《小傳日記》繼噚日（１８日）阿爺放水沖喜之後，今日（１９日）港匯終於有番Ｄ起色喇！經過金管局連接１３度買入港幣，一共買咗超過５００億銀之後，港匯一度升０﹒０７巴仙至７﹒８４４１兌一美金，創三個月最大盤中升幅。雖然都未消除走資憂慮，但起碼止一止跌，個心都無咁驚呀。　　另一方面，油價抽高近３巴仙，「三桶油」領軍，再加埋跟隨外圍炒季績，香江魚缸已經高開２４８點報３０５３２，收復十天廿天線。之後Ａ場又彈番近１巴仙收復三千一關，中資金融股承勢反擊，建行（００９３９）、工行（０１３９８）都有近３巴仙進帳，分別收８﹒１８銀及６﹒８９銀。恆指成功進一步跳高４２４點收３０７０８，連百天線都收復番。國指就收高２５３點報１２２３９。全日成交超過１１４９億銀。　＊油價高高高三桶油風騷，帶挈油服佬齊齊跳勁舞＊　　　　早幾日搞到鬼死咁緊張嘅中東局勢，彷彿又急速冷卻番落嚟，不過油價都有力彈高近３巴仙，皆因花旗國原油庫存減少咗，同埋有消息指，石油輸出國組織（ＯＰＥＣ）中最大產油國沙特出聲，話好樂意見到油價升到去８０美金，甚至１００美金添！「三桶油」開心到跳起，靜咗一排嘅中石油（００８５７）飛升近６巴仙收５﹒９４銀，勁；獲富瑞唱好重申買入嘅中海油（００８８３），成功收高逾４巴仙報１３﹒２４銀；中石化（００３８６）近排就密食當三番，原來不知不覺曾經升到去７﹒７６銀，距離８﹒０４４銀上市新高唔係好遠，埋單都仲有近３巴仙落袋報７﹒７銀。　　油佬開Ｐａｒｔｙ，又點會唔預埋一班油服佬，當中，中海油兄弟中海油服（０２８８３）就跑出逾８巴仙收９﹒０１銀，成交超過３﹒３億銀；街坊安東油服（０３３３７）都唔差，有近４巴仙進帳收１﹒１２銀。　＊ＱＱ傳濕平六連陰暫停，ＡＩＡ無癮萬洲卻興奮＊　　　股王ＱＱ（００７００）自從被大股東「掟貨」之後，氣勢真係大不如前。過去一個月，幾經辛苦，都係為咗守住４００蚊關，噚日仲跌到去３９３﹒４銀創今年新低添，講好的５００蚊夢已經愈來愈遠。不過，ＱＱ仍然好積極投資四出賺錢，有消息傳出，佢有份投資嘅花旗生物科技企業Ｇｒａｉｌ計劃喺香江上市前，先籌十億美金；同時，又傳ＱＱ洽商斥１億美金投資印度在線體育遊戲平台Ｄｒｅａｍ１１。見慣風浪嘅ＱＱ收市行前逾１巴仙報４０５﹒８銀，又上番大股東嘅掟貨價，六連陰亦劃上句號。　　不過，重磅佬ＡＩＡ（０１２９９）就高處不勝寒，上周中勇創７２﹒１銀新高後反覆回吐，雖然高盛同中金都唱好，後者維持上望８５銀，不過ＡＩＡ都要唞唞逆市跌０﹒５巴仙報６８﹒７銀，做咗第二差藍戰，Ｓａｄ。而最差藍戰係瑞聲（０２０１８），但都只係跌０﹒５個巴仙，收１３０﹒８銀；舜宇（０２３８２）則反彈近４巴仙，收１５１銀。　　今日最叻仔嘅藍戰就係萬洲（００２８８），受到貿易戰拖累，萬洲上個月真係跌得好勁，由接近１０蚊高位，一直碌到去噚日７﹒９銀低位，傷。不過，公司將會喺下星期二（２４日）公布首季業績，唔知係咪憧憬有好消息，今日大反擊近６巴仙報８﹒４６銀。　＊俄鋁大反擊魚毛最出色，鋁價三連飆街坊齊叫囂＊　　　花旗國侵侵發動貿易戰，羅宋國係其中一個箭靶，唔少俄企先後遭殃，而全球第二大嘅鋁業巨頭俄鋁（００４８６）更加係身受重傷，由宣布制裁前嘅４﹒６４銀，插水插到前日（１７日）歷史低位１﹒３１銀先至開始見反彈，市值亦瞬間蒸發咗三分之二。今日有傳聞話，俄鋁計劃喺神州搵更多生意，以抵銷美國佬制裁嘅影響，呢個正面消息引起唔少缸友入市撈底，俄鋁全日強勢彈起超過２６巴仙，報１﹒７９銀。　　鋁業巨頭唔掂，高佬就出嚟話會鋁價因而坐火箭，倫敦三個月期鋁過去三日跳起１１巴仙，一班神州街坊即時隨風起舞，中鋁（０２６００）爆升咗近８巴仙，報５﹒１５銀，Ａ仔仲要漲停埋。宏橋（０１３７８）都唔輸蝕，升咗近６巴仙，報９﹒３６銀。　　鎳價都升埋一份，倫敦三個月期鎳噚日彈起近８巴仙，仲創埋超過三年新高，洛鉬（０３９９３）今日都抽高咗超過４巴仙，報５﹒７銀。五礦資源（０１２０８）就勁升超過１３巴仙，報５﹒６４銀。　＊晶片續強勢華虹好矜貴，砵砵車踩油吉利就唞唞＊　　　中興通訊（００７６３）再一次被美國佬制裁後，有分析指，如果花旗國唔供應晶片畀中興，佢就會交唔到貨。但可能會對神州晶片佬有著數，中金噚日已經話神州可能會加快半導體行業發展。華虹半導體（０１３４７）噚日炒起近１６巴仙後，今日繼續強勢彈起超過一成，報１９﹒１６銀。中芯（００９８１）彈起一成後，今朝仲繼續跳起８巴仙，但到咗下晝中證監出嚟澄清一單新聞，話冇講過會加快晶片街坊入Ａ場，中芯埋單升幅縮水至近３巴仙，報１０﹒７２銀。至於平時較少有「刁」嘅上海復旦（０１３８５）都彈起近３巴仙，報７﹒３銀。　　噚日有幾部砵砵車被瑞信睇衰搞到急瀉，北汽（０１９５８）同廣汽（０２２３８）更加係狠摔超過一成，但呢兩架車今日都踩返油，北汽升咗近６巴仙，報８﹒４７銀。廣汽就彈起超過半成，報１３﹒６銀。　　　　華晨（０１１１４）噚日插咗超過９巴仙兼八連陰，累插近２７巴仙後，今日強勢踩油升咗近９巴仙，報１４﹒０４銀。藍戰士吉利（００１７５）就冇乜料到，升咗唔夠一巴仙，報２１﹒９５銀。請請！　　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

全新節目《說說心理話》講述被情緒困擾真實個案，情緒病最終如何走出低谷？► 即睇