佬當然彈哂上去。創科（００６６９）抽高４巴仙，報６３﹒４５銀。保誠（０２３７８）飆７巴仙，報１４５﹒４銀。長和（００００１）起飛５巴仙，報７４﹒２５銀。敏華（０１９９９）踼高４巴仙，報５﹒７銀。　　除咗米字旗國大選嘅好消息之外，神州同花旗國有機會達成貿易協議，搞到人仔破７算，今日「孖屐」表現咁好，本地銀行佬當然都然表現唔執輸。匯控（００００５）跳高３巴仙，報６０﹒３５銀。恆生（０００１１）彈起３巴仙，報１６３銀。東亞（０００２３）鏟高１巴仙，報１８﹒０８銀。渣打（０２８８８）起哄５巴仙，報７４﹒７５銀。中銀（０２３８８）炒高３巴仙，報２７﹒６銀。

＊孖屐急急升新經濟得戚，貿戰似暫停手機佬即醒＊

　　今日「孖屐」急急大升，一舉過近七百點，新經濟股都受惠，好似眾安再綫（０６０６０）咁，今日飆８巴仙，報３０﹒１銀，成個月累升一成一。小米（０１８１０）叻叻豬飛起近半成，報１０﹒４銀。美團點評（０３６９０）漲近１巴仙，報１０１﹒１銀。阿里巴巴（０９９８８）升近１巴仙，報２０２銀。但金軟（０３８８８）則軟逾１巴仙，報１９﹒３銀。　　侵侵（特朗普）好似話同美中貿協即將達成，成為今日急升主因，另外泡菜三叔（三星電子）又發個喜帖，話公司已經賣出１００萬部Ｇａｌａｘｙ　Ｆｏｌｄｓ。雙重消息底下，手機佬又再飛啦，通達集團（００６９８）踢高近２巴仙，報０﹒６５銀。瑞聲科技（０２０１８）見過一年高位，升逾半巴仙，報６６﹒１５銀。富智康（０２０３８）漲近３巴仙，報１﹒４２銀。舜宇光學科技（０２３８２）升逾２巴仙，報１４２﹒７銀。祝各位周末愉快！請請！（ｚｚ）

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

全新節目《說說心理話》青少年不可以戀愛！？真實個案講述驚心動魄經歷► 即睇