《小傳日記》花旗國科技佬噚晚（１２日）發威向上衝，亞馬遜、ｆｂ帶領下納指收高逾１巴仙至７８２３點，創收市新高。道指都跳起２２４點收２４９２４點，貿易戰陰霾好似突然「被忘記」咗一樣。　　香江科技佬梗係都趁機叨叨光，小米（０１８１０）成為魚缸最受歡迎新星，唔單止飆升逾１１巴仙破頂，仲大拿拿錄得逾７６億銀成交，佔咗全日魚缸總成交逾９巴仙，遠遠拋離排第二，錄得近４７億銀嘅股王ＱＱ（００７００）！　　科技佬咁風騷，香江魚缸今朝都好地地高開２０８點報２８６８９，不過中字輩無力，拖累大市尾市縮晒水，得番４４點落袋報２８５２５；國指更要碌低６點收場，報１０７４６；成交近８４５億銀。　　＊資金湧小米成交第一位，科技佬走高舜宇叫聲好＊

　　收市後將會納入富時中國５０指數嘅小米又再落鑊喇，成功突破咗廿蚊破格位，最高見過２１﹒８銀破頂，埋單都依然跳起逾１１巴仙，報２１﹒４５銀，市值升到去４８００億銀，係連續第三日彈高，全日成交仲有成大拿拿７６﹒２２億銀，過埋ＱＱ成為今日第一，佔全日主板成交９巴仙，哇！　　華爾街魚缸Ｄ科技佬噚日做得唔錯，帶動埋香江街坊一齊衝前。舜宇（０２３８２）上一日受靚靚數據帶動之後，今日一度再彈高近４巴仙，不過尾市就縮返晒，只係得０﹒３巴仙進帳。瑞聲（０２０１８）就借機會追落後，踢高逾２巴仙，報１０８﹒３銀。　　大隻佬ＱＱ今朝都跟住彈高過近２巴仙，高見３８６﹒８銀，一度收復十天線（３８６﹒３銀）同２５０天線（３８５﹒８１銀），可惜之後縮返唔少，最終只係輕輕踢高近０﹒３巴仙，收報３８１銀。

＊華晨又再碌受傷好木獨，醫藥佬衝前復星領個先＊

　　噚日有傳寶馬爭合資控股權，搞到華晨（０１１１４）已經碌低咗差唔多１３巴仙，雖然最新摩通繼續為佢投下信任一票，畀個２０銀「他屐」，不過缸友唔領情，今日又要再碌低近３巴仙，收報１１﹒６４銀。呢兩日已經累跌咗１５巴仙喇，慘！　　上一日先講完中興（００７６３）獲花旗國放生彈高，今日一開波都衝前過３巴仙，不過花旗國有議員話要求恢復制裁行動，搞到今即刻回吐逾１巴仙，收報１３﹒７４銀。　　是日有唔少醫藥佬都做得唔錯，復星醫藥（０２１９６）彈起過７巴仙一度收復廿天線（４２﹒７１５銀），埋單都仍然跳起近４巴仙，報４１﹒９５銀。　　街坊國藥（０１０９９）同埋藥明生物（０２２６９）都幾叻仔，分別升逾２巴仙同埋逾３巴仙，埋單報３３銀同８２﹒４５銀。　　另外，威高股份（０１０６６）前幾日話中證監批左佢地將唔超過約２６﹒４億股非上市股份或內資股類別股份，轉換為Ｈ股並上市。聽到咁好嘅消息，今日再飛起近１３巴仙，報６﹒３４銀。

＊瑞信讚佳績蒙牛好招積，花旗叫入貨周大福慶賀＊

　　蒙牛乳業（０２３１９）被瑞信唱好，估計佢業績將會幾省鏡，決定升盈利預測，畀個「跑贏大市」評級，目標價維持在３５銀，蒙牛升逾５巴仙慶祝，報２６﹒７銀，破埋１０天線（２５﹒９４銀），兼係全日升幅最大藍戰。　　另一邊廂，周大福（０１９２９）公布祖國同店銷售按年增長４巴仙，港澳同店銷售就增長２６巴仙，獲花旗睇好佢，將評級升到「買入」，目標價１０蚊。收市開心跳高近４巴仙，報８﹒９元。但麥格理都維持目標價１１﹒６蚊，評級「中性」唔變添。　　好消息陸續有嚟！鞍鋼（００３４７）話估計今年鋼材市場好境，加上公司不斷提升產量規模、持續優化產品結構等，效益大大提升！頭６個月利潤料比上年高近９２巴仙！但又係尾市唔夠力，收市只升近１巴仙報７﹒１銀。

＊半新丁急升恆偉最精靈，紫元元落鑊破頂好勁喎＊

　　一班七月踏入香江魚缸嘅半新丁表現都唔錯。不得不提，喺祖國做設備融資租賃服務嘅紫元元（０８２２３），自今個星期一（９日）上場後，一路都未「潛過水」，今日仲大幅炒高近３７巴仙，報２銀，創上市新高添，真係紅到發紫。　　噚日浩浩蕩蕩，一齊登場嘅８位新丁當中，恆偉集團（０８２１９）鑊氣都十分旺盛，飆升近９４巴仙，報０﹒９６銀，較０﹒２５銀上市價高近３倍，勁啊！映客（０３７００）都唔執輸，６﹒７億銀成交踢高逾１７巴仙收５銀。　　至於今日掛牌嘅精英匯集團（０１７７５），即係教育公司遵理阿媽，表現都好巴閉，最多飛到去１﹒４５，收市就報１﹒３２銀，較１﹒０８銀招股價高逾２２巴仙。周末愉快！請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

etnet榮獲HKEX Awards 2023 「最佳表現證券數據供應商」大獎► 了解詳情