《小傳日記》中美魚缸近排分別升見高位，都開始有Ｄ疲態，噚晚（２４日）道指就回番百幾點，收報１８０１１點，Ａ場「十連升」佳績亦暫時劃上句號，今日（２５日）收跌近１巴仙報３６６０點。　　不過，香江又繼續我行我素，喺友邦（０１２９９）、祖國移動（００９４１）、長和（００００１）同和黃（０００１３）幾位大隻佬搶升之下，恆指彈高１２８點收市，報２４５２８，又再一次上番５０天線（約２４４３９）。　　另一邊廂，中資股排除放榜，暫時成績都無驚喜，Ａ場趁機會回吓氣時，國指都好難有好表現，埋單收跌３６點報１１９６８，全日主板成交近８３６億銀。　　唔經唔覺，業績期已經踏入尾聲，如果無咩壞消息打擊，香江短期應該會喺２４５００水平整固，叉夠電後有望再挑戰二萬五！

＊結束十連升Ａ仔頭擰擰，香江卻踢高超人特別醒＊

　　李超人旗下和黃（０００１３）傾咗好耐，想將米字國移動通訊營運商Ｏ２收歸旗下，家陣終於成事喇！宣布以１１８０億銀娶得「美人」歸。和黃今日造好，有２巴仙進帳收報１０５﹒７銀。摩通就話，單「刁」對和黃嚟講係正面，重申「增持」評級，目標價１２４銀，距離現價有１７個巴仙水位有凸。同系嘅長和（００００１）都唔執輸，埋單都升超過兩巴仙，曾經觸及１５５蚊，收報１５４﹒７銀。　　講番呢排一身蟻嘅匯控（００００５），米字國分行嗰邊諗住將投行同零售業務拆散，各自為政，全日股價升唔夠１巴仙，收報６７﹒３５銀。另一間本地錢莊中銀香港（０２３８８）就有新動作，有傳話將南商出售，而且屬意祖國買家，收市都升超過１巴仙，收２７﹒４銀。收市後隻股放榜，全年多賺一成至２４６億銀，都算唔錯喎！至於阿媽中行（０３９８８），都多賺巴仙至１６９６億人仔，略好過預期。

＊傳洽售南商中銀輕踏前，大行輪流踩康師傅心酸＊

　　康師傅（００３２２）就真係陰功豬，連跌三日都唔見咗成８巴仙，但今日繼續逆市碌低，變成傷勢最重嘅藍戰士。無計，自從派完份跌眼鏡嘅成績表之後，瑞信、巴克萊、匯證都輪住插佢一刀，削減晒目標價，難怪股價一池死水，今日收低２巴仙報１６﹒８４銀。　　出咗成績嘅國壽（０２６２８）都有啲危機！業績唔夠好睇，淨保費收入先升得１﹒６巴仙，但好在「賓架」都無點踩佢，不過都要跣低１巴仙收３２﹒６５銀，成為第三慘嘅藍戰士。雖然業績唔對辦，但公司都好積極擴張業務，仲有傳聞話佢有興趣買中銀香港嘅南洋商業銀行添。　　恆安（０１０４４）噚日中午放榜後，今日大行們都提高晒目標價，帶動股價踢高逾５巴仙，成為最犀利嘅藍戰士。　　賭仔無懼惠譽調高賭收跌幅預測，銀娛（０００２７）仲獲得大摩視為行首選，結果同金沙（０１９２８）分別踢高１巴仙同２巴仙，金沙仲變成第二勁嘅大隻佬添！

＊成績遜預期壽仔有點翳，大行來添花恆安好氣勢＊

　　今日一樣勁多成績出爐，瑞聲（０２０１８）全年賺少咗一成，得２３億人仔，派息都派少咗，結果股價就跣低一成，失守晒十天、廿天、五十天線。而合生元（０１１１２）舊年就賺８億人仔，少咗１﹒７巴仙，不過公司就話，希望將會員服務轉為網購平台，年內有收購結果，結果股價今日就踢起咗一成五，報２９﹒８５銀。　　另外，天行國際（００９９３）噚日先話控制權易手，向華融（香港）訂立認購協議，向佢發行１７﹒０２億股新股，每股認購價０﹒２７５銀，足足比舊年１１月３日停牌前收報折讓八成幾！股價今日就繼續踢高三成二，報３﹒１３銀。至於瑞東（００３７６）今日都復賽，控制權或易手至中國民生投資，股價就狂升七成五，報７﹒２銀，勁。

＊炒股不炒市股細細粒落鑊，大上大落間扣好安全帶＊

　　今日大價股唔算多動靜，唔少細價股紛紛落鑊，五十天升幅榜入面全部都有最少一成進帳。高據第一位嘅鼎和礦業（００７０５），今日就爆升咗差唔多近１倍收市，收報０﹒２７５銀。最吊詭嘅係公司日前收到有間錢莊嘅信件，話旗下附屬爭人錢唔還，家陣可能要搞到上法庭添。咁究竟孖屐係到炒咩呢？！另外，神冠（００８２９）無啦啦畀匿名分析力撐，給予強烈買入，刺激股價彈高咗９巴仙，收報２﹒５１銀。　　早前話獲供應電動巴士快速充電電池嘅正道（０１１８８）似乎繼續散水，股價已經出現四連陰，今日唔見咗逾１１巴仙，收報０﹒４３銀。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式之　　　　　　　申述或訂立任何建議及推薦，讀者務請運用個人獨立思考能力自行作出投資決定　　　　　　　，如因相關建議招致損失，概與《經濟通》、編者及作者無涉。

全新節目《說說心理話》青少年不可以戀愛！？真實個案講述驚心動魄經歷► 即睇