新能源車龍頭比亞迪(01211)發盈喜，預期截至舊年12月31日為止年度純利160億至170億人仔，按年升4.25倍至4.58倍，每股盈利5.5銀至5.84銀，扣除非經常性損益之純利151億至163億人仔，升11銀至12倍。
　　集團指，業績大幅增長主因新能源汽車行業持續爆發式增長，新能源汽車銷量按年強勁增長，成為全球新能源汽車銷量第一，推動盈利大幅改善，並有效緩解上游原材料價格上漲帶來嘅成本壓力。
　　比亞迪喺新能源車嘅業務有幾勁，相信都唔使再多講。嚟緊要重上300銀呢個重要關卡，除咗要留意「股神」巴菲特減持嘅情況，亦要留意Tesla嘅走勢，畢竟作為新能源車嘅重要企業之一嘅Tesla，呢排股價表現仲係好立，對比亞迪都有直接關係。仲有，如果中央有新嘅扶助車企措施，相信會幫到比亞迪股價繼續向上。
　　比亞迪對上三個交易日都可以收高喺250天線之上，今朝曾經升到251銀，逐步收復去年8月30日到31日之間嘅下跌裂口。不過噚日都講過，魚缸處於回調階段，比亞迪今日衝高後升幅收窄，短期升幅可能受到限制。有貨嘅朋友可以留意10天線，收市失守呢條平均線可以離場。

《編者按》本欄搜羅即市傳聞，惟消息未經證實，《經濟通》亦不保證內容之準確性。

【香港好去處】2026去邊最好玩？etnet為你提供全港最齊盛事活動，所有資訊盡在掌握！► 即睇