《魚缸博客》今日魚缸低開高走，開市跌幾十點後，好快就掉頭向上衝，暫時升緊４００幾點。升市中不乏內房股蹤影，龍湖（００９６０）、中海外（００６８８）同埋潤地（０１１０９）升緊４％至８％不等。除咗跟大市升之外，原來內房股亦有利好消息。　　根據《中央電視台》引述住建部報道，截至２月２０日，內地２９個省份２１４個城市已建立房地產融資協調機制，分批提出可以給予融資支持嘅房地產項目「白名單」，並推送俾商業銀行，共涉及５３４９個項目；已有５７個城市１６２個項目獲得銀行融資共２９４﹒３億元人民幣。不過２０２４年上半年係房企債券到期高峰，第一、二季到期規模喺１５００億元人民幣以上，區區幾百億元嘅新增融資，根本唔足以應對房企普遍面對嘅流動性困局。　　官媒引述多家銀行有關數據報道，目前已對「白名單」項目審批貸款１２３６億元，正在根據項目建設進度需要陸續發放貸款，拒絕放貸俾「白名單」項目嘅商業銀行需向金融監管部門報送「無法貸款嘅原因」，由地方政府及時協調解決。更重要嘅係，需確保資金全部用喺房地產項目開發建設，而唔係用於買地、還債或其他投資上。　　內房股今日借勢炒上無可厚非，畢竟都沉寂咗一排。但短炒好喇，債務問題始終未有解決方案。當然，假如有解決方法，就唔止升咁少啦。不過，比起內房股，物管股相對來說會穩陣啲，畢竟無債務困擾。但係，呢類物管股嘅大股東好多都係房企。投資者難免擔心，就算個仔本身無問題，都隨時受到欠債纍纍嘅阿媽拖累。呢個擔心唔係無道理。　　不過，如果阿媽係國企，就唔使咁騰鷄。好似華潤萬象（０１２０９）咁，既有華潤嘅光環罩住，本身業績亦唔差，上市呢幾年，股東應佔溢利年年增長。股價反而下跌，自２０２３年高位４６﹒５元跌到上月嘅２０﹒４５元。唔見左一半有凸。近期開始見反彈，現價仲係吸引，入市風險低，不妨小注入場。（ｖｓ）　《編者按》本欄搜羅即市傳聞，惟消息未經證實，《經濟通》亦不保證內容之準確性。

《說說心理話》與你分享遭遇欺凌該如何應對　教你兩個方法輕易彈走負面情緒► 即睇