《魚缸博客》內地公布咗5月CPI同PPI，表現唔係特別好。5月CPI按年上升0.2%，低過預期嘅0.3%，但就比4月嘅按年升0.1%好啲。至於PPI，5月按年跌4.6%，差過預期嘅跌4.3%，更加成為2016年3月以嚟近7年最大跌幅，反映工業用品市場需求仍然比較弱。
　　CPI同PPI無乜驚喜，魚缸今朝走勢同樣無乜驚喜，就算有政策消息嘅汽車股都提唔起勁。商務部辦公廳宣布喺6月至12月開展一系列汽車促消費活動嘅通知，要求發揮地方財政資金作用，鼓勵金融機構出台汽車信貸金融支持措施。
　　至於汽車下鄉方面，商務部指喺全國千幾個縣、萬幾個鎮開展新能源汽車「大篷車」進農村等新能源汽車促消費活動，推動完善農村地區充電基礎設施體系，依托縣鄉商業網點、企事業單位等場所，合理推進農村集中式公共充電樁場站建設。
　　汽車股並無因為呢啲政策而急升，其中宣布旗下專業個性化品牌、內部代稱嘅「F品牌」正式定名做「方程豹」嘅比亞迪(01211)只係微微上升。公司股價由3月14日低位190.5銀反覆向上，直至前日高位255銀，累積咗超過33%嘅升幅，近期股價立番少少都合情合理嘅。按照目前走勢，比亞迪仲有得上試年內高位268銀，有貨嘅朋友仲可以揸住，無貨嘅朋友就可以等落番235銀吸納，值博率會比較高。

《編者按》本欄搜羅即市傳聞，惟消息未經證實，《經濟通》亦不保證內容之準確性。