《小傳日記》魚缸呢兩日又興返炒新股，包括噚日隻喜相逢（０２４７３）同今日隻華視（０１１１１），上市當日都升到幾十巴仙，連今日開始招股嘅藥明合聯（０２２６８）都傳熱到要招股上限定價，唔通政府要活躍資本市場真係掂？　　講開新股就打鐵趁熱，據近期報道，神州普洱茶廠瀾滄古茶已經搞掂咗了第一次呈交聆訊後資料集，即係已經成功通過聆訊，距離敲鑼又近一步。但原來早喺２０２０年，公司就試過向深交所遞表，不過到２０２１年又改為轉向本地魚缸埋手。　　魚缸嘅「奶茶第一股」就一早被天仁茗茶代理賓仕國際（０１７０５）攞咗，不過「傳統茶第一股」就未知花落誰家，如果瀾滄古茶上到市就會係。瀾滄古茶招股書提到，２０２０年至２０２２年嘅全年度總收入分別係４﹒０５億人仔、５﹒５９億人仔同４﹒６３億人仔；其中專賣普洱生熟茶餅嘅品牌「１９６６」帶來嘅收益分別佔７３﹒８％、７４﹒１％同６５﹒１％。截至２０２２年，１９６６旗下賣１２７款普洱產品，包括多款茶餅、沱茶同茶磚。　　而呢１２７款主要產品嘅建議零售價介乎每公斤４７１至５０４２０人仔；２０２２年，１９６６旗下主要產品的平均售價範圍介乎每公斤１３６元至１６８５５元人仔，多數產品同年嘅平均售價介乎每公斤１０００至５０００人仔。　　雖然魚缸入面唔多類似股份，不過由盤數可以睇得到，做茶葉生意可以話偏向穩定，不過增長真係唔多，畢竟茶葉雖然係日常消費品，不過瀾滄普遍都係針對中高端嘅客群，其實算係非必須消費品。係咁就會同內需股殊途同歸，一日神州消費力未恢復，所以非必須消費股都係前景窄，所以買茶餅仲分分鐘有投資價值過茶股，放唔出都有得飲，請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

etnet榮獲HKEX Awards 2023 「最佳表現證券數據供應商」大獎► 了解詳情