《小傳日記》花旗國「孖屐」繼續生氣勃勃，納指企穩萬一點收市真係可喜可賀！連帶亞洲股市都十分神氣，港股今日高開唔夠百點後一度高走，但之後侵侵（特朗普）再次出招，話終止香江特殊待遇後，魚缸注定不再成功。呢一句真係嚇怕缸友，因為唔知佢仲有咩招數未出，所以午市前大家都散水，魚缸一跌無回頭，低見過２４６４１點，好彩臨收市前跌幅收窄小小。最終恆指收報２４９３０點，跌１７１點或逾半巴仙，主板成交１３５９銀。國企指數報１０２０２點，跌５４點或逾半巴仙。　　Ａ場就榮辱互見啦，上證綜合指數報３３８６點，升８點或近半巴仙；證成份指數報１３８６３點，跌９７點或跌逾巴仙。兩市合共成交１２９１５﹒０７億元人仔。　　大隻藍戰士方面，大象（００００５）跌逾１，報３３﹒５銀；生發發（００３８８）微跌近半巴仙，報３８５銀；中移動（００９４１）潛近３巴仙，報５４﹒０５銀；ＡＩＡ（０１２９９）跪低近半巴仙，報７１﹒６銀。

＊油價日日漲油佬係咁上，金價企高位金佬真巴閉＊

　　花旗國能源信息署公布上月３１日當周原油庫存減少７４０萬桶，原油供應愈整愈縮，油價起飛連帶油佬都受惠，中石化（００３８６）漲逾１巴仙，報３﹒４８銀；中海油（００８８３）升逾１巴仙，報８﹒６４銀；中石油（００８５７）跌近半巴仙，報２﹒７８銀；聯合能源集團（００４６７）漲逾２巴仙，報１﹒４６銀；中海油服（０２８８３）升近１巴仙，報６﹒３９銀；　　世界日日咁亂，加上中美又開展新一輪戰場，資金避險令金價日日破頂，依家都企穩喺２０００美金關口之上，一眾金佬開心開Ｐａｒｔｙ！招金礦業（０１８１８）急飆近７巴仙，報１０﹒５銀；紫金礦業（０２８９９）飛起逾６巴仙，報５﹒２６銀；山東黃金（０１７８７）升１巴仙，報２５﹒２５銀；金山能源（００６６３）踢高近６巴仙，報０﹒０７２銀；龍資源（０１７１２）抽高近６巴仙，報２﹒０９銀。

＊「宅經濟」強壯手游仔當旺，花旗要淨網手機孖寶降＊

　　疫情期間「宅經濟」興起手遊仔當旺！而龍頭之一嘅ＩＧＧ（００７９９）喺上半年嘅業績有強勁增長！佢隻Ｇａｍｅ《王國紀元》成績標青，而且公司又話會喺下半年推出６款新遊戲，帶動今日手遊仔普飆！加上ＩＧＧ唱好埋心動公司（０２４００），話十分睇好佢地發圍，拉起埋心動今日齊齊飛高！ＩＧＧ飆升逾三成一，報１０﹒１６銀；心動公司彈上近一成二，報４６﹒９５銀。而其他手遊仔方面，友誼時光（０６８２０）飛高近１５巴仙，報３﹒５２銀；禪遊科技（０２６６０）飛上近一成，報１﹒３４銀；中手游（００３０２）炒高近６巴仙，報３﹒５２銀。　　花旗國國務卿蓬佩奧新推出咗個「淨網行動」，要禁止華為手機預先安裝花旗國手機ＡＰＰ，避免佢地幫神州政府監視民眾，又叫當地同其他國家嘅公司喺華為手機ＡＰＰ商店移除自己的產品。今日手機「孖寶」齊齊走低，瑞聲（０２０１８）下滑近１巴仙，報６２﹒５銀；舜宇（０２３８２）跌低逾１巴仙，報１４７﹒５銀。而高偉電子（０１４１５）就叻叻炒高近１２巴仙，報３﹒９９銀；富智康（０２０３８）都彈高逾２巴仙，報０﹒９銀；比亞迪電子（００２８５）亦跳上１巴仙，報３１﹒９銀；不過通達集團（００６９８）唔見逾１巴仙，報０﹒４６銀。

＊績後他屐削長和系走弱，花旗國發功ＱＱ好陰功＊　　　長和系嘅公用股尋日收市之後放榜，電能實業（００００６）中期少賺四成，被花旗降他屐至５０銀，維持買入評級，撻低近２巴仙，報４２﹒８銀；長建（０１０３８）上半年純利大跌五成二，瀉近３巴仙，報３９﹒７銀，係包尾藍戰士。而長和系其他股份亦普遍向下，長和（００００１）走低近１巴仙，報５０﹒９銀；長實集團（０１１１３）挫逾１巴仙，報４４﹒５５銀；長江生命科技（００７７５）蒸發２巴仙，報０﹒９８銀；港燈（０２６３８）潛水近半巴仙，報８﹒０２銀。　　花旗國嘅「淨網行動」牽連甚廣，科網佬都劫數難逃，而恆生科技指數仍然有得微升近半巴仙，表現繼續跑贏魚缸。不過，被點名禁微信嘅ＱＱ（００７００）朝早一度挫３巴仙，埋單只係唔見左近１巴仙，報５５５﹒５銀；阿里巴巴（０９９８８）倒升近半巴仙，報２５７銀；但強勢股美團點評（０３６９０）懶理消息照升逾１巴仙，報２２１﹒２銀，盤中亦曾高見２２９﹒２銀創上市新高；不過近日急升嘅軟件佬金山軟件（０３８８８）就回吐近３巴仙，報４２﹒４銀；眾安在線（０６０６０）亦無左逾１巴仙。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

全新節目《說說心理話》青少年不可以戀愛！？真實個案講述驚心動魄經歷► 即睇