《小傳日記》華爾街魚缸上個禮拜五（２０日）略為牛皮，三大指數都微微錄得單位數字嘅跌幅，道指碌低６點，報２５０５８點；標指跌咗２點報２８０１點；納指就跌５點報７８２０點。　　不過，唔好以為貿易戰無惡化到呀，侵侵（特朗普）又重申話對大約５０００億美金嘅中國商品加徵關稅，只係缸友可能慣咗侵侵呢Ｄ招數，所以都無太大反應。香江魚缸今朝（２３日）仲高開７４點報２８２９８點，其後彈過１６７點高見２８３９１點，但已經係全日最高位喇。不過，股王ＱＱ（００７００）全日捱沽，仲試過穿３７０銀低見３６９﹒２銀，埋單都收跌逾１巴仙報３７１銀，拖累魚缸一度掉頭向下，最多跌過１３３點，低見２８０９１點。　　好彩內銀佬發威，領展（００８２３）抽高近３巴仙報７７﹒１５銀破頂收市，魚缸最終收市輕微踢高３１點，埋單報２８２５６點。主板成交今日又再縮返，只係有８３９﹒５８億銀，比上日少逾１６巴仙。　　國指今日就跑贏些少，彈起４８點埋單報１０７３１點。Ａ場就有約１巴仙進帳收２８５９點。

＊內銀衝得前信行一支箭，賭佬食得滯金沙好濕滯＊

　　內銀佬今日做得唔錯，中金指資管新規畀之前版本較鬆，信行（００９９８）仲有麥格理唱好，升評級同埋「他屐」，最多曾經衝前過４巴仙，之後就縮返些少，全日彈高逾２巴仙，報４﹒８９銀。街坊工行（０１３９８）同招行（０３９６８）分別踢高咗逾１巴仙同近２巴仙，報５﹒６３銀同埋２９﹒３５銀。　　東瀛通過開賭，估計最快２０２０年就可以見到首個賭場喇！彈珠機佬ＮＩＲＡＫＵ（０１２４５）一聽到就飛起咗１７巴仙，不過之後就縮晒水，全日只係升近３巴仙收０﹒７１銀。　　至於濠賭佬反應就唔係特別大，今日表現亦都唔見有咩大方向，銀娛（０００２７）輕微彈高０﹒４巴仙，報６２﹒２５銀；金沙（０１９２８）放完飯就突然轉勢向下，最終碌低近２巴仙，報３９﹒７５銀；美高梅（０２２８２）都跣低近２巴仙，報１６﹒３６銀。

＊假疫苗風波藥明未怕過，融創報個喜股價即彈起＊

　　祖國近排受內地長生生物（深：００２６８０）嘅假疫苗事件困擾，搞到香江成班醫藥佬都齊齊被拖落水，加上國務院總理李克強先前督促推動抗癌藥加快降價，直頭係雪上加霜啊。藍戰石藥（０１０９３）碌低近４巴仙，埋單報２１﹒４５，係今日表現最差嘅藍戰士。街坊國藥（０１０９９）都要跌逾１巴仙，報３２﹒４５銀。　　不過就好彩，有位逆流而上嘅藥佬喎，就係出盈喜嘅藥明生物（０２２６９）喇，預計上半年多賺逾１﹒５倍，彈高逾２巴仙，報８０﹒１５銀。　　報喜訊嘅仲有磚頭佬融創（０１９１８），話中期純利可能增加超過兩倍喎，勁啊！刺激佢今日跳起近４巴仙，埋單報２５﹒１銀。街坊恆大（０３３３３）上星期五（２０日）就用咗近３４６０萬銀回購，今日衝前逾４巴仙，報２０﹒６５銀。

＊鐵路獲追捧中交建勢勇，水泥股飛起淡季爭口氣＊

　　基建鐵路佬有資金追捧，中交建（０１８００）（滬：６０１８００）Ａ場嗰邊仲漲停板添，Ｈ場依邊就衝前咗近５巴仙，報７﹒４８銀。街坊中鐵建（０１１８６）就仲厲害，一口氣衝咗高交７巴仙收８﹒２６銀。中鐵（００３９０）亦有逾６巴仙進帳，收６﹒１銀，齊齊開Ｐａｒｔｙ。　　　　　根據探子回報，海螺水泥（００９１４）先前針對江浙滬沿江地區，將熟料價格升到每噸１０蚊人仔！原本孖屐估係７月底先加，但因為供應緊張所以提前，睇來呢個水泥淡季都唔淡喎。海螺同華潤水泥（０１３１３）分別踢高近４巴仙同埋近７巴仙，分別報４５﹒３０銀同８﹒２９銀。

＊附屬發盈警太Ａ下跌勁，俄鋁見曙光民眾心安安＊　　　

　　太古Ａ（０００１９）旗下海洋開發業務因為船隊嘅減值支出，今年中期會蝕近７億，缸友對佢無哂信心，搞到佢今日要跌逾３巴仙，報８２﹒２５銀。　　　　　另一邊廂，中國太平（００９６６）就有開心事分享，話預期中期溢利多過上年兩成。中金聽到就繼續畀個３３蚊嘅「他屐」，太平最後飛起逾４巴仙，埋單報２７﹒１銀。　　　　　俄鋁（００４８６）前排好慘慘咁被花旗國制裁，俄鋁已經做左好多野去氹返花旗國喇，財長努欽最新就話對解除制裁持開放態度喎。咦，咁睇嚟有曙光啵！今日即刻彈高近１５巴仙，收報２﹒４１銀。　　　　　民眾金融（００２７９）之前授出近１３億份購股權，算係個對業務嘅信心保證喇，今日就飆近１２巴仙，報０﹒１１３銀。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

全新節目《說說心理話》講述被情緒困擾真實個案，情緒病最終如何走出低谷？► 即睇