《小傳日記》噚晚（１２日）美國市錢莊大佬摩通同花旗公布嘅第三季成績表都算省鏡，賺多咗７巴仙以上，電商一哥亞馬遜更係重上千元大關，但可惜嘅係電訊佬唔多爭氣發盈警之下，搞到花旗三大魚缸全線跣低。　　香江魚缸同花旗魚缸近排都係同一命運，都係摸完頂後就腳仔軟。即使今日（１３日）人仔走勢唔錯，但缸內就只係得鐵鳥同紙業佬有反應，內銀更全日插水；加上大隻藍戰士無甚表現，僅ＡＩＡ（０１２９９）撐場，而市場又傳阿爺要入股ＱＱ（００７００）玩埋一份，ＱＱ冇乜精神，搞到魚缸亦唔上唔落，表現鬼咁牛皮。恆指一開市冇幾耐最多插咗８９點，低見２８３６９，之後雖然彈返上去，但全日最叻都係升過３３點，高見２８４９２，最後埋單只係稍為升咗１７點，報２８４７６。　　牛皮歸牛皮，炒股唔炒市，基建鐵路佬全線跳彈床，但可惜嘅係都係撐唔起國貨佬指數。國指全日只係升咗１９點，報１１５１９點。　　秋意濃濃天氣超正嘅一日，全日魚缸成交只係得約８７４億銀。　＊秋高氣又爽缸友不歡呼，ＱＱ好煩惱阿爺要入股？＊　　　魚缸呢排終於炒返啲頹咗好幾個月嘅板塊，而唔少基建鐵路佬喺三月底見新高後就全線潛水，到上月尾始有上升跡象。中通號（０３９６９）今日跑贏所有街坊，升咗近半成，報６﹒１９銀；高鐵一哥中車（０１７６６）話賣咗成都一塊地皮，估計呢單刁會賺６億人仔，今日發威升咗超過３巴仙，報７﹒５６銀，仲創咗半年新高。　　中車時代（０３８９８）會喺下周五（２０日）放榜，今日炒高近４巴仙，報４７﹒０５銀，仲順便喺４７﹒３銀近１４個月高位插旗。估值喺所有街坊入面墊底嘅中交（０１８００），今日重上１０蚊關兼破埋廿天線（９﹒８９２銀），全日埋單計就升咗超過兩巴仙，報１０﹒０８銀。　　ＡＩＡ同樣都係下周五（２０日）放榜，未放榜就已經有幾間大行出嚟唱好，仲預期新業務價值坐底有兩成以上升幅，加上公司仲話要同泰國錢莊盤谷銀行合作搞分銷，高佬順便加入埋唱好行列，全日彈高咗近兩巴仙，報６１﹒１５銀，貢獻魚缸成３４點，做咗撐市功臣。　＊鐵路返來了缸邊鬥嬌俏，ＡＩＡ績前春江鴨偷笑＊　　　全球電腦一哥聯想（００９９２），無論係手機定電腦業務近年都統統不濟，佢嘅股價今年以嚟都長期潛水，而「孖屐」調研機構Ｇａｒｔｎｅｒ前幾日仲公布，今年第三季個人電腦（ＰＣ）出貨量按年跌咗近４巴仙，至６７００萬部，但呢啲消息似乎對聯想冇乜影響，今日仲要升咗超過兩巴仙，報４﹒４７銀，仲升破埋條５０天線（４﹒４銀）。　　雖然ＰＣ「孖屐」係咁縮水，但手機大哥三星前排放榜，話由於受到晶片及屏幕需求強勁帶動，第三季大嗱嗱賺多咗近兩倍，唔少手機設備佬都有跟三星搵食，所以今日都備受追捧。瑞聲（０２０１８）率先跑出，升咗近４巴仙，報１４０蚊；比亞迪電子（００２８５）今朝都升近４巴仙，但埋單只係升咗唔夠１巴仙，報２５﹒２５銀；舜宇（０２３８２）同樣升咗唔夠１巴仙，報１２１﹒９銀。　＊三星業績靚概念叼叼光，股仔叫華夏升得最奔放＊　　　神州醫藥佬今日相當醒神喇，華夏健康（０１１４３）之前話買起咗神州一間安全套生產商超過８４巴仙嘅股權，使咗３﹒６億人仔；隻股噚日（１２日）復賽之後就飆升近１８個巴仙，今日仲踩行油添；全日升咗近５２巴仙，盤中高見０﹒３３５銀，創逾１４個月新高，埋單０﹒３銀，係升幅榜入邊第二位嘅魚毛，勁！　　緊隨其後嘅仲有街坊華夏醫療（０８１４３），食咗個Ｌｕｎｃｈ返來之後，佢個股價好快就吹起咗近６５巴仙，報０﹒２１６銀，係全日最威水嘅魚毛。　　山東新華制藥（００７１９）噚日魚缸收工之後發盈喜，話頭三季坐底多賺七成，缸友收到風即刻馬上掃貨，全日升咗近７巴仙，報９﹒４７銀。　＊高佬畀個讚劇飛果識飛，人仔密密升紅鳥亦高飛＊　　　　高佬早排將劇飛（００２９３）納入「確信買入」名單，「他屐」睇１４﹒６銀，同時仲話佢嘅盈利同埋股價轉為較正面，又預料上半年客運收益率已經見底，結果全日應聲彈高近４巴仙，報１２﹒７６銀，跑贏一眾藍戰士。　　即使神州９月貿易順差收窄至１９３０億元人仔，但人仔呢幾日都跳返彈床，一向食正人仔升值概念嘅神州鐵鳥圍埋一齊開Ｐａｒｔｙ添，東航（００６７０）飛起近２巴仙，報３﹒９７銀；國航（００７５３）就吹起近２巴仙，報６﹒７４銀；南航（０１０５５）就剷起逾２巴仙，埋單５﹒５６銀。　　受惠人仔升值嘅仲有紙業佬，但升勢都係一般，理紙（０２３１４）升咗逾２巴仙，報１０﹒１銀；玖紙（０２６８９）都唔輸蝕，全日跳起逾１巴仙，報１５﹒８６銀。但晨鳴（０１８１２）就唔太幸運喇，全日跣低不足１巴仙，報１４﹒８６銀。假期愉快，請請！　　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

全新節目《說說心理話》講述被情緒困擾真實個案，情緒病最終如何走出低谷？► 即睇