比亞迪(01211)3月31日又被股神巴菲特旗下嘅巴郡減持，今次減持股數達248.05萬股H股，每股平均作價217.67銀，套現5.4億銀。巴郡喺比亞迪持股量由11.13%跌到10.9%，自舊年8月持倉累計減少至近一半，累計套現超過216億銀。
　　雖然股神不斷減持比亞迪，但佢接受訪問嗰陣稱讚比亞迪「非凡」(extraordinary)，將會將錢投放到更為睇好嘅對象上，依家唔急於減持。不過，他都強調巴郡仲有更好嘅投資去處。
　　較早前，巴菲特表明正打算再增持日本股票，對目前持有日本五大商社股票感到「非常自豪」，並會喺今個星期同呢啲公司會面，討論內容圍繞他們嘅業務，重申對持股公司嘅支持。
　　比亞迪由舊年7月開始喺330銀開始下跌，期間一直受到股神減持嘅消息遏制反彈。雖然佢話唔急於減持，但巴郡仍然有一定持股量，未來唔排除會繼續減持，加上汽車減價戰殺到新能源車，比亞迪海豹車型補貼最高3.1萬人民幣，相當於打9折，反映新能源車需求仲係疲弱，比亞迪要重拾當年光輝時刻，絕對唔容易呀。
　　比亞迪近幾個交易日挑戰唔到250天線，之後調頭落番去，今朝曾經跌超過2%。嚟緊好大機會喺190至235銀之間上落，無貨嘅朋友唔使急住依家買入，可以等落到190銀附近吸納，到230銀食胡。

《編者按》本欄搜羅即市傳聞，惟消息未經證實，《經濟通》亦不保證內容之準確性。