《小傳日記》歐洲央行噚日（７日）調低咗未來三年嘅歐元區經濟預測，預期今年增長由１﹒７巴仙降至１﹒１巴仙，令到本來已經擔心緊估值過高嘅花旗國魚缸，三大股指隔晚再跌約１巴仙，道指上日收跌２００點，報２５４７３點；標指走低２２點報２７４８點，穿埋２００天線，係一個月嚟首次；納指收跌８４點或１﹒１％，報７４２１點。花旗國魚缸連跌四跌，唔通開始轉勢？　　　香江呢邊今朝都跟住外圍回落，裂口低開３７０點報２８４０９點，即時穿埋廿天線（約２８５７９點），隨後神州公布出口差過預期，加上證指數嗰邊穿埋３０００關口，攪到魚缸跌勢加劇，其後仲試過穿牛熊線（約２８２０６點），低見２８２０１，最終港股埋單全日收報２８２２８點，唔見５５１點，跌幅近２巴仙，收市叫做守住牛熊線，幾咁驚險。全日主板成交約１４４６億銀急增３３巴仙。國貨方面就收報１１１５６，跌３巴仙或跌３０３點。　　神州升咗咁多日，都嚟個大調整啊，上證收報２９６９，全日唔見１３６點或４巴仙，成交５２５５億人仔。　　魚缸急跌，藍戰士今日當然捱沽啦！ＱＱ（００７００）就算畀富瑞唱好，話佢隻《完美世界》玩家反應好，兼比佢「買貨」投資評級，同「他屐」４０５銀，今日都要唔見逾２巴仙，收報３４７銀。同樣ＡＩＡ（０１２９９）就算比中金唱好升「他屐」由８０銀到８４銀，再加上有基金增持，今日都要跌２巴仙，報７５銀。生發發（００３８８）就唔見近２巴仙，報２６６﹒６銀。大象（００００５）走低１巴仙，報６４﹒２５銀。神州移動（００９４１）微升１毫，報８１﹒２５銀。　＊吉利未止血車股難喜悅，歐元向下走敏華最見愁＊　　　　噚日吉利（００１７５）公布完上個月銷售數據之後急跌，今日股價都仍然未止血，埋單仍然唔見逾３巴仙，報１４﹒１２銀，兩日累計已經唔見近一成一，慘啊！其他車股表現同樣受拖累，好似長汽（０２３３３）就算上個月銷量升１８巴仙，但大和就話佢因為無新車同嚟緊同行競爭激烈，所以仍然維持佢「沽貨」評級，攪到長汽全日急插逾半成報５﹒５８銀；比亞迪（０１２１１）上個月新能源車急升七成三，但都要跟住魚缸落超過半成，收報４７﹒３５銀；東風（００４８９）跌３巴仙，報８﹒１７銀；華晨（０１１１４）插６巴仙，報７﹒４銀；北汽（０１９５８）跌近半成，報４﹒７４銀；廣汽（０２２３８）軟４巴仙，報９﹒５２銀。　　歐洲央行調低經濟增長預測，令歐元創近２２個月低，一眾喺歐洲有業務嘅魚毛自然遭殃，長和（００００１）唔見近２巴仙，報７９﹒９元；申洲國際（０２３１３）跌３巴仙，報１０１﹒３元；新秀麗（０１９１０）星期一（４日）仲比細摩減持，攪到佢全日走低超過４巴仙，報２２﹒８５銀；「大美人」思捷環球（００３３０）亦跌近４巴仙，報１﹒７８銀；敏華（０１９９９）急插半成，報４﹒５１銀。　＊人仔轉弱勢鐵鳥最悲淒，滬指穿三千內銀跌勢顯＊　　　　歐元創新低，變相令美金強勢，一眾新興貨幣市場自然無運行啦！當中當然包括人仔啊，攪到一向炒人仔概念嘅三隻中資鐵鳥，今日都要捱沽啊！其中跌得最甘嘅係東航（００６７０）同國航（００７５３）齊齊唔見約４巴仙，分別報４﹒７２銀同７﹒８４銀；南航（０１０５５）就唔見近３巴仙，收報６﹒０９銀。　　人仔跌加上Ａ股急挫，其中滬指穿埋三千點，中資金融佬自然都無運行啊！內銀佬率先急跌，一向升勢比較好嘅招行（０３９６８），今日都唔見近３巴仙，收報３５﹒２５銀；郵儲行（０１６５８）星期一畀瑞銀減持，全日都唔見超過３巴仙，報４﹒７１銀；四大行平均跌３巴仙，建行（００９３９）報６﹒８９銀，工行（０１３９８）收５﹒８８銀，農行（０１２８８）造３﹒７銀，中行（０３９８８）收３﹒６１銀。

＊Ａ場遇重挫內險跌幅多，業務增監控券商佬驚恐＊　　　　內險佬都係今日隨住Ａ股急跌嘅重災區，其中國壽（０２６２８）兩日前先被高佬唱淡，今日繼續腳軟，跌近４巴仙，收報２０﹒５５銀；平保（０２３１８）都唔見３巴仙，收報８０﹒９銀；之前連續五日漲停嘅人保Ａ股（滬：６０１３１９）被中信証券唱淡，首予「賣出」評級，Ａ股跌停，而隻Ｈ股（０１３３９）都要跌逾５巴仙報３﹒４６銀；太平（００９６６）跌逾５巴仙，報２３銀；財險（０２３２８）挫４巴仙，報８﹒７９銀；新保（０１３３６）亦瀉近５巴仙，報３６﹒８銀。　　廣東證監局召開會議，公布禁止券商在場外配資提供便利，同埋加強異常交易監控同技術系統安全防護，多隻中資券商佬Ａ股都跌停。佢地嘅Ｈ股當然都受難啦！海通證券（０６８３７）同華泰證券（０６８８６）齊齊包辦最差國貨佬首兩位，均挫逾６巴仙，分別收報１０﹒１４銀及１４﹒９２銀：中信証券（０６０３０）就急挫逾５巴仙，報１８﹒１６銀；廣發証券（０１７７６）亦跌６巴仙，報１２﹒２８銀。　　祝缸友周末愉快，請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

【你點睇】政府宣布垃圾徵費暫緩，未來將繼續推廣回收及減廢，你認為幾時先係垃圾徵費嘅時機？► 立即投票