《小傳日記》本來花旗嘅「孖屐」走勢都仲幾好，納指仲日日向上破頂，亞洲個市本來都仲向上走緊，但因為香江預備迎來第三波疫情，搞到大家都無晒信心，早市都由升轉跌，全日魚缸都係二萬六關口浮沉。不過新經濟股似乎都十分生性，一聽到恆指公司話預備搞個「港板納指」，ＡＴＭＸ四大金剛都開晒車。最後恆指尾市輕微高收，收報２６２１０點，升８０點或升近半巴仙，主板成交２０６８﹒３１億銀。國貨報１０７８１點，升３３點或近半巴仙。　　內地Ａ場走勢強勁，上證綜合指數報３４５０點，升４７點或逾１巴仙；深證成份指數報１３７５４點，升３４８點或近３巴仙。兩市合共成交１７２６１﹒８７億人仔，較上日增加１１﹒９％。　　大隻藍戰士方面，大象（００００５）升近半巴仙，報３７﹒１銀；生發發（００３８８）連日破頂升近４巴仙，報３７０﹒６銀；ＱＱ（００７００）又起飛破頂，踢高近４巴仙，報５６３銀；中移動（００９４１）升逾半巴仙，報５６﹒４銀；ＡＩＡ（０１２９９）軟腳唔夠半巴仙，報７６﹒５銀。

＊日日返高位恆隆真有計，內險繼續衝國壽真輕鬆＊

　　磚頭佬可能呢期都沉到底，見個大市開車都跟埋一齊走，加上早幾日又有大行唱好地產界，恆隆（００１０１）呢期真係大紅人，股價日日開車日日ＧＯ，今日又重返高位，收漲近半成，報２１﹒６銀；不過其他磚頭佬就弱小小啦！新地（０００１６）跌近２巴仙，報９８﹒１５銀；新世界（０００１７）潛逾２巴仙，報４０銀；長實集團（０１１１３）跪低近２巴仙，報４６﹒９銀；太地（０１９７２）跌逾１巴仙，報１８﹒５８銀；　　內險佬同樣都係升市回歸行列之一，例如國壽（０２６２８）預備去海南島大展拳腳，並係個處嘅自貿區設立投資資金，今日股價再飛逾１巴仙，報２０﹒９銀；平保（０２３１８）跟漲近半巴仙，報８９﹒６５銀；新華保險（０１３３６）踢高近半巴仙，報３４﹒４銀；中國太保（０２６０１）跌近１巴仙，報２６﹒０５銀；中國財險（０２３２８）回吐近２巴仙，報７﹒５銀。

＊油需求復甦中石油走高，金價再突破黃金無買錯＊　　　神州汽油消費有復甦嘅跡象，隔晚紐油企上４０美金，不過油價喺亞洲交易時段回軟，三桶油高開低走。另外，神州舊年公布成立國家油氣管網公司，消息指，三大龍頭油企已聘請咨詢顧問，希望喺９月底前完成資產劃轉。中石油（００８５７）漲逾２巴仙，報２﹒８７銀；中石化（００３８６）走高逾１巴仙，報３﹒４９銀；中海油（００８８３）軟近１巴仙，報８﹒８銀；中海油服（０２８８３）撻低近２巴仙，報６﹒９６銀。　　全球新冠疫情持續，避險需求推高黃金價格，隔晚美國黃金期貨續揚，現貨金亦企穩１８００美金，黃金佬繼續有得彈！山東黃金（０１７８７）繼續破頂，漲逾４巴仙，報２１﹒１銀；紫金礦業（０２８９９）走高近６巴仙，報４﹒９３銀；壇金礦業（００６２１）起哄逾兩成一，報０﹒０３４銀；靈寶黃金（０３３３０）急漲近兩成四，報１﹒１５銀；招金礦業（０１８１８）揚近４巴仙，報１０﹒５８銀；ＳＰＤＲ金ＥＴＦ（０２８４０）揚近１巴仙，報１３２２銀。

＊「摩笛」吹奏勁手機有炒力，晶片飛唔停中芯華虹醒＊

　　手機佬方面除咗承接噚日嘅升勢，今日亦有唔少消息利好版塊表現，而最勁應該就喺有「摩笛」幫手吹奏！事關摩根士丹利話手機佬最差階段或者已經過去，而且頂計佢仲有得再升高，炒起手機佬！通達集團（００６９８）飛高逾１１巴仙，報０﹒５８銀；丘鈦科技（０１４７８）彈上逾８巴仙，報１２﹒４２銀；比亞迪電子（００２８５）跳過近６巴仙，報２２﹒２銀；瑞聲科技（０２０１８）彈上逾３巴仙，報６１﹒３５銀；高偉電子（０１４１５）抽高逾２巴仙，報３﹒５７銀；舜宇光學（０２３８２）升上逾２巴仙，報１４７﹒４銀；富智康（０２０３８）彈高逾１巴仙，報０﹒９４銀。　　而晶片佬方面今日繼續ｃｈｏｋ高！早前中芯（００９８１）喺Ａ股科創板上市有成５６６倍超額認購成Ａ股集資額最高新股，拉起晶片佬繼續ｃｈｏｋ高！中芯微彈唔夠半巴仙，報３９﹒９５銀。而華虹半導體（０１３４７）今日午市亦破頂造３５﹒４銀表現威威！飛高逾一成四，報３４﹒１銀；中電華大科技（０００８５）彈上逾兩成，報１﹒０６銀；ＡＳＭ（００５２２）跳高逾一成二，報１００﹒４銀；腦洞科技（０２２０３）抽高近２巴仙，報０﹒３２銀。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

etnet榮獲HKEX Awards 2023 「最佳表現證券數據供應商」大獎► 了解詳情