《魚缸博客》受住貿易戰影響，人仔一時升一時跌，攪到一眾內房股、內銀股嘅股價，都好似坐過山車一樣，不過有得跌先有買，近排大家憂慮神州會唔會將人仔貶值，嚟對付貿易戰，不過總理李克強就講到唔會用人仔貶值嚟對應，加上近排神州亦開始放售美債嚟支持人仔匯價，睇嚟短期人仔再跌嘅機會唔大，缸友可能可以揀碧桂園（０２００７）嚟博反彈。　　睇返碧桂園今年頭８個月，集團連同其合營及聯營公司，共同實現合同銷售金額約３７８８﹒４億銀（人民幣、下同）按年增長３８巴仙，涉及相關銷售建築面積約４０１９萬平方米，按年升近２７巴仙。而單計８月銷售額就係３１３億銀，回顧返碧桂園１至７月分別錄得銷售額係６９１億銀、５４６億銀、６４１億銀、６９５億銀、７７２億銀、７７８億銀及３３７億銀，即係話８月係今年銷售以嚟最低。　　不過，缸友又唔使對碧桂園卻步喎，因為路透根據國家統計局公布數據測算，今年８月７０個大中城市，新建商品住宅價格指數同比升７巴仙，連升３５個月，升幅較７月高出１﹒２個百分點，亦是今年最高水平。　　噚日神州就計劃一個「個稅房貸利息扣除細則」，好似話係將住房貸款利息或住房租金抵扣個稅，有分析指，其實咁做變相係調低貸款利率。加上整「麵包」除咗麵粉之內，建築建材都好影響麵包嘅毛利，早前神州發改委就話，要摸清砂石、水泥、混凝土等建材價格嘅形勢，有針對性咁要加強市場調節監管，一眾建材股股價當然「扁嘴」喇，不過對一眾內房嘅建築成本會下降，利好內房股發展。　　睇返公仔圖，碧桂園仲係調整階段，由６月開始都處於下行通道，不過短期１０銀見支持，如果缸友有興趣入貨，可以現價入價博佢技術性反彈，等升破５０天線（約１１﹒４９５港銀）再作下一部署。

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

全新節目《說說心理話》青少年不可以戀愛！？真實個案講述驚心動魄經歷► 即睇