《魚缸博客》呢排板塊輪住炒，終於輪到電力股喇！當然，阿爺力保供電穩定嘅決心，似乎都畀到唔少缸友好大信心。最近有消息話，上海經濟活動逐步恢復，上海市新增用電需求好番。國網上海市電力公司最新公布數據顯示，今年１到６月上海全市各類新增用電申請容量累計達到７５９﹒６１萬千伏安，按年增加２８﹒１７％。　　雖然阿爺仍然堅持「動態清零」，但係防控措施無之前咁嚴格，更重要係要追番全年經濟增長５﹒５％嘅目標，加快生產少不免要用到電，博客覺得電力股短期仲有得炒下。　　中國電力（０２３８０）近期走勢唔錯，由５月１０號低位３﹒２７銀開始上升，今日（７日）更加突破５﹒２銀。大行摩通發表嘅研究報告提到，潤電（００８３６）估值吸引，預期煤價下跌會成為催化劑，同時偏好中國電力，股價今年以嚟跑贏潤電約２０％，公司近期又宣布收購清潔能源發電資產。　　日線圖到睇，中國電力股價呢轉反彈浪未斷，已經好多日企穩喺２０天線上，今日進一步突破１０天線，目前９ＲＳＩ係６８，短線值博率比潤電、華能（００９０２）高，短線上番５﹒６銀歷史高位嘅機會好大，現價買入都唔會太蝕，止蝕位就留意６月中下旬橫行密集區嘅底部４﹒５銀水平。　《編者按》本欄搜羅即市傳聞，惟消息未經證實，《經濟通》亦不保證內容之準確性。

WoW WoW星期三：健康網購產品低至$99 (只限今天)► 火速行動