《小傳日記》花旗國上星期五（１３日）晚表現都唔錯，三大股指都收高完場，今朝（１６日）香江魚缸都跟住高開５５點，不過由於小米（０１８１０）入港股通「食白果」，加上祖國第二季ＧＤＰ增長放緩至６﹒７巴仙，嚇到香江魚缸調頭走低最多１９８點至２８３２７。好彩，重磅藍戰無咩事，ＱＱ（００７００）穩收３８１﹒４銀，ＡＩＡ（０１２９９）更加逆市升約１巴仙收６８﹒８銀，同埋銀娛（０００２７）、金沙（０１９２８）都炒暑期旺季，賭收有機會造好，跳起逾１至近３巴仙，收６４﹒７５銀及４１﹒８銀，成功帶領魚缸倒升１４點收２８５３９；國指就因為內銀佬數據唔靚，搞到跑輸大市，收低４２點報１０７０４。全日成交拍烏蠅，較上星期五（１３日）減少近１６巴仙至７０１億銀，係自２０１７年７月７號以來低位。

＊阿爺斷米路小米要哭訴，中興大反擊重生好招積＊

　　小米今次真係頭痕了！阿爺失驚無神宣布，小米屬於同股不同權嘅魚毛，滬深交易所拒絕佢入港股通呀！北水美夢落空，今朝小米開市競價已經插７巴仙報１９﹒９４銀，之後仲愈跌愈深，低見１９﹒４銀，不過生發發行政總裁李小加出嚟護航，話聽日就會上京見阿爺，孖屐即時憧憬有一絲轉機，小米跌幅即時縮返晒，埋單只係唔見近２巴仙報２１﹒０５銀。不過老老實實，仲揸住小米嘅粉絲們要食定驚風散喇。　　另一邊廂，中興（００７６３）終於捱過最艱難的時光，正式宣布獲得花旗國解除禁令，未來將會調集所有資源，全力追趕之前受影響的項目。佢亦好坦誠，預告埋畀大家知，預計上半年將會見紅，激蝕７０億至９０億人幣。但缸友早已預咗呢個消息，反而趁低入貨，中興收市大反擊逾１６巴仙收１６銀，勁！

＊碧桂園跌低物管佬發威，７０８落鑊恆大卻寂寞＊

　　睇埋內房佬表現喇，市傳或暫緩投地嘅碧桂園（０２００７），今日差唔多全程都係跑最尾嘅藍戰士，即使有副主席兼大股東楊惠妍增持１５００萬股，都救唔到佢，最終要碌低逾２巴仙，報１２﹒７４銀，係今日最差表現藍戰士。同系碧桂園服務（０６０９８）同樣有楊惠妍增持，午後買盤急增，帶動埋股價一齊起飛，埋單彈起近１１巴仙，報１２﹒８２銀，亦一度破頂見１２﹒８６銀添！　　　　　　　恆大（０３３３３）旗下恆大健康（００７０８）上個月就入股法拉第未來（ＦＦ），恆大掌門人許家印之前仲去洛杉磯視察咗ＦＦ嘅業務添，估唔到咁樣都可以炒，恆大健康一下子衝前近１５巴仙，收報９﹒１９銀，仲見過９﹒４３銀山頂位，厲害了。不過由於神州上半年全國地產投資增速回落，搞到恆大要碌低逾３巴仙。

＊比亞迪澄清缸友仍驚驚，燃氣佬有火潤燃笑呵呵＊

　　砵砵車比亞迪（０１２１１）今年４月就宣布，話會成為英超球隊阿仙奴嘅官方全球獨家汽車和巴士合作夥伴，不過依家形勢就嚟個急轉直下，因為比亞迪突然話，原來單「刁」係假的！仲澄清其實係有人冒充公司同埋阿仙奴達成合作，仲已經報咗警喇，真係聽到一頭問號。搞到今日股價都碌低咗近６巴仙，收報４５﹒３銀，係今日表現最差國貨佬，仲低見過４５銀，係２０１７年５月以嚟新低，慘。　　燃氣佬就懶理咁多風風雨雨，今日表現唔錯，潤燃（０１１９３）有大和將「他屐」由２９﹒４銀大升到３７銀，仲將評級由「持有」調高至「跑贏大市」，曾經高見過３６﹒３銀破頂，埋單都仲彈高近４巴仙，報３６﹒２５銀。街坊中燃（００３８４）都跟住跳起近３巴仙，收報３４﹒９５銀，勁！

＊私有化告吹研祥爆憔悴，北礦再插水ＩＴＰ流淚＊

　　研祥智能（０２３０８）本身就同控股股東傾緊私有化，不過上星期五收市之後，就突然宣布要約止有關可能要約嘅討論，一場歡喜一場空，搞到呢條魚毛今日跪低近４３巴仙，埋單報１﹒０８銀，仲插穿埋２５０天線（１﹒２６３銀），真係無癮。　　跌低嘅又邊止佢一條魚毛，北方礦業（００４３３）上周五急急腳插完３８巴仙後，今日都要繼續跌，碌低逾４８巴仙，埋單報０﹒０２９銀。　　不過講到最慘，一定要提到ＩＴＰ（０８４４６），全因為佢係今日最差表現嘅魚毛，跣走逾７０巴仙，報０﹒２１８銀，仲低見過０﹒１８３銀，係上市新低，有缸貨損手爛腳，慘。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

全新節目《說說心理話》青少年不可以戀愛！？真實個案講述驚心動魄經歷► 即睇