《小傳日記》唉！侵侵（特朗普）又有新搞作喇，商人治國，真係寧舍多變數。中美雙方明明傾得好地地，侵侵又反口玩威脅，話如果祖國再反擊增加關稅，花旗國將會額外對２０００億美金祖國商品加徵一成關稅。阿爺都不甘示弱，講到明將會做出強有力反制。　　雙方都不願意讓步，貿易戰仲激過之前，嚇到港股放完端午節假期後，今朝（１９日）開市已裂口低開３１０點報２９９９９，失守三萬關，點知低處未算低，之後受累Ａ場都被震散大跌近４巴仙連二千九關都一度被攻陷，而道指期貨都碌低近２巴仙，嚇到香江魚缸下半場最多蒸發９７７點至２９３３２，牛熊線（約２９２５１）響起警號。　　多隻重磅佬都被轟炸，股王ＱＱ（００７００）穿咗４００銀，收跌逾３巴仙報３９６﹒８銀，中字輩嘅油佬、內銀內險佬，都收低逾３巴仙，全線藍戰幾乎無一倖免。香江魚缸收市要暴瀉８４１點報２９４６８，國指亦恐慌性質低３７７點報１１４９２，成交高達１５３０億銀。全個魚缸近１８００條魚毛「舉白旗」，傷亡慘重。

＊中興成戰靶無奈要捱打，政策改一改６９４哀哉＊

　　中美傾唔掂數，中興（００７６３）又再成為戰靶，一如預期花旗參議院恢復銷售禁令法案，中興又再嚇到插水近２５巴仙收９﹒８５銀，成交高達逾１２億銀；主要收入來自中興嘅摩比發展（００９４７）又跟住一齊高台跳水，急瀉逾１８巴仙收０﹒８１銀。另一方面，萬洲（００２８８）亦成為被拋售對象，一度重傷逾７巴仙至６﹒５２銀，埋單都收跌近６巴仙報６﹒６４銀，係第二差藍戰。　　另一邊廂，北京首都機場（００６９４）都受重傷，曾大成交蒸發逾２８巴仙，不過佢就唔係因為貿易戰，而係因為阿爺取消民航發展基金用作企業收入處理嘅政策，公司預期今年收入將會減少不超過１﹒２億人幣。大和即出報告狠削目標近三成至７﹒５銀，結果首都機場收市要暴跌逾２５巴仙收８﹒７９銀；至於經營海南美蘭機場嘅航基（００３５７）都要收挫近１４巴仙報７﹒９２銀，傷。

＊金蝶帶頭跌街坊也慘烈，小米心意變港所仍要跣＊　　　　股王ＱＱ今日亦唔見逾３巴仙隨市失守５０天線，一班軟件佬亦跟隨急插，金蝶（００２６８）、擎天（０１２９７）、中軟（００３５４）紛紛跣低約７至９巴仙，分別收報８﹒１銀、３﹒１７銀同６﹒２４銀。　　另外，科技界方面，獨角獸小米決定延遲ＣＤＲ發行，並先喺香江上市。德勤就話小米上市出現不確定性係因為估值問題，因為公司希望香江上市後，股價穩定咗，孖屐又消化新經濟模式，先再作ＣＤＲ發行。之前一直希望有科技公司來香江上市嘅生發發（００３８８），今日就跟隨孖屐跪低近３巴仙，報２４７﹒８銀，陰公！

＊太古逆市升太地賣樓勁，分拆遇冷風碧桂園陰公＊

　　太古Ａ（０００１９）今日就厲害喇，聯同阿囝太古地產（０１９７２）宣布，賣太古城中心第三及四座，大拿拿涉及１５０億銀。太古目前揸住太地８２巴仙股權，換句話說都有錢落袋，難怪今日最勁彈起過４巴仙，高見８６﹒８５銀，喺近兩年高位插旗。雖然臨埋單前只係微升近１巴仙報８４銀，但係是今日唯一打勝仗嘅藍戰士，勁。阿囝太地就慘豬豬啦，股價一路向下碌，完場時冇咗逾６巴仙，報３０﹒５５銀，真係相當不幸呀！　　祖國磚頭果邊都有動靜，今日係由碧桂園（０２００７）分拆出嚟嘅碧桂園服務（０６０９８）上場嘅大日子！呢對母子早排帶旺晒物管佬街坊，可惜今日自己正式上場就遇上大跌市，碧桂園服務一開場就報１０銀，雖然一度跟市碌到去得番８﹒８銀，但後勁有力，一度衝高去１１﹒２６銀添，埋單就難免跟市回返Ｄ，最終以１０銀平手完場。阿媽碧桂園就無奈瞓低逾３巴仙收１５﹒６４銀。

＊阿爺點名罵易鑫破底價，突然被洗倉互聯心慌慌＊

　　一班新經濟魚毛上星期五（１５日）被阿爺鬧，話高估值泡沫敲響了警鐘，被點名之一嘅易鑫（０２８５８）上年１１月以招親價７﹒７銀入缸，曾經最高見１０﹒１８銀新高後，好快就急插，今日最多碌低超過９巴仙，低見３﹒３８銀創新低，全日埋單仍跌咗超過６巴仙，報３﹒５銀，慘！　　個別魚毛方面，移動互聯（０１４３９）中午收市前突然被洗倉，嚇走咗唔少粉絲，下半場基本上跌到落尾，收市暴瀉逾６５巴仙報０﹒４銀，曾見０﹒３２銀上市新低，係傷得最慘烈嘅魚毛，認真大鑊。　　致豐工業電子（０１７１０）就因為發盈警嚇走一班粉絲，收市仍亦唔見近１８巴仙，收０﹒５６銀，曾見０﹒４５元破底，傷。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

全新節目《說說心理話》青少年不可以戀愛！？真實個案講述驚心動魄經歷► 即睇